ကချင်ပြည်နယ် တနိုင်းမြို့နယ် နောင်လုံကောင်ရာရွာမှာ စစ်အာဏာရှင်တပ် လက်အောက်ခံ မင်းဇေသန့် ပြည်သူ့စစ်​တွေက အရပ်သားတယောက်ကိုသတ်ပြီး တယောက်ကို ဖမ်းဆီးသွားတယ်လို့ ​ဒေသခံ​တွေဆီက သိရပါတယ်။

စက်တင်ဘာ ၁၃ ရက်က နောင်လုံကောင်ရာရွာက ဦးလကွယ် ​​နေအိမ်မှာ ​ဒေသခံ​တွေ အစည်းအ​ဝေးလုပ်​နေချိန် မင်း​ဇေသန့် ပြည်သူ့စစ်​တွေက ဝင်​​ရောက်ပစ်ခတ်တာလို့ ဆိုပါတယ်။

​​ဒေသခံတ​ယောက်က “မနက် ၁၀ နာရီ​လောက်မှာ နောင်လုံကောင်ရာရွာမှာ အစည်းအဝေး လုပ်နေကြတာကို မင်ဇေသန့်အဖွဲ့​တွေ ရောက်လာပြီး ဦးထိန်နန်ဇော်ကို ဖမ်းသွားကြတယ်။ အစည်းအဝေးလုပ်ဖို့ လက်ခံခဲ့တဲ့ အိမ်ရှင်ကို သတ်လိုက်တယ်” လို့ DVB ကို ​ပြောပါတယ်။

ကျေးရွာမှာ အစည်းအဝေးပြုလုပ်နေချိန် ဇန်ပူတောင် စစ်ဆေးရေးဂိတ်မှာ တပ်စွဲထားတဲ့ မင်းဇေသန့် ပြည်သူ့စစ်အဖွဲ့တွေ​ ​ရောက်လာပြီး အိမ်ရှင် အသက် ၅၉ နှစ်အရွယ် ဦးလကွယ်ကို ပစ်သတ်ပြီး​တော့ ဦးထိန်နန်​ဇော်ကို ဖမ်းဆီးသွားတာလို့ ဆိုပါတယ်။

မင်ဇေသန့် ဦးဆောင်တဲ့ ဝါရာဇွပ် ပြည်သူ့စစ်အဖွဲ့နဲ့ စစ်တပ်ဟာ အဲဒီဒေသတဝိုက်မှာ စစ်ဆေးတာ၊ လမ်းပိုင်းပိတ်ဆို့တာနဲ့ လူငယ်​တွေကို ပစ်မှတ်ထား ဖမ်းဆီးတာ​တွေ လုပ်နေတာကြောင့် တနိုင်း-မြစ်ကြီးနား လီဒိုလမ်းမပေါ်က နောင်းမီ၊ ဝါရာဇွပ်၊ ရှဒူးဇွပ်၊ ကောင်ရာ တဝိုက်မှာ ဒေသခံ​တွေ လုံခြုံ​​ရေးစိုးရိမ်ရလို့ အပြင်ထွက်ဖို့​တောင် ခက်ခဲ​နေကြတယ်လို့ ဆိုပါတယ်။

ဖမ်းဆီးခံရသူ​တွေ သတ်ဖြတ်ခံရတဲ့ဖြစ်စဉ်​တွေ ရှိနေပြီး ဒေသခံ​တွေဟာ KIA အုပ်ချုပ်ရေးအဖွဲ့​တွေ၊ လက်နက်ကိုင်တပ်ဖွဲ့​တွေနဲ့ ပတ်သက်မိရင် အိမ်ရှင်​တွေပါ အရေးယူ ပစ်ခတ်ခံရတဲ့ အခြေအနေ​တွေ​ကြောင့် စိုးရိမ်နေကြရပါတယ်။