မြန်မာ့စီးပွားရေးဘဏ်မှာ ကနဦးမတည်ငွေ ကျပ်ငွေ ဘီလီယံ ၁၀၀ နဲ့ COVID-19 Fund ရန်ပုံငွေထူထောင်ထားတဲ့အကြောင်း စီမံကိန်း၊ ဘဏ္ဍာရေးနှင့် စက်မှုဝန်ကြီးဌာနက မတ်လ ၁၈ ရက်နေ့စွဲနဲ့ ကြေညာလိုက်ပါတယ်။
နိုင်ငံတော် လှည့်ပတ်ရန်ပုံငွေမှ ကျပ် ၅၀ ဘီလီယံနဲ့ လူမူရေးရန်ပုံငွေမှ ၅၀ ဘီလီယံ စုစုပေါင်း ကျပ်ငွေ ဘီလီယံ ၁၀၀နဲ့ COVID-19 Fund စတင်ထူထောင်လိုက်တာဖြစ်ပါတယ်။
ဒီငွေတွေနဲ့ COVID-19 ကြောင့် စီးပွားရေးထိခိုက်မှု အများဆုံးခံစားနေရတဲ့ မြန်မာနိုင်ငံသားပိုင် CMP လုပ်ငန်းတွေ၊ ဟိုတယ်နဲ့ခရီးသွားလုပ်ငန်းတွေကို ကူညီပေးသွားမှာ ဖြစ်ပါတယ်။
ဒါ့အပြင် အသေးစားနဲ့ အလတ်စား စီးပွားရေးလုပ်ငန်းတွေကို အတိုးနှုန်း ၁ ရာခိုင်နှုန်း ချေးငွေကာလ ၁ နှစ် သတ်မှတ် ထုတ်ချေးမှာဖြစ်သလို ဝင်ငွေခွန်နဲ့ လစဉ်ပေးဆောင်ရ မယ့် ကုန်သွယ်လုပ်ငန်းခွန်တွေ ပေးဆောင်ရမယ့် အချိန်ကို ရွေ့ဆိုင်းပေးထားပါတယ်။
အလားတူ ပို့ကုန်လုပ်ငန်းတွေကနေ ကြိုတင်ကောက်ခံတဲ့ ဝင်ငွေခွန် ၂ ရာခိုင်နှုန်းကိုလညး ၂၀၁၉-၂၀၂၀ ဘဏ္ဍာနှစ်ကုန်အထိ ကင်းလွတ်ခွင့်ပြုတဲ့ အကြောင်း စီမံကိန်း ၊ ဘဏ္ဍာရေးနှင့် စက်မှု ဝန်ကြီးဌာနရဲ့ ကြေညာချက်မှာ ဖော်ပြပါတယ်။
