စစ်ကိုင်းတိုင်းဒေသကြီးအတွင်း မြို့နယ်အလိုက် ပုဒ်မ ၁၄၄ ညမထွက်ရအမိန့်တွေ ထုတ်ပြန်ထားပြီး အမိန့်ညွှန်ကြားချက် မလိုက်နာသူ ၁၅ ဦးကို အရေးယူအပြစ်ပေးထားပါတယ်။
လက်ရှိအချိန်ထိ တိုင်းအစိုးရ လုံ/နယ်ဝန်ကြီးဌာနက ရရှိတဲ့ သတင်းတွေအရ ပုဒ်မ ၁၄၄ ကို မလိုက်နာလို့ ရာဇသတ်ကြီးပုဒ်မ ၁၈၈ နဲ့ အမှုဖွင့်အရေးယူအပြစ်ပေးထားသူ ကလေးမြို့နယ်က ၁၂ ဦး၊ ချောင်းဦးမြို့နယ်က ၁ ဦးနဲ့ မော်လိုက်မြို့နယ်က ၂ ဦးရှိပြီး သူတို့ကို ထောင်ဒဏ် ၃ လစီချမှတ်ထားပါတယ်။
ခုလိုအပြစ်ပေးအရေးယူရတာဟာ အများပြည်သူအကျိုးအတွက် လုပ်ဆောင်ရတာ ဖြစ်တယ်လို့ စစ်ကိုင်းတိုင်း လုံ/နယ်ဝန်ကြီးက ပြောပါတယ်။
COVID-19 ရောဂါနဲ့ ပတ်သက်လို့ စစ်ကိုင်းတိုင်းမှာ ပုဒ်မ ၁၄၄ ကို မလိုက်နာလို့ အရေးယူထားတာတွေအပြင် တခြားသော ပုဒ်မတွေနဲ့ အရေးယူထားတာတွေလည်း ရှိပါသေးတယ်။
မတ်လ ၂၈ ရက်နေ့ကစတင်ကာ COVID-19 ရောဂါနဲ့ပတ်သက်ပြီး ဒီနေ့အထိ တစ်လအတွင်း ဘေးအန္တရာယ်ဆိုင်ရာ စီမံခန့်ခွဲမှု ဥပဒေနဲ့ ၂၁ မှု၊ ကူးစက်ရောဂါများ ကာကွယ်နှိမ်နင်းရေးဥပဒေနဲ့ ၁ မှု၊ ကိုဗစ်ကာကွယ်ထိန်းချုပ်ရေး၊ အရေးပေါ်တုန့်ပြန်ရေးတွေကို ဆောင်ရွက်နေသူကို ရန်ပြုတာ၊ ခြိမ်းခြောက်တာ၊ ဆဲဆိုတာ၊ ဟန့်တားနှောင့်ယှက်တာတွေကြောင့် ဆက်စပ်အနေနဲ့ အရေးယူထားတာ ၂၃ မှု ရှိပါတယ်။
ညမထွက်အမိန့်ကို သင်္ကြန်မတိုင်ခင် ဧပြီလ ၁၃ ရက်က စတင်ကာ အမိန့်ကြေငြာစာအမှတ် ၅/၂၀၂၀ နဲ့ အမိန့်ထုတ်ပြန်ခဲ့ပါတယ်။
အမိန့်စာအရ အကြောင်းပြချက် ခိုင်ခိုင်လုံလုံမရှိဘဲ ည ၁၀ နာရီကနေ မနက် ၄ နာရီထိ အပြင်မထွက်ကြဖို့နဲ့ အပြင်ထွက်ရင် နှာခေါင်းစည်းတပ်ကြဖို့၊ ကျန်းမာရေး၊ လုံခြုံရေး၊ မှုခင်းတွေနဲ့ ပတ်သက်ပြီး မသင်္ကာဖွယ်လူတွေ တွေ့ရှိရင် နီးစပ်ရာ တာဝန်ရှိသူတွေထံကို သတင်းပေးကြဖို့ကိုလည်းတိုက်တွန်းထားပါတယ်။
လက်ရှိအချိန်ထိ စစ်ကိုင်းတိုင်းမှာ COVID-19 အတည်ပြုလူနာအနေနဲ့ ကလေးမြို့မှာ ၆ ဦး၊ စစ်ကိုင်းမြို့မှာ ၁ ဦး စုစုပေါင်း ၇ ဦးတွေ့ရှိထားပါတယ်။
Facility Quarantine Center အရေအတွက် စုစုပေါင်း ၁၈၅၉ ခုရှိပြီး ပြည်ပက ပြန်လာသူ ၁၁၃၀၈ ဦး၊ သံသယလူနာ ၅၈ ဦး၊ ပြန်လည်စေလွှတ်ပြီးသူ ၄၄ ဦးရှိပြီး ဓာတ်ခွဲအဖြေစောင့်ဆိုင်းနေသူ ၁၄ ဦးရှိနေပါတယ်။
