ဧရာဝတီတိုင်း ရေကြည်မြို့နယ်မှာ တော်လှန်ရေးတပ်တွေအတွက် စက်သုံးဆီရောင်းချတယ်လို့  စွပ်စွဲပြီး အရပ်သား ၂ ယောက်ကို စစ်အာဏာရှင်တပ်နဲ့ ရဲတွေက ဖမ်းဆီးလိုက်တယ်လို့ ဒေသခံတွေဆီကနေ သိရပါတယ်။

သြဂုတ် ၂၅ ရက် ညနေက ရေကြည်မြို့နယ် မြောက်စမ်းကျေးရွာက တနိုင်တပိုင် စက်သုံးဆီ ရောင်းချနေတဲ့ ဒေသခံ အရပ်သား ၂ ယောက်ကို စစ်အာဏာရှင်တပ်နဲ့ ရဲတွေက တော်လှန်ရေးတပ်တွေဆီ စက်သုံးဆီတွေ ရောင်းချမှုနဲ့ ဖမ်းဆီးခဲ့တာလို့ သိရပါတယ်။

ဒေသခံအရပ်သားတယောက်က “စက်သုံးဆီရောင်းတဲ့သူတွေကို PDF တွေကို ဆီရောင်းပေးတယ် ဆိုပြီး ဖမ်းသွားတာ။ အိမ်တွေမှာ လာဖမ်းသွားတာ။ တပ်နဲ့ ရဲတွေကဖမ်းတာ” လို့ ပြောပါတယ်။

စစ်အာဏာရှင်တပ်နဲ့ ရဲတွေက ဖမ်းဆီးခဲ့တဲ့ အရပ်သား ၂ ယောက်ဟာ အသက် ၃၀ ကျော်အရွယ် ကိုဇော်ဝင်းနဲ့ အသက် ၄၀ ခန့်အရွယ် ကိုမင်းမင်းထွန်းတို့ ဖြစ်ပြီး ဘယ်ကိုဖမ်းသွားလဲ ဆိုတာတော့ မသိရသေးပါဘူး။

ရေကြည်မြို့နယ် စစ်အာဏာရှင် အုပ်ချုပ်ရေးအဖွဲ့နဲ့ နီးစပ်သူတယောက်က “ငွေညှစ်ချင်တာကြောင့် ဖမ်းတာလို့ပဲ ထင်တယ်။ တပ်နဲ့ ရဲက ဖမ်းတယ်ဆိုတာ ဟုတ်တယ်။ ဘယ်မှာဖမ်းထားလဲ မပြောတတ်သေးဘူး” လို့ ပြောပါတယ်။

ဖမ်းဆီးခံရသူ ၂ ယောက်ဟာ တော်လှန်ရေးတပ်တွေဆီကို ဆီရောင်းချပေးတာမျိုးမရှိဘဲ ရေဘေးဒုက္ခသည်တွေကို အဓိကထားပြီး စက်သုံးဆီ ရောင်းချပေးနေသူ ဖြစ်တယ်လို့ ဒေသခံတွေဆီက သိရပါတယ်။

ရေကြည်မြို့နယ်က စက်သုံးဆီအရောင်းဆိုင်ကြီးတွေမှာ ဆီမှောင်ခိုရောင်းချတာတွေ၊ ဈေးနှုန်းမြှင့်တင် ရောင်းချတာတွေ၊ ဆီတကယ်လိုအပ်တဲ့ ပရဟိတသမားတွေ၊ ရေဘေးဒုက္ခသည်တွေ၊ ကူညီကယ်ဆယ်ရေးအဖွဲ့တွေဟာ ဆီမရတာရှိပေမဲ့ စစ်အာဏာရှင် လက်အောက်ခံအဖွဲ့တွေက မြေပြင်မှာ စစ်ဆေးအရေးယူတာ မရှိဘူးလို့ ဒေသခံတွေက ဆိုပါတယ်။