ပေါ်တူဂီအသင်းဟာ ၂၀၂၆ ဖီဖာကမ္ဘာ့ဖလား နောက်ဆုံးပွဲစဉ်မှာ စပိန်အသင်းကို ၁၆ သင်းအဆင့် ရှုံးထွက်ပွဲစဉ်မှာ (၁-၀) ဂိုးနဲ့ ရှုံးနိမ့်ခဲ့ပြီးနောက် အသင်းခေါင်းဆောင် ခရစ်စတီယာနို ရော်နယ်ဒိုဟာ ကြီးကျယ်ခမ်းနားလှတဲ့ သူ့ရဲ့ ဘောလုံးသမားဘဝမှာ အကြီးမားဆုံး ဆုဖလားကြီးကို ဆွတ်ခူးနိုင်ခြင်းမရှိဘဲ မျက်ရည်တွေနဲ့ နှုတ်ဆက် နိဂုံးချုပ်သွားခဲ့ပြီ ဖြစ်ပါတယ်။
အမေရိကန်ပြည်ထောင်စု၊ ဒါးလတ်စ်မြို့မှာ ဇွန်လ ၇ ရက် ဒီနေ့မနက်က ကစားခဲ့တဲ့ ပွဲစဉ်မှာ ပုံမှန် မိနစ် ၉၀ အပြီး နာကျင်အချိန်ပိုဒဏ်ရာရချိန်မှာ လူစားဝင် စပိန်ကစားသမား မီကဲလ် မီရီနိုရဲ့ တလုံးတည်းသော အနိုင်ဂိုးနဲ့ အိမ်နီးချင်းစပိန်အသင်းက နောက်တဆင့်တက်သွားပြီး ရော်နယ်ဒို ဦးဆောင်တဲ့ ပေါ်တူဂီအသင်းကတော့ ကမ္ဘာ့ဖလား မျှော်လင့်ချက် ပျက်ပြယ်သွားခဲ့တာပါ။
စပိန်နဲ့ ကစားခဲ့တဲ့ပွဲမှာ ရော်နယ်ဒိုဟာ မိနစ် ၉၀ အပြည့်ပါဝင်ကစားသွားခဲ့ရာမှာ ဘောလုံးကို ၁၉ ကြိမ်သာ ထိခဲ့ရပြီး ဂိုးကန်သွင်းမှု ၃ ကြိမ်နဲ့ အသင်းဖော်အတွက် ဂိုးဖန်တီးမှု အခွင့်အရေး ၁ ကြိမ်သာ ပြုလုပ်နိုင်ခဲ့ပါတယ်။
အသက် ၄၁ နှစ်အရွယ်ရှိပြီဖြစ်တဲ့ ဝါရင့် ကစားသမားကြီး ရော်နယ်ဒိုဟာ ဘာလွန်းဒီအော ကမ္ဘာ့အကောင်းဆုံး ဘောလုံးသမား ဆု ၅ ကြိမ်၊ ချန်ပီယံလိဂ်ဖလား ၅ ကြိမ်နဲ့ ယူရို ၂၀၁၆ ဖလားတို့ကို ဆွတ်ခူးထားနိုင်ခဲ့သူ ဖြစ်ပြီး ကလပ်အသင်းနဲ့ လက်ရွေးစင်အသင်းတို့အတွက် ကမ္ဘာ့စံချိန်တင် သွင်းဂိုး ၉၇၆ ဂိုးအထိ သွင်းယူပေးထားနိုင်ခဲ့သူ ဖြစ်ပါတယ်။
သူဟာ ကမ္ဘာ့ဖလားပြိုင်ပွဲ ၆ ကြိမ်ဆက်တိုက် ဂိုးသွင်းယူနိုင်တဲ့ စံချိန်၊ ကမ္ဘာ့ဖလားရှုံးထွက်ပွဲစဉ်မှာ ဂိုးသွင်းခဲ့တဲ့ အသက်အကြီးဆုံးကစားသမားအဖြစ် စံချိန်တင်ထားနိုင်ခဲ့ပါတယ်။ ဒါပေမဲ့ ကမ္ဘာ့ဖလားကို ဆွတ်ခူးဖို့ အနီးစပ်ဆုံးဖြစ်ခဲ့တဲ့ အကြိမ်ကတော့ ၂၀၀၆ ခုနှစ်တုန်းက သူ့ရဲ့ ပထမဆုံး ကမ္ဘာ့ဖလား ပြိုင်ပွဲမှာ ပေါ်တူဂီအသင်း ဆီမီးဖိုင်နယ် တက်လှမ်းနိုင်ခဲ့တဲ့အချိန်က ဖြစ်ပါတယ်။
စီရော်နယ်ဒိုသည် အခုနှစ် ကမ္ဘာ့ဖလားပြိုင်ပွဲမှာတော့ ဥဇဘက်ကစ္စတန်နဲ့ပွဲမှာ ၂ ဂိုး၊ ခရိုအေးရှားနဲ့ ပွဲမှာ ပင်နယ်တီကနေတဆင့် ၁ ဂိုး စုစုပေါင်း ၃ ဂိုးသွင်းပေးခဲ့ပြီး ပေါ်တူဂီ နိုင်ငံ လက်ရွေးစင်အသင်းအတွက် ၁၄၆ ဂိုးအထိ သွင်းယူပေးထားခဲ့ကာ ဒါဟာ ပေါ်တူဂီ သမိုင်းမှာ ဂိုး အများဆုံးသွင်းထားတဲ့ စံချိန်လည်း ဖြစ်ပါတယ်။
ကမ္ဘာ့ဖလားသမိုင်းမှာ စီရော်နယ်ဒိုက သွင်းဂိုး စုစုပေါင်း ၁၁ ဂိုးသွင်းထားပြီး သမိုင်းတလျှောက် ဂိုးသွင်းအများဆုံးစာရင်းမှာ နဝမ နေရာကနေ ရပ်တည်နေပါတယ်။
၂၀၂၆ ကမ္ဘာ့ဖလားမှာတော့ ရော်နယ်ဒိုရဲ့ ဂိုးကန်သွင်းမှု ၁၈ ကြိမ်ထက် ပိုမိုကန်သွင်းနိုင်သူ ကစားသမား ၄ ယောက်သာရှိခဲ့ပြီး ရော်နယ်ဒိုရဲ့ ဂိုးကန်သွင်းမှု အရေအတွက်ဟာ လက်ရှိမှာ ၇ ဂိုးနဲ့ ဂိုးသွင်းအများဆုံး ပူးတွဲဖြစ်နေတဲ့ နော်ဝေတိုက်စစ်မှူး ဟာလန်းရဲ့ ဂိုးကန်သွင်းမှု အရေအတွက်နဲ့ တူညီနေပါတယ်။
ရော်နယ်ဒိုရဲ့ ယူနိုက်တက်အသင်းဖော်ဟောင်း ဝိန်းရူနီက “သူဟာ ပါရမီရှင်တယောက်၊ စူပါစတား တယောက်ပါ။ သူ ဘောလုံးလောကနဲ့ သန်းပေါင်းများစွာသော လူတွေအပေါ် ပေးဆပ်ခဲ့တာတွေဟာ တကယ့်ကို ရှားပါးလှပါတယ်။ သူ ဒီပြိုင်ပွဲကို အနိုင်ရမယ်လို့ ယုံကြည်ထားခဲ့တဲ့အတွက် စိတ်ပျက်မိမှာ သေချာပါတယ်။ ဒါပေမဲ့ အချိန်ဆိုတာ လူတိုင်းကို အိုမင်းရင့်ရော်စေတာပဲ။ ဒါဟာ ဘောလုံးလောကအတွက် ဝမ်းနည်းစရာ နေ့တနေ့ပါပဲ” လို့ ပြောကြားခဲ့ပါတယ်။
ပရိသတ်တယောက်က “ကျနော့်ရဲ့ အိပ်မက်တွေထဲက တခုက ရော်နယ်ဒို ကစားတာကို ကွင်းထဲမှာ ကိုယ်တိုင်ကြည့်ဖို့ပါ။ သူ့ကို မြင်ခွင့်ရခဲ့လို့ ဝမ်းသာပါတယ်။ သူဟာ ကျနော်တို့အတွက် အများကြီး အဓိပ္ပာယ်ရှိပါတယ်။ တကယ်ကို စိတ်လှုပ်ရှားမိပါတယ်။ ဒီတခေါက်တော့ ကျနော်တို့ ကံမကောင်းခဲ့ရုံပါ။ ရော်နယ်ဒို လုပ်ဆောင်ပေးခဲ့တာတွေက လှပလွန်းပါတယ်။ ကျနော်တို့ ငိုနေဖို့မလိုပါဘူး၊ သူ့ကို မြင်တွေ့ခွင့်ရခဲ့လို့ ရယ်မောပျော်ရွှင်ရမှာပါ” လို့ ပြောပါတယ်။
ရော်နယ်ဒိုကတော့ ပွဲအပြီး အချက်ပြ ဝီစီသံအပြီးမှာ ကစားသမားဘဝတလျှောက် ကမ္ဘာ့ဖလား ဆုဖလားကြီးကို ဆွတ်ခူးရယူဖို့ မျှော်လင့်ချက် အပြီးတိုင် ပျောက်ဆုံးသွားခဲ့ရရလို့ စိတ်လှုပ်ရှား ဝမ်းနည်းပက်လက် မျက်ရည်ကျခဲ့ရပါတယ်။
သူ့အနေနဲ့ ကမ္ဘာ့ဖလားမှာ ထပ်မံကစားတော့မှာ မဟုတ်ဘူးလို့ ဝန်ခံပြောကြားခဲ့ပေမဲ့ ပေါ်တူဂီနိုင်ငံ လက်ရွေးစင်အသင်းမှာ ဆက်လက်ကစားဖို့အတွက်တော့ စဉ်းစားဖို့ အချိန်လိုတယ်လို့ ပွဲအပြီးမှာ သူ့ရဲ့အနာဂတ်နဲ့ ပတ်သက်ပြီး မီဒီယာတွေကို ဖြေကြားခဲ့ပါတယ်။
စီရော်နယ်ဒိုက “ကမ္ဘာ့ဖလားပြိုင်ပွဲကနေ ဒီလိုမျိုး ထွက်ခွာခဲ့ရတဲ့အတွက် ဝမ်းနည်းမိပါတယ်။ ကျနော် အစွမ်းကုန် ပေးဆပ်ခဲ့ပါတယ်။ အကောင်းဆုံး ကြိုးစားခဲ့ပါတယ်။ ဟုတ်ပါတယ်၊ ဒါဟာ ကျနော့်ရဲ့ နောက်ဆုံးကမ္ဘာ့ဖလားပါပဲ။ ဒါပေမဲ့ အခုအချိန်မှာတော့ ကျနော့်အနေနဲ့ ပြန်လည်သုံးသပ်ဖို့နဲ့ မိသားစုနဲ့အတူ အချိန်ဖြုန်းဖို့ အချိန်ရပါလိမ့်မယ်။ အလောတကြီး ဆုံးဖြတ်ချက်တွေတော့ ချမှာမဟုတ်ပါဘူး။ စိတ်လှုပ်ရှားနေတဲ့ အရှိန်နဲ့ ဘာကိုမှ မဆုံးဖြတ်ပါဘူး။ လက်ရှိမှာ ကျနော် ဆက်ကစားမလား ဆိုတာက အရေးမကြီးသေးပါဘူး။ မနက်ဖြန်ကျရင်လည်း ကျနော် ဒီနေ့မနက် နိုးထလာသလိုမျိုးပဲ စိတ်ကြည်ကြည်လင်လင်နဲ့ နိုးထလာမှာပါ။ ကျနော် လက်ရွေးစင်အသင်းမှာ ၂၃ နှစ်ကြာ ကစားခဲ့ပြီး ဆုဖလား ၃ လုံး ဆွတ်ခူးနိုင်ခဲ့ပါတယ်။ ခရစ္စတီယာနို မတိုင်ခင်က ပေါ်တူဂီအသင်းဟာ ဘာဆုဖလားမှ မရဖူးပါဘူး။ ယူရိုဖလားဟာ အရေးအကြီးဆုံးပါပဲ။ ကျနော့်အတွက်တော့ ၂၀၁၆ ယူရိုဖလားဟာ ရိုးရိုးသားသား ပြောရရင် ကမ္ဘာ့ဖလားတခုစာလောက် အဓိပ္ပာယ်ရှိပါတယ်” လို့ ပြောသွားပါတယ်။
ပေါ်တူဂီအသင်းနည်းပြ ရိုဘတ်တို မာတီနက်ဇ်ကတော့ စပိန်အသင်းကို ရှုံးနိမ့်ပြီး ကမ္ဘာ့ဖလားမှ ထွက်ခွာခဲ့ရပြီးနောက် ရာထူးမှ နုတ်ထွက်မယ်လို့ အတည်ပြုပြောကြားလိုက်ပြီး ရော်နယ်ဒိုကို ချီးကျူးစကား ပြောကြားသွားပါတယ်။
“သူဟာ စံပြအသင်းခေါင်းဆောင်တဦး ဖြစ်ခဲ့တဲ့အတွက် ကျေးဇူးတင်စကား ပြောချင်ပါတယ်။ သွင်းဂိုးတွေတင် မကပါဘူး၊ (ကိန်းဂဏန်းအချက်အလက်တွေက သက်သေပြနေပါတယ်) ဂိုးဖန်တီးမှုတွေမှာလည်း သူ အားထုတ်ခဲ့ပါတယ်။ သူ့ရဲ့ နေ့စဉ် ပေးဆပ်မှုတွေ၊ ဘောလုံးအပေါ် ထားရှိတဲ့ စိတ်ဓာတ်တွေဟာ စံနမူနာယူစရာဖြစ်ပြီး ကျနော်တို့ ဂုဏ်ပြုရမယ့်အရာ ဖြစ်ပါတယ်။”
“ဒီကမ္ဘာ့ဖလားမှာ သူ ကြိုးစားအားထုတ်ခဲ့မှုတွေအတွက် ကျနော်တို့ အမြဲတမ်း ကျေးဇူးတင်နေမှာပါ။ ဘာလို့လဲဆိုတော့ အိပ်မက်က ကမ္ဘာ့ဖလားကို ရယူဖို့ဖြစ်ပြီး သူဟာ အသင်းခေါင်းဆောင်တဦးအနေနဲ့ မယုံနိုင်စရာကောင်းတဲ့ ဦးဆောင်မှု စံနမူနာပြပြီး ကြိုးစားခဲ့လို့ပါ။ အခုအချိန်ဟာ ဘောလုံးလောကရဲ့ ပြယုဂ်တခုထက် ကျော်လွန်ပြီး စဉ်းစားရမဲ့အချိန် မဟုတ်ပါဘူး။ ခရစ္စတီယာနို ရော်နယ်ဒိုလို လူမျိုးက အများကြီး ရှိတာမဟုတ်ပါဘူး” လို့ မာတီနက်ဇ်က ပြောပါတယ်။
နောင်ကျင်းပမဲ့ ကမ္ဘာ့ဖလားဘောလုံးပြိုင်ပွဲတွေမှာ စီရော်နယ်ဒိုကို သူ့ကိုချစ်တဲ့ ပရိသတ်တွေက မြင်တွေ့ရတော့မှာ မဟုတ်တော့သလို ပေါ်တူဂီ လက်ရွေးစင်အသင်းနဲ့အတူ ဆက်လက်မြင်တွေ့ရဖို့လည်း မရေရာ မသေချာတော့ပေမဲ့ အယ်လ်နာဆာကလပ် အသင်းမှာတော့ ကြယ်ပွင့်ကစားသမား တိုက်စစ်မှူး ရော်နယ်ဒိုတယောက် မြက်ခင်းပြင်ပေါ်မှာ ပြေးလွှားကစားနေတာကို သူ့ရဲ့ပရိသတ်တွေက အချိန်ကာလ အတိုင်းအတာတခုအထိ ဆက်လက်မြင်တွေ့ရဖို့ အခွင့်အရေး ရှိနေဆဲ ဖြစ်ပါတယ်။
Source: BBC Sport/ SkySports
