ဗင်နီဇွဲလားကို ၄၈ မိနစ်ကြာ စစ်ပွဲဆင်နွှဲပြီးနောက် စစ်ရေးစရိတ် ၂၈ ဆလောက် တန်ကြေးရှိတဲ့ ရေနံတွေ ထုတ်ယူပြီးပြီလို့ အမေရိကန်သမ္မတ ဒေါ်နယ်ထရမ့်ပ်က ပြောပါတယ်။
ပင်ဆယ်ဗေးနီးယားပြည်နယ်၊ မာကွန်ဂျီမှာ ပြုလုပ်တဲ့ လူထုစည်းဝေးပွဲမှာ ထရမ့်ပ်က အခုလို ပြောခဲ့တာပါ။
ထရမ့်ပ်က “ကျနော်တို့ ရေနံစည်တွေ သန်းနဲ့ချီပြီး ရရှိခဲ့ပါတယ်။ ဗင်နီဇွဲလားနိုင်ငံကလည်း သူတို့နိုင်ငံရဲ့ သမိုင်းတလျှောက် မရဘူးတဲ့ငွေတွေ ရရှိခဲ့ပါတယ်။ ကျနော်တို့ ပိုက်ဆံတွေ အများကြီး ရှာနိုင်ခဲ့တာပေါ့” လို့ ပြောဆိုခဲ့တာပါ။
အမေရိကန်မှာ အကောင်းဆုံးစစ်တပ်ရှိလို့ ၄၈ မိနစ်အတွင်း စစ်ဆင်ရေး အောင်မြင်ခဲ့တာလို့ ထရမ့်ပ်က ပြောပါတယ်။
ဗင်နီဇွဲလားနိုင်ငံအောက်မှာ ရေနံတွေ အများကြီးရှိပြီး ရေနံတူးတဲ့အထဲမှာ အမေရိကန်ကလူတွေ ပါဝင်နေပါတယ်။
ထရမ့်ပ်က “ဗင်နီဇွဲလားဟာ လက်ရှိအချိန်မှာ ရေနံကနေရတဲ့ ပိုက်ဆံတွေကြောင့် ပျော်နေကြပါတယ်။ သူတို့မှာ ရေနံတွေရှိပေမဲ့ ဘယ်လိုလုပ်ရမှန်း မသိခဲ့ပါဘူး။ အဲဒါ မကောင်းတဲ့စနစ်တွေကြောင့် ဖြစ်ပြီး အခုအချိန်မှာ အရင်ကထက် ငွေတွေ အများကြီးရှာနိုင်ပြီ ဖြစ်တယ်” လို့ ပြောခဲ့တာပါ။
အမေရိကန်ဟာ သမ္မတ မာဒူရိုကို ဖမ်းဆီးခဲ့ပြီးနောက် ယာယီသမ္မတ ရိုဒရီဂွတ်ဇ်နဲ့ ရေနံ၊ သတ္တုဖွံ့ဖြိုးရေးတွေ ပူးပေါင်းဆောင်ရွက်နေပါတယ်။
