ကချင်ပြည်နယ်၊ ဖားကန့်မြို့နယ်၊ ဆိပ်မူကျေးရွာအုပ်စုက နမ့်မှော်နဲ့ ကောင်စံကျေးရွာကြား ​ကျောက်စိမ်းကုမ္ပဏီလုပ်ကွက်က ​တောင်နံရံ ဒီ​နေ့ ဇူလိုင် ၃ ရက် မနက်ပိုင်းမှာ ပြိုကျပြီး ၇ ယောက် သေဆုံးသွားတယ်လို့ ​ဒေသခံ​တွေဆီက သိရပါတယ်။

မြေပြိုကျလို့ လုပ်ကွက်က ရေမဆေးကျောက်ရှာတဲ့ ဝန်ထမ်း အမျိုးသား ၇ ယောက် ပါသွားတာဖြစ်ပြီး သူတို့ရဲ့ အမည်နဲ့ ​နေရပ်​တွေကို​တော့ စာရင်းပြုစု​နေဆဲလို့ ဆိုပါတယ်။

​ဒေသခံတ​ယောက်က “​မြေပြိုကျတာ ဟုတ်တယ်။ ပါသွားတာ ၇ ဦးပါ။ စာရင်း​တွေ​တော့ မရ​သေးဘူး။ အကုန်လုံး အမျိုးသား​တွေပါ။ ကုမ္ပဏီဝန်ထမ်း​တွေလို့ သိရပါတယ်” လို့ DVB ကို ​ပြောပါတယ်။

​သေဆုံးသူ​တွေရဲ့ ရုပ်အ​လောင်း​တွေကို ဖားကန့် လူမှုရေးအသင်း​တွေက ရှာဖွေရေး လုပ်​ဆောင်​နေတယ်လို့ သိရပါတယ်။

​ဒေသခံတ​ယောက်က “မိုးတွင်းကာလဆို​တော့ ​မြေပြိုတာ၊ ​မျော​ချောင်း​ပေါက်တာ​တွေ​ကြောင့် ​ရေမ​ဆေးရှာသူ​တွေ ပါသွားတဲ့ဖြစ်စဥ်​တွေက ရှိ​နေတာပဲ။ အခုက ​အောက်မှာ ​ကျောက်ရှာတယ်၊ အ​ပေါ်က ကမ်းပါးက ပြိုကျတာ။ ​​ရေအိုင်​တော့ မရှိဘူး” လို့ ​ပြောပါတယ်။

ပြီးခဲ့တဲ့လက ဖားကန့်မှာ မိုးသည်းထန်လို့ ​ဥရု​ချောင်း ရေကြီးတာတွေ ဖြစ်ခဲ့ပြီး ​ဒေသခံ​တွေလည်း ​ပြောင်း​ရွှေ့ခဲ့ကြရသလို စစ်​ရေးအ​ခြေအ​နေ​တွေလည်း တည်ငြိမ်​နေတာ မရှိဘူးလို့ သိရပါတယ်။