ရခိုင်ပြည်နယ်နဲ့ ထိစပ်နေတဲ့ ဧရာဝတီတိုင်း၊ ရေကြည်မြို့နယ်ကို စစ်အာဏာရှင်တပ်က လေကြောင်းကနေ ဗုံးကြဲချတာကြောင့် အရပ်သားတယောက် သေဆုံးခဲ့ပြီး ၂ ယောက် ဒဏ်ရာရသွားတယ်လို့ ဒေသခံတွေဆီကနေ သိရပါတယ်။
ဇူလိုင် ၁၅ ရက် မနက် ၄ နာရီကျော်လောက်က ရေကြည်မြို့နယ်ထဲက မြောက်စမ်းနဲ့ ဇီးရိုးစမ်းကျေးရွာ ဝန်းကျင်ကို စစ်အာဏာရှင်တပ်က လေကြောင်းကနေ ဗုံးကြဲချခဲ့တာကြောင့် အရပ်သားတယောက် ပွဲချင်းပြီး သေဆုံးခဲ့ပြီး ၂ ယောက် ပြင်းထန်ဒဏ်ရာတွေ ရရှိခဲ့ကာ နေအိမ်တွေလည်း ပျက်စီးခဲ့တယ်လို့ ဆိုပါတယ်။
မြေပြင်အခြေအနေကို သိရှိသူတယောက်က “မနက်အစောပိုင်း ကြဲချသွားတာ။ Y-12 တွေ၊ ဂျက်ဖိုက်တာတွေနဲ့ ချသွားတာ။ သေဆုံး ထိခိုက်တာတွေ ရှိတယ်။ အရပ်သားတွေနေတဲ့ နေရာမှန်း သိရက်နဲ့ လုပ်သွားတာ” လို့ ပြောပါတယ်။
လေကြောင်းနဲ့ ဗုံးကြဲခံရတာကြောင့်အသက် ၅၀ ကျော်အရွယ် ဒေါ်ရင်ဌေး သေဆုံးခဲ့ပြီး အသက် ၄၀ ကျော်အရွယ် အမျိုးသားတယောက်နဲ့ အမျိုးသမီးတယောက်တို့ ပြင်းထန်ဒဏ်ရာတွေ ရရှိခဲ့တယ်လို့ သိရပါတယ်။
စစ်ရေးသတင်းရင်းမြစ်တယောက်က “အနောက်တောင်တိုင်းစစ်ဌာနချုပ် ပုသိမ်ဘက်ကနေ ဂျက်ဖိုက်တာတွေ၊ Y-12 လေယာဉ်တွေ သုံးပြီး ရခိုင်ရိုးမအစပ်က နေရာတွေကို ဗုံးကြဲမယ်လို့ သိရတယ်။ ဒေသခံတွေအနေနဲ့ အရင်ထက် သတိပိုထားနေဖို့ လိုအပ်တယ်” လို့ ပြောပါတယ်။
လတ်တလောအနေနဲ့ စစ်အာဏာရှင်တပ်က လေကြောင်းကနေ ဗုံးကြဲချခဲ့တာကြောင့် ဇီးရိုးစမ်းနဲ့ မြောက်စမ်းကျေးရွာတွေဘက်က နေအိမ်တွေ အများဆုံး ပျက်စီးခဲ့ပြီး အရပ်သားသေဆုံးမှုတွေ တိုးနိုင်တယ်လို့ ဒေသခံတွေက ဆိုပါတယ်။
ရခိုင်ရိုးမအစပ် ဧရာဝတီတိုင်း၊ ရေကြည်မြို့နယ်ထဲက ကာကင်းစခန်းနဲ့ တပ်စခန်း ၄ ခုထက်မနည်းကို ဇွန်လ တတိယအပတ်နဲ့ ဇူလိုင်လ ပထမအပတ်ထဲမှာ တော်လှန်ရေးတပ်တွေက သိမ်းယူပြီးနောက် စစ်အာဏာရှင်တပ်က အခုလို လေကြောင်းကနေ ဗုံးကြဲချတာတွေကို ရက်ဆက် လုပ်လာတာလို့ သိရပါတယ်။
