ဟော်မုဇ်ရေလက်ကြားကနေ သင်္ဘောတွေ သွားလာခွင့်ပြုမယ်ဆိုရင် အဆိုပြုထားတဲ့ နှစ်ဖက်အပစ်ရပ်စဲရေးကို သဘောတူတယ်လို့ အမေရိကန်သမ္မတ ဒေါ်နယ်ထရမ့်ပ်က ကြေညာပါတယ်။ 

အီရန်နိုင်ငံခြားရေးဝန်ကြီး ဆာယက်အဘားစ်အာရက်ဂ်ချီကလည်း "အီရန်အပေါ် တိုက်ခိုက်မှုတွေ ရပ်တန့်မယ်ဆိုရင်တိုက်ပွဲအဆုံးသတ်ဖို့ သဘောတူတယ်”လို့ အတည်ပြုပြီး အစ္စရေးကလည်း အပစ်ရပ်ဖို့ လက်ခံထားပါတယ်။

ဧပြီ ၇ ရက် အရှေ့ပိုင်းစံတော်ချိန် ည ၈ နာရီမှာ သဘောတူညီချက်မရရင် ယဉ်ကျေးမှု လူ့အဖွဲ့အစည်း (civilization) တခုလုံး သေဆုံးရလိမ့်မယ်လို့ ထရမ့်ပ်က ခြိမ်းခြောက်ထားပါတယ်။

ကြားဝင်ညှိနှိုင်းပေးတဲ့ ပါကစ္စတန်က နောက်ဆုံးသတ်မှတ်ရက်ကို နောက်ထပ် ၂ ပတ် တိုးမြှင့်ဖို့နဲ့ ဧပြီ ၁၀ ရက်က အစ္စလာမ်မာဘတ်မြို့မှာ နှစ်ဖက်ဆွေးနွေးကြဖို့ ဖိတ်ကြားထားပါတယ်။ ဆွေးနွေးပွဲစတင်မဲ့ရက်ကို အီရန်က အတည်ပြုပေမဲ့ အမေရိကန်ဘက်ကတော့ အတည်မပြုသေးပါဘူး။

အမေရိကန်ရဲ့ စစ်ရေးရည်မှန်းချက်တွေ ပြည့်မီကျော်လွန်သွားပြီဖြစ်လို့ အခုလို အပစ်ရပ်ဖို့ သဘောတူတာလို့ ထရမ့်ပ်က ဆိုပါတယ်။

အီရန်ရဲ့ အချက် ၁၀ ချက်ပါ ငြိမ်းချမ်းရေးအဆိုပြုချက်ဟာ ဆွေးနွေးဖို့ အလုပ်ဖြစ်နိုင်တယ်လို့ သူကပြောပြီး ၂ ပတ်သတ်မှတ်ချိန်မှာ သဘောတူညီချက် အပြီးသတ်ဖို့ မျှော်လင့်တယ်လို့ ဆိုပါတယ်။ 

အဲဒီအဆိုပြုချက်ထဲမှာ ပိတ်ဆို့မှုတွေရုပ်သိမ်းရေး၊ အီရန်အတွက် နစ်နာကြေးပေးရေးနဲ့ ဒေသတွင်းက အမေရိကန်တပ်တွေ ရုပ်သိမ်းရေးတို့ ပါဝင်ပါတယ်။

အစောပိုင်းကတော့ လုံခြုံရေးအရ ရထားမစီးကြဖို့ အစ္စရေးက သတိပေးပြီးနောက် အီရန်နိုင်ငံ ကာရှန်မြို့က တံတားတစင်း တိုက်ခိုက်ခံရလို့ လူ ၂ ယောက် သေဆုံးခဲ့ကြောင်း အီရန်မီဒီယာတွေက ဖော်ပြပါတယ်။

ဒီအပစ်ရပ်သတင်းကြောင့် ကမ္ဘာ့ရေနံစျေးတွေလည်း သိသိသာသာ ပြန်လည်ကျဆင်းလာပါတယ်။

Source: Reuters