ပဲခူးတိုင်း၊ ပေါင်းတည်အကျဉ်းထောင်မှာ စစ်အာဏာရှင်တပ်က ဖမ်းဆီးထားတဲ့ သက်ကြီး နိုင်ငံရေးအကျဉ်းသား ဦးထွန်းမြင့်ဟာ ထောင်တွင်း ဆေးဝါးစောင့်ရှောက်မှု မလုံလောက်တာကြောင့် ဇူလိုင် ၁၂ ရက်မှာ ကွယ်လွန်သွားတယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က ထုတ်ပြန်ပါတယ်။
အသက် ၇၂ နှစ်အရွယ် တောင်သူလုပ်ငန်းလုပ်ကိုင်သူ ဦးထွန်းမြင့်ဟာ စစ်တပ် အာဏာသိမ်းပြီးနောက် PDF တွေကို ထောက်ပံ့တယ်ဆိုတဲ့ စွပ်စွဲချက်နဲ့ ဖမ်းဆီးခံခဲ့ရပြီး ၂၀၂၂ ခုနှစ် နိုဝင်ဘာလမှာ အကြမ်းဖက်မှုတိုက်ဖျက်ရေးဥပဒေပုဒ်မ ၅၀ (ဈ) နဲ့ ထောင်ဒဏ် ၁၀ နှစ် ချမှတ်ခံခဲ့ရတာပါ။
အရင်က ကျန်းမာသန်စွမ်းခဲ့သူဖြစ်ပေမဲ့ ထောင်တွင်းမှာ ရောဂါဝေဒနာ ခံစားခဲ့ရတာဖြစ်ပြီး ဇူလိုင် ၇ ရက်က ထောင်တွင်းမှာ သတိလစ်လဲကျခဲ့ကာ ခန္ဓာကိုယ်ညာဘက်တခြမ်း လေဖြတ်ဝေဒနာ ပြင်းထန်စွာခံစားရပြီးနောက် ကွယ်လွန်ခဲ့တာလို့ PPNM က ထုတ်ပြန်ပါတယ်။
နိုင်ငံရေးအကျဉ်းသားတွေအပေါ် ကျန်းမာရေးစောင့်ရှောက်မှုပေးဖို့ ပျက်ကွက်ပြီး လူ့အခွင့်အရေးတွေကို ပြင်းပြင်းထန်ထန် ချိုးဖောက်ခဲ့တဲ့ စစ်အာဏာရှင် ပြည်ထဲရေးဝန်ကြီးဌာနနဲ့ အကျဉ်းဦးစီးဌာနတို့ရဲ့ လုပ်ရပ်တွေအပေါ် PPNM အနေနဲ့ ပြင်းထန်စွာ ကန့်ကွက်ရှုတ်ချတယ်လို့ ထုတ်ပြန်ထားပါတယ်။
