ထိုင်းနိုင်ငံက လင်းနို့တွေမှာ ကိုရိုနာဗိုင်းရပ်စ် မျိုးစိတ်သစ်တခု တွေ့ရှိရတယ်ဆိုတဲ့ သတင်းဟာ အမှန်ဖြစ်တယ်လို့ ထိုင်းနိုင်ငံ ဒစ်ဂျစ်တယ်စီးပွားရေးနှင့် လူမှုအဖွဲ့အစည်းဝန်ကြီးဌာန (DES) က အတည်ပြုလိုက်တဲ့အကြောင်း The Nation Thailand သတင်းမှာ မေ ၁၁ ရက်က ဖော်ပြပါတယ်။ 

ဒါပေမဲ့ လက်ရှိအချိန်အထိ လူသားတွေဆီ ကူးစက်မှုကို မတွေ့ရသေးသလို ကပ်ရောဂါအသွင် ပြန့်ပွားနိုင်ခြေလည်း အလွန်နည်းပါးတယ်လို့ ဆိုပါတယ်။

ဝန်ကြီးဌာန ပြောရေးဆိုခွင့်ရှိသူ ဝေထန်ဖွန်ဆက်ပ်က ထိုင်းနိုင်ငံ သတင်းတု သတင်းမှား တိုက်ဖျက်ရေးစင်တာရဲ့ စိစစ်ချက်အရ အဆိုပါဗိုင်းရပ်စ်တွေ့ရှိမှု သတင်းဟာ အမှန်ဖြစ်ကြောင်း ပြောလိုက်သလို ဒီတွေ့ရှိမှုကို ကျန်းမာရေးဝန်ကြီးဌာန ရောဂါထိန်းချုပ်ရေးဌာနနဲ့ ပူးပေါင်းပြီး One Health - လူ၊ တိရစ္ဆာန်နဲ့ ပတ်ဝန်းကျင် ကျန်းမာရေး ချိတ်ဆက်စောင့်ကြည့်မှု စနစ်အရ တွေ့ရှိခဲ့တာလို့ ဆိုပါတယ်။

အန္တရာယ်ရှိမှု အခြေအနေမှာတော့ လူသားတွေဆီ ကူးစက်မှု လုံးဝမရှိသေးကြောင်းနဲ့ အဆိုပါဗိုင်းရပ်စ်ဟာ COVID-19 နဲ့ နှိုင်းယှဉ်ရင် ရောဂါဖြစ်ပွားစေနိုင်စွမ်းနဲ့ ကူးစက်နိုင်စွမ်း သိသိသာသာ လျော့နည်းတာကို ကနဦးလေ့လာချက်တွေအရ တွေ့ရတယ်လို့ သတင်းမှာ ဖော်ပြပါတယ်။

ဒါ့အပြင် ပြည်သူတွေအနေနဲ့ အွန်လိုင်းပေါ်က သတင်းတွေကို မယုံကြည်ခင်နဲ့ ပြန် လည်မမျှဝေခင်မှာ အစိုးရဌာနဆိုင်ရာတွေရဲ့ တရားဝင် ထုတ်ပြန်ချက်တွေကို အမြဲစစ်ဆေးဖို့လည်း ဒစ်ဂျစ်တယ်စီးပွားရေးနှင့် လူမှုအဖွဲ့အစည်းဝန်ကြီးဌာန (DES) က တိုက်တွန်းထားပါတယ်။

Source: The Nation Thailand