ယူကရိန်းမှာ အသုံးပြုနေတဲ့ Starlink နဲ့ Starshield ဂြိုဟ်တုလိုင်းတွေ နှေးကွေးသွားတယ်ဆိုတဲ့ ကိစ္စမှာ သူပါဝင်ပတ်သက်မှု မရှိဘူးလို့ အမေရိကန်သမ္မတ ဒေါ်နယ်ထရမ့်ပ်က အောက်တိုဘာ ၂၁ ရက်က ဝါရှင်တန်မှာ ပြုလုပ်တဲ့ သတင်းစာရှင်းလင်းပွဲမှာ ငြင်းဆိုလိုက်ပါတယ်။
အီလွန်မတ်စ်ခ်က သူ့သဘောနဲ့သူ လိုင်းလျှော့ပစ်ဖို့ အမိန့်ပေးခဲ့တာလား ဆိုပြီး သတင်းထောက်တွေက မေးမြန်းချိန်မှာ ထရမ့်ပ်က “ဘယ်သူလုပ်လဲတော့ ကျနော် မသိဘူး၊ ဒါပေမဲ့ ကျနော် လုံးဝ မပတ်သက်ပါဘူး” လို့ ပြန်ဖြေခဲ့တာပါ။
ဒါ့အပြင် ထရမ့်ပ်က “ကျနော်တို့ အခု ယူကရိန်းကိစ္စနဲ့ ပတ်သက်ပြီး ရုရှားနဲ့ ညှိနှိုင်းနေပါတယ်။ အချိန်အတော်ကြာမှ ပထမဆုံးအကြိမ်အဖြစ် သဘောတူညီချက်ရဖို့ နီးစပ်နေတာမျိုးလည်း ဖြစ်နိုင်ပါတယ်။ ခုလို သဘောတူညီချက်ရဖို့ နီးစပ်နေချိန်၊ သိမ်မွေ့တဲ့ ဆွေးနွေးမှုတွေ လုပ်နေချိန်မှာတော့ ဒဏ်ခတ်ပိတ်ဆို့မှုတွေ လုပ်လေ့မရှိပါဘူး” လို့လည်း ပြောပါတယ်။
ရုရှားရဲ့ ဒုံးကျည်ရန်ကနေ ကာကွယ်ဖို့ ယူကရိန်း အဓိက အားကိုးအားထားပြုနေရတဲ့ စစ်ဘက်သုံး Starlink လိုင်းတွေကို နှေးကွေးအောင်လုပ်ဖို့ အီလွန်မတ်စ်ခ်က အမိန့်ပေးခဲ့တယ်လို့ The Wall Street Journal သတင်းစာက ဖော်ပြခဲ့တာပါ။
အမေရိကန် နိုင်ငံခြားရေးဝန်ကြီး မာကို ရူဘီအို ကတော့ ယူကရိန်း အသုံးပြုနေတဲ့ Starlink လိုင်းကိစ္စဟာ အိမ်ဖြူတော်နဲ့ မဆိုင်ဘဲ မိခင်ကုမ္ပဏီဖြစ်တဲ့ SpaceX နဲ့ အီလွန်မတ်စ်ခ်တို့အပေါ်မှာပဲ မူတည်တယ်လို့ ပြောဆိုခဲ့တာကြောင့် မတ်စ်ခ်ကိုယ်တိုင်ပဲ ကိယက်ဗ်ရဲ့ လိုင်းအသုံးပြုမှုကို ကန့်သတ်လိုက်တာ ဖြစ်နိုင်ကြောင်း ညွှန်းဆိုနေပါတယ်။
Source: Reuters
