ရခိုင်ပြည်နယ်၊ အမ်းမြို့နယ် တလိုင်းတောင်-မင်းတုန်းလမ်းနဲ့ အမ်း-ပဒန်းလမ်းရှိ စစ်အာဏာရှင်တပ်နဲ့ အာရက္ခတပ်တော် (AA) တို့တိုက်ပွဲမှာ စစ်သား အလောင်းတွေ၊ သုံ့ပန်းတွေနဲ့ လက်နက်ခဲယမ်းတွေကို ဒီရက်ပိုင်း သိမ်းဆည်းရမိတယ်လို့ ဒေသခံစစ်ရေးသတင်းရင်းမြစ်ဆီကနေ သိရပါတယ်။
အောက်တိုဘာ ၈ ရက်က အမ်း-တလိုင်းတောင်လမ်းကို ထိုးစစ်ဆင်နေတဲ့ စစ်အာဏာရှင် စစ်ကြောင်းတကြောင်းကို AA က ကံကြိုးရွာ နဲ့ ပတ်ဝန်းကျင် တမိုင်ခန့်မှာ တိုက်ခိုက်ခဲ့ပြီး စစ်သားအလောင်းတွေ၊ လက်နက်ခဲယမ်းတွေနဲ့ သုံ့ပန်းတွေကိုပါ ဖမ်းဆီးရမိတယ်လို့ ဒေသခံ စစ်ရေးသတင်းရင်းမြစ်က ပြောပါတယ်။
“အဲဒီနေ့က ဖြစ်တဲ့ပွဲမှာ အလောင်း ၁၀ ကျော်ရတယ်။ လက်နက်ခဲယမ်းရတယ်၊ သုံ့ပန်း ၅ ယောက်လောက်တော့ ရတယ်။”
စစ်အာဏာရှင် တပ်မ ၅၅ ဦးဆောင်ပြီး မင်းတုန်းမြို့နယ် အနောက်ဘက်ခြမ်း သဖန်ရောင်နဲ့ တလိုင်းတောင်ကျော်လမ်း စစ်မျက်နှာကနေ အမ်းမြို့နယ်ကို အဓိကထိုးစစ်ဆင်နေတာပါ။
အလားတူ အမ်း-ပဒန်းလမ်းရှိ AA ပိတ်ဆို့ထားတဲ့ နတ်ရေကန်တောင် လေကြောင်းရန်ကာကွယ်ရေးစခန်းကို ထိုးစစ်ဆင်နေတဲ့ စစ်ကြောင်းနဲ့ AA တို့ ဂုတ်ကြီးရွာ (လမ်းသစ်)အနီးမှာ အောက်တိုဘာ ၉ ရက်နေ့ညနေက တိုက်ပွဲဖြစ်ခဲ့ကြပြီး စစ်အာဏာရှင်တပ်က အထိနာပြီး နောက်ဆုတ်သွားတယ်လို့ စစ်ရေးနီးစပ်သူ ဒေသခံတယောက်က ပြောပါတယ်။
“စကစဘေက်က AA ဘက်ကို ထိုးတက်ကြည့်တယ်။ AA က ပစ်ချလိုက်ရင် နောက်ဆုတ်သွားတယ်။ အဲဒီနေ့က သူတို့တက်လာတာမြင်လို့ AA က အသင့်တိုက်တာ အထိနာသွားတယ်။”
အခုလို အထိနာသွားပြီး နောက်ဆုတ်သွားပြီးနောက် စစ်အာဏာရှင်တပ်က မြေလပ်ကျေးရွာစခန်းကနေ ဒရုန်း၊ လက်နက်ကြီးတွေနဲ့ အကြိမ်ရေ ၂၀ ထက်မနည်း ပစ်ခဲ့တယ်လို့ သိရပါတယ်။
တဆက်တည်း ညအချိန်မှာလည်း ပဇီ၊ ဂုတ်ကြီးဝန်းကျင်ကို Y12၊ ဂျက်ဖိုက်တာတွေနဲ့ ဆက်တိုက်ဗုံးကြဲခဲ့တယ်လို့ စစ်ရေးသတင်းရင်းမြစ်က ပြောပါတယ်။
