တနင်္သာရီတိုင်းအတွင်းမှာရှိတဲ့ မြို့နယ် ၈ ခုမှာ ညမထွက်ရအမိန့်ကို ဧပြီလ ၁၈ ရက်နေ့က ထုတ်ပြန်လိုက်ပါတယ်။ 

လတ်တလော ဖြစ်ပွားနေတဲ့ ကူးစက်မြန် COVID-19 ရောဂါပိုးပြန့်ပွားမှုကို ထိန်းချုပ်လိုတဲ့အပြင် လူနာအမှတ် ၂၅ ဟာ တနင်္သာရီတိုင်းအတွင်းက မြို့နယ်တွေကို လာရောက်ခဲ့တဲ့အတွက် အခုလို ညမထွက်ရအမိန့် ထုတ်ပြန်လိုက်တာလို့ အထွေထွေ အုပ်ချုပ်ရေးဦးစီးဌာနက ထုတ်ပြန်ထားပါတယ်။  

ဒါကြောင့် သတ်မှတ်ထားတဲ့ နယ်နိမိတ်တွေမှာ ည ၁၀ နာရီကနေ မနက် ၄ နာရီအတွင်း  စိုးရိမ်ဖွယ်ရာ ကျန်းမာရေးကိစ္စရပ်ကလွဲပြီး နေအိမ်အပြင်မထွက်ဖို့ လူစုလူဝေးမလုပ်ဖို့နဲ့ မလိုက်နာဘူးဆိုရင် တည်ဆဲဥပဒေအရ အရေးယူမယ်လို့လည်း ထုတ်ပြန်ထားပါတယ်။ 

အခုလို ထုတ်ပြန်လိုက်တာကြောင့် ည ၁၂ နာရီခွဲကနေ မနက် ၄ နာရီအထိ အလုပ်လုပ်ကိုင်နေကြရတဲ့ ရော်ဘာအစေးခြစ်လုပ်သားတွေအနေနဲ့ အခက်အခဲဖြစ်ပေါ်နေတယ်လို့ ဆိုပါတယ်။ 

ဒါ့အပြင် အခုလို ထုတ်ပြန်လိုက်တာဟာ ညပိုင်းအချိန်ကာလအပိုင်းအခြားမှာ COVID-19 ကူးစက်မှု ပိုမိုအဖြစ်များလို့လားဆိုပြီး လူထုကြားထဲ မေးခွန်းထုတ်မှုတွေလည်း ရှိနေပါတယ်။ 

အခုလို အကြောင်းရာမျိုးတွေ တိုင်းအစိုးရအဖွဲ့ဆီကို တက်လာတာမျိုးမရှိသေးပဲ တကယ်လို့ တင်ပြလာခဲ့ရင် အခြေခံလူတန်းစားတွေအတွက် အတတ်နိုင်ဆုံး အဆင်ပြေနိုင်မယ့် နည်းလမ်းတွေကို တိုင်းဒေသကြီးအစိုးရအဖွဲ့အနေနဲ့ စဉ်းစားပြီး ဆောင်ရွက်သွားမယ်လို့ တိုင်းအစိုးရအဖွဲ့ရဲ့ ပြောရေးဆိုခွင့်ရှိသူ ဝန်ကြီး ဦးကျော်မင်းက ပြောပါတယ်။