ရန်ကုန်တိုင်းထဲက မြို့နယ် ၇ ခုမှာ နေထိုင်သူတွေအနေနဲ့ ဒီနေ့ညနေ ၆ နာရီကစပြီး အိမ်မှာပဲ နေဖို့အပါအဝင် သတ်မှတ်ချက်တွေကို လိုက်နာဖို့ ကျန်းမာရေးနဲ့ အားကစားဝန်ကြီးက အမိန့်ထုတ်ပြန်လိုက်ပါတယ်။
ကူးစက်ရောဂါများ ကာကွယ်နှိမ်နင်းရေး ဥပဒေအရ ဒီနေ့ရက်စွဲနဲ့ ထုတ်ပြန်လိုက်တာဖြစ်ပြီး လတ်တလောအသက်ရှူလမ်းကြောင်းဆိုင်ရာ ရောဂါ (Coronavirus Disease 2019 – COVID-19) ကို ပိုပြီး ထိထိရောက်ရောက် ထိန်းချုပ်နိုင်ဖို့အတွက် တချို့မြို့နယ်က ပြည်သူတွေအနေနဲ့ အိမ်မှာပဲ နေထိုင်ကြဖို့ (Stay at Home) လိုတယ်လို့ ဆိုပါတယ်။
တောင်ဥက္ကလာပမြို့နယ်၊ ပန်းဘဲတန်းမြို့နယ်၊ ဗဟန်းမြို့နယ်၊ မရမ်းကုန်းမြို့နယ်၊ အင်းစိန်မြို့နယ်၊ ရွှေပြည်သာမြို့နယ်နဲ့ လှိုင်သာယာမြို့နယ်တို့မှာ နေထိုင်ကြသူတွေအနေနဲ့ မဖြစ်မနေ ဈေးဝယ်ဖို့အတွက် တအိမ်က တယောက်ပဲသွားဖို့၊ ဆေးရုံ ဆေးခန်းသွားမယ်ဆိုရင် တအိမ်က ၂ ယောက်ပဲ သွားဖို့၊ အိမ်အပြင်ကိုသွားမယ်ဆိုရင် ပါးစပ်/ နှာခေါင်းစည်း (mask) တပ်ဖို့၊ တာဝန်ထမ်းဆောင်ဖို့ သွားရောက်တာ၊ ပြန်လာမယ့်သူတွေကို ပို့မယ့်ကားတွေနဲ့ ဖြတ်သန်းခွင့်ပေးထားတဲ့ ယာဉ်တွေကိုပဲ ရပ်ကွက်ကျော်လွန် သွားခွင့်ပေးဖို့၊ ရပ်ကွက်အတွင်း ဈေးဝယ်တာအတွက် ယာဉ်ပေါ်မှာ ယာဉ်မောင်းအပြင် နောက်တယောက်၊ ဆေးရုံဆေးခန်း သွားဖို့အတွက် ယာဉ်မောင်းအပြင် နောက် ၂ ယောက်ပဲ သွားရောက်ဖို့ အမိန့်ထုတ်လိုက်ပါတယ်။
ဒါပေမဲ့ အစိုးရဌာန၊ အဖွဲ့အစည်းတွေ၊ ကုမ္ပဏီ၊ စက်ရုံ၊ အလုပ်ရုံတွေမှာ တာဝန်ထမ်းဆောင်ဖို့ သွားရောက်သူတွေကိုတော့ အိမ်အပြင်ထွက်ခွင့်ပေးထားပါတယ်။
အပြင်ထွက်တဲ့အခါ သတ်မှတ်ဦးရေထက် ပိုပြီး ထွက်ဖို့လိုလာရင် တခြားအရေးပေါ်ကိစ္စတွေရှိရင် သက်ဆိုင်ရာရပ်ကွက် အုပ်ချုပ်ရေးအဖွဲ့ကို သတင်းပို့ပြီး ခွင့်ပြုချက်နဲ့ သွားလာဖို့လည်း ညွှန်ကြားထားပါတယ်။
သက်ဆိုင်ရာ ရပ်ကွက်အုပ်ချုပ်ရေးအဖွဲ့ကလည်း တာဝန်ရှိသူ၊ တာဝန်ထမ်းဆောင်ဖို့၊ သွားရောက်/ပြန်လာသူတွေကလွဲပြီး ရပ်ကွက်က လူတွေ မထွက်ဖို့၊ ရပ်ကွက်အပြင်ကလူတွေ ဝင်ခွင့်မပေးဖို့ ညွှန်ကြားထားပါတယ်။
ဒီအမိန့်ကို လိုက်နာဖို့ ပျက်ကွက်ရင် ကူးစက်ရောဂါများ ကာကွယ်နှိမ်နင်းရေး ဥပဒေအရ အရေးယူမယ်လို့လည်း ဆိုပါတယ်။
