မြန်မာနိုင်ငံမှာ ပြီးခဲ့တဲ့တပတ်အတွင်း ကိုဗစ်-၁၉ ရောဂါ ဓာတ်ခွဲအတည်ပြုလူနာသစ် ၂၉ ယောက် တွေ့ရပြီး ရှေ့တပတ်ကထက် လျော့သွားကာ ထပ်ဆောင်း ကိုဗစ်ကာကွယ်ဆေးထိုးပေးမယ်လို့ စစ်ကောင်စီ ကျန်းမာရေးဌာနက ထုတ်ပြန်ပါတယ်။
ဇွန် ၁၅ ရက် ည ၈ နာရီကနေ ဇွန် ၂၂ ရက် ည ၈ နာရီအထိ တပတ်အတွင်း လူပေါင်း ၂,၁၉၉ ယောက်ကို စစ်ဆေးခဲ့တာမှာ ကိုဗစ်-၁၉ ရောဂါဓာတ်ခွဲအတည်ပြုလူနာသစ် ၂၉ ယောက် တွေ့ရတာကြောင့် ပိုးတွေ့ရာနှုန်းက ၁ ဒသမ ၃၂ ဖြစ်တယ်လို့ ဇွန် ၂၃ ရက် ညမှာ ထုတ်ပြန်ပါတယ်။
လူနာ တွေ့ရတာကတော့ ရန်ကုန် ဒဂုံမြို့သစ်မြောက်ပိုင်းမှာ ၃ ယောက်၊ ထန်းတပင်၊ မှော်ဘီ၊ လှိုင်သာယာ၊ ဒဂုံမြို့သစ်တောင်ပိုင်း၊ မြောက်ဥက္ကလာနဲ့ ရန်ကင်းမှာ ၁ ယောက်စီ၊ မန္တလေး မဟာအောင်မြေမှာ ၆ ယောက်၊ မကွေးတိုင်း ဂန့်ဂေါမှာ ၄ ယောက်၊ မင်းလှမှာ ၁ ယောက်၊ ရှမ်းပြည်နယ် တောင်ကြီးမှာ ၃ ယောက်၊ ကျိုင်းတုံမှာ ၂ ယောက် ဖြစ်တယ်လို့ ရောဂါကာကွယ်ထိန်းချုပ်ရေး ဗဟိုဌာနက ဒီမနက်မှာ ထုတ်ပြန်လာပါတယ်။
ဒီလူနာတွေထဲမှာ ပြင်းထန်လူနာ၊ အထူးကြပ်မတ်ကုသပေးရတဲ့ လူနာနဲ့ ကိုဗစ်-၁၉ ရောဂါနဲ့ သေဆုံးလူနာ မရှိဘူးလို့ ဆိုပါတယ်။
မြန်မာနိုင်ငံမှာ ကိုဗစ်ရောဂါ စဖြစ်ချိန်ကနေ ၂၀၂၅ ခုနှစ်၊ ဇွန် ၈ ရက်အထိ ပိုးတွေ့သူစုစုပေါင်း ၆၄၃,၃၆၈ ယောက်၊ သေဆုံးသူစုစုပေါင်း ၁၉,၄၉၄ ယောက် ရှိခဲ့တယ်လို့လည်း ကျန်းမာရေးဌာနရဲ့ အချက်အလက်တွေအရ သိရပါတယ်။
လက်ရှိ ကိုဗစ်ရောဂါဖြစ်ပွားကူးစက်နေတာဟာ စိုးရိမ်စရာတော့ မရှိသေးပေမဲ့ အသက် ၆၀ အထက် သက်ကြီးရွယ်အိုတွေ၊ ဆီးချို၊ နာတာရှည်အဆုတ်ရောဂါနဲ့ ကင်ဆာရောဂါရှိသူတွေ၊ ကိုယ်ဝန် ၃ လနဲ့အထက် ကိုယ်ဝန်ဆောင်တွေကို ဦးစားပေးအစီအစဉ်နဲ့ ထပ်ဆောင်း ကိုဗစ်ကာကွယ်ဆေး ထိုးပေးမယ်လို့ မနေ့က ထုတ်ပြန်ချက်မှာ ဖော်ပြပါတယ်။
ဒါ့အပြင် ဆေးတကြိမ်မှ မထိုးနှံရသေးသူတဲ့ အသက် ၁၈ အထက်ရှိသူတွေကို တကြိမ် ထိုးနှံပေးမှာ ဖြစ်သလို နောက်ဆုံးအကြိမ် ထိုးနှံပြီးတာ ၆ လ ပြည့်ပြီးတဲ့ ကျန်းမာရေးဝန်ထမ်းတွေနဲ့ နိုင်ငံဝန်ထမ်းတွေအားလုံး၊ အသက် ၁၂ နှစ်အထက် ကိုယ်ခံအားနည်းရောဂါရှိပြီး ကိုဗစ်-၁၉ ရောဂါ ကာကွယ်ဆေးထိုးဖို့လိုအပ်သူတွေကိုလည်း ထိုးနှံပေးမယ်လို့ ထုတ်ပြန်ထားပါတယ်။
