တူရကီနိုင်ငံ အရှေ့တောင်ပိုင်းက အလယ်တန်းကျောင်းတကျောင်းမှာ ဧပြီ ၁၅ ရက်က အသက် ၁၄ နှစ်အရွယ် ကျောင်းသားတယောက်က အတန်းဖော် ၈ ယောက် အပါအဝင် လူ ၉ ယောက်ထက်မနည်းကို ပစ်ခတ်ခဲ့ပြီး ၁၃ ယောက် ဒဏ်ရာရခဲ့တယ်လို့ အရာရှိတွေက ပြောပါတယ်။
ဒါဟာ တူရကီနိုင်ငံမှာ ၂ ရက်အတွင်း ဒုတိယအကြိမ်မြောက် ကျောင်းပစ်ခတ်မှု ဖြစ်ပါတယ်။ ကာရာမန် မာရာစ်ပြည်နယ်မှာ ဖြစ်ခဲ့တဲ့ တိုက်ခိုက်မှုမှာ ကျောင်းသား ၈ ယောက်နဲ့ ဆရာတယောက် သေဆုံးခဲ့တယ်လို့ တူရကီပြည်ထဲရေးဝန်ကြီး မူစတာဖာ စစ်ဖ်တီက သတင်းထောက်တွေကို ပြောပါတယ်။
ဒဏ်ရာရသူ ၆ ယောက်ကို အထူးကြပ်မတ်ကုသဆောင်မှာ ကုသပေးနေပြီး ၃ ယောက်ကတော့ စိုးရိမ်ရတဲ့ အခြေအနေမှာ ရှိနေတယ်လို့ ထပ်ပြောခဲ့ပါတယ်။
သေနတ်သမားဟာ ရုန်းရင်းဆန်ခတ်မှုတွေအတွင်း ကိုယ့်ကိုယ်ကိုယ် ပစ်ခတ်ပြီး အဆုံးစီရင်ခဲ့တယ်လို့ ပြည်နယ်အုပ်ချုပ်ရေးမှူး မူကာရမ် အန်လူယာက အစောပိုင်းမှာ ပြောပါတယ်။
သေနတ်သမားမှာ သေနတ် ၅ လက်နဲ့ ကျည်ကတ် ၇ ခုရှိတယ်လို့ သူက ထပ်ပြောပါတယ်။ ဒီလက်နက်တွေဟာ သူ့အဖေ ရဲအရာရှိဟောင်း ပိုင်တယ်လို့ ယုံကြည်ကြပါတယ်။
ကျောင်းပစ်ခတ်မှုတွေဟာ တူရကီမှာ အလွန်ရှားပါတယ်။ သေနတ်သမားရဲ့ အဖေကို ဖမ်းထားတယ်လို့ NTV ရုပ်သံလိုင်းက ပြောပါတယ်။
အသက် ၂၁ နှစ်ကျော်ပြီး လိုင်စင်ရှိသူတွေကိုသာ လက်နက်ကိုင်ဆောင်ခွင့်ပြုတဲ့ တူရကီမှာ သေနတ်သမားအတွက် ဥပဒေတွေဟာ ယေဘုယျအားဖြင့် တင်းကျပ်ပါတယ်။
ဒါပေမဲ့ တူရကီမှာ သေနတ်တွေ ကျယ်ကျယ်ပြန့်ပြန့် ရှိနေပြီး လုံခြုံရေးအရာရှိ အများအပြားကို လက်နက်ကိုင်ဆောင်ခွင့်နဲ့ ပိုင်ဆိုင်ခွင့် ပြုထားပါတယ်။
ဧပြီ ၁၄ ရက်ကလည်း ကျောင်းသားဟောင်းတယောက်က တူရကီ အရှေ့တောင်ပိုင်းမှာရှိတဲ့ ဆန်လျိုဖာ ပြည်နယ်က ကျောင်းတကျောင်းမှာ ပစ်ခတ်ခဲ့ပြီး ကျောင်းသားတွေနဲ့ ဆရာတွေ အပါအဝင် လူ ၁၆ ယောက်ထက်မနည်း ဒဏ်ရာရခဲ့ပါတယ်။
Source: Reuters
