ဥရောပသမဂ္ဂ EU ဟာ အရှေ့ဘယ်လ်ဂျီယံမှာ လောင်ကျွမ်းနေတဲ့တောမီးကို ငြှိမ်းသတ်ဖို့ ရဟတ်ယာဉ် ၃ စင်းနဲ့ ရေသယ်မီးငြှိမ်း လေယာဉ် ၂ စင်းကို သြဂုတ် ၁၅ ရက်မှာ စေလွှတ်ခဲ့တယ်လို့ ဥရောပ အကျပ်အတည်း ကော်မရှင်နာက ပြောခဲ့ပါတယ်။ 

မကြာသေးမီ ဆယ်စုနှစ်တွေအတွင်း အကြီးမားဆုံးမီးလောင်မှုကို ထိန်းချုပ်ဖို့ အရေးပေါ် အင်အားဖြည့်တင်းမှုတွေကို ဘယ်လ်ဂျီယံအစိုးရက တောင်းဆိုခဲ့ပါတယ်။ 

ဘယ်လ်ဂျီယံရဲ့ အကြီးဆုံး သဘာဝဘေးမဲ့တောဖြစ်တဲ့ High Fens မှာ သြဂုတ် ၁၄ ရက်ကစလို့  လောင်နေတဲ့တောမီးကို ငြှိမ်းသတ်ဖို့ ဒေသခံမီးသတ်သမားတွေ၊ လယ်သမားတွေနဲ့ စစ်တပ်ကို စေလွှတ်ခဲ့ပါတယ်။ 

စနေနေ့ မွန်းလွဲပိုင်းအစောပိုင်းမှာ သစ်တောက ဟက်တာ ၁,၆၀၀ လောင်ကျွမ်းသွားပြီလို့ ဒေသခံမီဒီယာတွေက လိဂျ်မြို့ အုပ်ချုပ်ရေးမှူးရဲ့ စာရင်းအင်းတွေကို ကိုးကားဖော်ပြခဲ့ပါတယ်။ 

ဒီမီးဟာ ဘယ်လ်ဂျီယံနိုင်ငံမှာ မှတ်တမ်းတင်ထားတဲ့ အကြီးမားဆုံးမီးလောင်ကျွမ်းမှုဖြစ်ပြီး ၂၀၁၁ ခုနှစ်မှာ ဟက်တာ ၁,၄၀၀ နီးပါး လောင်ကျွမ်းခဲ့တဲ့ မီးရဲ့စံချိန်ကို ကျော်သွားမယ်လို့ ဥရောပတောမီးသတင်း အချက်အလက်စနစ်က ဖော်ပြထားပါတယ်။ 

ဘယ်လ်ဂျီယံအပါအဝင် ဥရောပနိုင်ငံတွေမှာ ခုအပတ်နွေရာသီရဲ့ ပဉ္စမအကြိမ်မြောက် အပူလှိုင်းဒဏ်ကိုခံစားခဲ့ရပြီး တောမီးလောင်ကျွမ်းမှုကို ဖြစ်စေတဲ့ ပူပြင်းခြောက်သွေ့တဲ့ အခြေအနေတွေက ပိုဆိုးရွားလာခဲ့ပါတယ်။

Source: Reuters