COVID-19 အတည်ပြုလူနာသစ် ၇ ဦးထပ်မံစစ်ဆေးတွေ့ရှိရပြီး ဧပြီ ၂၄ ရက် မနက် ၉ နာရီအထိ မြန်မာနိုင်ငံမှာ ကိုရိုနာဗိုင်းရပ်စ်ရောဂါကူးစက်ခံရတဲ့ ဓာတ်ခွဲအတည်ပြုလူနာ စုစုပေါင်း  ၁၃၉ ဦးရှိသွားပြီလို့ ကျန်းမာရေးနဲ့ အားကစားဝန်ကြီးဌာနက ဒီနေ့မနက်သတင်းထုတ်ပြန်ပါတယ်။ 

ဆေးသုတေသနဦးစီးဌာန (ရန်ကုန်)ရဲ့ ဧပြီ ၂၃ ရက် ညက  စစ်ဆေးခဲ့တဲ့ ဓာတ်ခွဲနမူနာ ၆၄ ခုအနက် ၇ ဦးမှာ  COVID-19 ရောဂါပိုးတွေ့ရှိပြီး ကျန် ၅၇ ဦးမှာတော့  ရောဂါပိုး မတွေ့ရှိဘူးလို့ဆိုပါတယ်။

အဆိုပါလူနာသစ်တွေကို သက်ဆိုင်ရာဆေးရုံတွေကို လွှဲပြောင်းပြီး သီးခြားထားရှိ ကုသမှုပေးသွားမယ်လို့လည်း သိရပါတယ်။

မြန်မာနိုင်ငံမှာ ဒီနေ့မနက်အထိ ဓာတ်ခွဲအတည်ပြု လူနာ စုစုပေါင်း ၁၃၉  ဦးရှိပြီး  သေဆုံးသူ ၅ ဦးနဲ့  ရောဂါပိုးကင်းစင်လို့ ဆေးရုံက ဆင်းခွင့်ပြုခဲ့သူ ၉  ဦး ရှိတယ်လို့ ကျန်းမာရေးဌာန ထုတ်ပြန်ချက်အရ သိရပါတယ်။