ကယားပြည်နယ် လွိုင်ကော်အကျဉ်းထောင်ကနေ အကျဉ်းသူ အကျဉ်းသားပေါင်း ၁၉၀ ဒီကနေ့မနက်က လွတ်ငြိမ်းချမ်းသာခွင့်ရလို့ ပြန်လွတ်လာကြပါတယ်။
မြန်မာနှစ်သစ်ကူးအထိမ်းအမှတ်အနေနဲ့ နိုင်ငံတဝန်း အကျဉ်းထောင်အသီးသီးမှာရှိတဲ့ အကျဉ်းသား/အကျဉ်းသူ စုစုပေါင်း ၂၄၈၉၆ ယောက်ကို ပြစ်ဒဏ်လွတ်ငြိမ်းခွင့်ပေးလိုက်ကြောင်း နိုင်ငံတော်သမ္မတက ဒီကနေ့ အမိန့်ထုတ်ပြန်ပြီးနောက်မှာ အခုလို ပြန်လွှတ်လာကြတာပါ။
ပြန်လွတ်လာသူတွေထဲမှာ လွိုင်ကော်အကျဉ်းထောင် ရဲအက်ဥပဒေနဲ့ ၃ ဦး၊ တပ်မတော်အက်နဲ့ ကျား ၁၇ ဦးနဲ့ မူးယစ်ပုဒ်မတွေနဲ့ ကျား ၁၄၉ နဲ့ မ ၂၁ စုစုပေါင်း ၁၉၀ ဖြစ်ပါတယ်။
ပြန်လွတ်လာသူ ၁၉၀ ထဲမှာ ကယားပြည်နယ်အတွင်းက အကျဉ်းသူအကျဉ်းသား ၉၀ ပါဝင်ပြီး ကျန်သူတွေကတော့ ရန်ကုန်၊ မန္တလေး၊ ရှမ်းပြည်နယ် အစရှိတဲ့ ဒေသတွေက ဖြစ်ကြတယ်လို့ အကျဉ်းထောင်တာဝန်ရှိသူတွေဆီကနေ သိရပါတယ်။
COVID -19 ရောဂါ ဖြစ်ပွားမှုမရှိစေရေး ပြန်လွှတ်ပေးသူတွေကို ထောင်အာဏာပိုင်တွေက အိမ်တိုင်ရာရောက် ပို့ဆောင်ပေးနေသလို ရပ်ဝေးက ပြန်လွတ်လာသူတွေကို သူတို့အိမ်ပြန်နိုင်ရေး စီစဉ်ဆောင်ရွက်ပေးထားပါတယ်။
ထောင်အာဏာပိုင်တွေက လူစုလူဝေးမဖြစ်စေရေး အခုလို စီစဉ်ဆောင်ရွက်ပေးနေပေမယ့် ထောင်ရှေ့တွေမှာတော့ အကျဉ်းသူအကျဉ်းသာတွေရဲ့ မိသားစုဝင်တွေ လာရောက် စောင့်ဆိုင်း ကြိုဆိုနှုတ်ဆက် နေတာကိုလည်း တွေ့ရပါတယ်။
ထောင်ဒဏ် ၁၅ နှစ်ချမှတ်ခံထားရသူတဦးကတော့ သူ့ရဲ့ ထောင်ပြစ်ဒဏ် ၄ ပုံတပုံ လျော့ပေါ့ပေးလိုက်လို့ သူပြန်လွတ်လာတာလို့ ပြောပါတယ်။
“ကျနော်က ၁၅ နှစ် ၃ လကျတယ်။ သူတို့က ၄ ဖို့တဖို့ ပေးတာဆိုတော့ ၆ နှစ်နဲ့ ၄ လကျတာပေါ့။ ကျနော်ကတော့ ပျော်တာပေါ့။ ကျနော်ထောင်ထဲ ဒီလောက်ကြာတာ။ အခု အိမ်တောင်မပြန်တတ်ဘူး။ အိမ်က ကျနော်အရင်က ရန်ကုန်မှာနေတာ။ အခု အဲမှာမနေတော့ဘူး။ ရွှေညောင်မှာလာနေတာ။ ”
မြန်မာနှစ်သစ်မင်္ဂလာအခါသမယ အထိမ်းအမှတ်၊ ပြည်သူလူထု နှလုံးစိတ်ဝမ်း အေးချမ်းစေရေးနဲ့ လူသားချင်းစာနာထောက်ထားမှုကို အလေးထားတဲ့အနေနဲ့ နိုင်ငံတော် သမ္မတက အကျဉ်းထောင်/ စခန်းအသီးသီးရှိ အကျဉ်းသား အကျဉ်းသူ စုစုပေါင်း ၂၄၈၉၆ ဦးတို့ကို စည်းကမ်းသတ်မှတ်ချက် မထားဘဲ ပြစ်ဒဏ်လွတ်ငြိမ်းခွင့် ပေးလိုက်ကြောင်း နိုင်ငံတော် သမ္မတ ဦးဝင်းမြင့်ရဲ့ ပြစ်ဒဏ်လွတ်ငြိမ်းခွင့် အမိန့်မှာ ဖော်ပြပါရှိပါတယ်။
