ရုရှားနိုင်ငံမှာ COVID-19 ရောဂါကူးစက်ခံနေရတဲ့ မြန်မာ့တပ်မတော်မှ သင်တန်းသား အရာရှိ ၅ ဦးအနက် ၄ ဦး ရောဂါပျောက်ကင်းသွားပြီလို့ ကာကွယ်ရေးဦးစီချုပ်ရုံးက ဒီကနေ့ သတင်းထုတ်ပြန်ပါတယ်။
အဆိုပါ COVID-19 ကူးစက်ခံလူနာ မြန်မာသင်တန်းသားအရာရှိ ၅ ဦးကို မော်စကို မြို့အနီးရှိ လူနာတွေသီးသန့်ထားရှိတဲ့ ကျန်းမာရေးစောင့်ရှောက်မှုစင်တာမှာ ရုရှားကျန်းမာရေး ဝန်ကြီးဌာနရဲ့ အစီအစဉ်နဲ့ ဆေးကုသပေးနေတာ ဖြစ်ပါတယ်။
သူတို့ ၅ ဦးကို ထပ်မံစစ်ဆေးခဲ့ရာမှာ သင်တန်းသား ၅ ဦးအနက်မှ ၄ ဦးမှာ COVID-19 ရောဂါပိုး မတွေ့ရှိရတော့ဘဲ ရောဂါပိုး ပျောက်ကင်းခဲ့ကြောင်း သိရှိခဲ့ရတာလို့ ဆိုပါတယ်။
ကျန်တဲ့ရောဂါပိုးကူးစက်ခံထားရတဲ့ အရာရှိ ၁ ဦးကတော့ လိုအပ်တဲ့ ကျန်းမာရေး စောင့်ရှောက်မှုတွေ ခံယူနေပြီး ကျန်းမာရေးအခြေအနေ ကောင်းမွန်နေတယ်လို့လည်း တပ်မတော် သတင်းထုတ်ပြန်ချက်မှာ ဖော်ပြပါတယ်။
ရုရှားနိုင်ငံမှာ သင်တန်းတက်ရောက်နေတဲ့ မြန်မာ့တပ်မတော်က ပညာတော်သင် သင်တန်းသား အရာရှိတွေအနက် မော်စကိုမြို့ရှိ Russian University of Transport တက္ကသိုလ်မှ သင်တန်းသား ၂ ဦးနဲ့ Moscow Power Engineering Institute တက္ကသိုလ်မှ သင်တန်းသား ၁ ဦးတို့မှာ ဧပြီ ၂၇ ရက်နေ့က COVID-19 ရောဂါပိုး စတင် စစ်ဆေးတွေ့ရှိတာဖြစ်ပါတယ်။
