COVID-19 အတည်ပြုလူနာ ၂ ဦးထပ်မံတွေ့ရှိခဲ့ပြီး စုစုပေါင်း အတည်ပြုလူနာ ၁၄၆ ဦး ရှိသွားပြီလို့ ကျန်းမာရေးဌာနက ဒီနေ့မနက် ၇ နာရီမှာ ထုတ်ပြန်ပါတယ်။
ဧပြီ ၂၅ နဲ့ ၂၆ ရက်နေ့ မနက်အစောပိုင်းမှာ အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) (NHL) နဲ့ ဆေးသုတေသနဦးစီးဌာန (DMR) က ဓာတ်ခွဲစစ်ဆေးပြီးစီးခဲ့တဲ့ ဓာတ်ခွဲအဖြေတွေမှာ COVID-19 ရောဂါပိုး လူနာသစ် ၂ ဦး ထပ်မံတွေ့ရှိခဲ့တာလို့ ဆိုပါတယ်။
ဧပြီ ၂၅ ရက်နေ့က ဓာတ်ခွဲစစ်ဆေးမှုများကို အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) (NHL) က ဓာတ်ခွဲနမူနာ ၃၇၂ ခုအား ၃ သုတ်ခွဲ စစ်ဆေးခဲ့တာဖြစ်ပြီး ဆေးသုတေသနဦးစီးဌာန (DMR) က ဓာတ်ခွဲနမူနာ ၅၄ ခု၊ စုစုပေါင်း ၄၂၆ ဦးအား ၂ သုတ်ခွဲ စစ်ဆေးခဲ့တာလို့ ဆိုပါတယ်။
၄၂၄ ဦးမှာ ရောဂါပိုး မတွေ့ရဘဲ ဓာတ်ခွဲအတည်ပြုလူနာသစ် ၂ ဦးအား သက်ဆိုင်ရာဆေးရုံတွေကို လွှဲပြောင်းကုသမှုပေးသွားမယ်လို့ ထုတ်ပြန်ချက်မှာ ဖော်ပြထားပါတယ်။ အတည်ပြု လူနာသစ် အမှတ် ၁၄၅ က စစ်ကိုင်းမြို့နယ်က အသက် ၄၈ နှစ်အရွယ်အမျိုးသားဖြစ်ပြီး လူနာသစ် အမှတ် ၁၄၆ က ကမာရွတ်မြို့နယ်က ၃၂ နှစ်အရွယ် အမျိုးသားတို့ ဖြစ်ပါတယ်။
မြန်မာနိုင်ငံမှာ ဒီနေ့မနက် ၇ နာရီအထိ COVID-19 ရောဂါဓာတ်ခွဲအတည်ပြုလူနာ စုစုပေါင်း ၁၄၆ ဦး တွေ့ရှိခဲ့ပြီဖြစ်ပါတယ်။ ဓာတ်ခွဲအတည်ပြုလူနာတွေထဲ ရောဂါပိုးကင်းစင်လာသူ ၁၀ ဦးနဲ့ သေဆုံးသူ ၅ ဦး ရှိပါတယ်။
COVID-19 ရောဂါ ဓာတ်ခွဲအတည်ပြုလူနာတွေထဲက လူနာ ၃ ဦးကို သက်ဆိုင်ရာ ဆေးရုံတွေမှာ အထူးကြပ်မတ်ကုသပေးနေပြီး ကျန်းမာရေးအခြေအနေ တည်ငြိမ်နေတယ်လို့ ကျန်းမာရေးဌာနက မနေ့ညနေက ထုတ်ပြန်ထားပါတယ်။
