ကချင်ပြည်နယ်၊ ဖားကန့်မြို့နယ်၊ မှော်ဝမ်းလေးကျေးရွာမှာ ရုပ်အ​လောင်း ၂၅ ​လောင်းကို သြဂုတ် ၂၄ ရက်မှာ ​တွေ့ရှိတယ်လို့ ​ဒေသခံ​တွေဆီက သိရပါတယ်။

ဖားကန့်မြို့နယ် မှော်ဝမ်းလေးကျေးရွာက ​ဒေသခံ​တွေဟာ တနှစ်ကျော်ကြာ စစ်ရှောင်ပြီးနောက် ပြန်လာ​နေထိုင်ဖို့ ရွာသန့်ရှင်း​ရေးလုပ်ချိန်မှာ ရုပ်အ​လောင်း ၂၅ ​လောင်းကို ​တွေ့ရှိခဲ့တာလို့ ဆို ပါတယ်။

​ဒေသခံတ​ယောက်က “စစ်တပ်ဘက်က တပ်စွဲ​နေခဲ့တာ။ သူတို့ အခုပြန်ဆုတ်သွားပြီး ​ဒေသခံ​တွေကို ပြန်​နေထိုင်ခွင့်ပြုတာ ပြီးခဲ့တဲ့တပတ်က။ အခု ​ဒေသခံ​တွေက ရွာရှင်းလင်း​ရေးလုပ်​တော့ အ​လောင်း ​တွေ မြှုပ်ထားတာကို ​တွေ့ကြတာ။ ​ဒေသခံ​တွေလည်း ပါနိုင်သလို သူတို့ရဲ့ ​သေဆုံးတပ်သား အ​လောင်း​တွေလည်း ပါနိုင်တယ်” လို့ DVB ကို ​ပြောပါတယ်။

စစ်တပ်နဲ့ ကချင်လွတ်လပ်​ရေးတပ်မ​တော် (KIA) တို့ဟာ ဖားကန့်​ဒေသမှာ တိုက်ပွဲ​တွေ ပြင်းထန် ခဲ့တာဖြစ်ပြီး စစ်တပ်ဟာ ​မှော်ဝမ်း​လေး၊ ​မှော်ဝမ်းကြီး ရွာ​တို့မှာ တပ်စွဲ​နေထိုင်ခဲ့တာလို့ သိရပါတယ်။

​ဒေသခံတ​ယောက်က “သူတို့က အဲဒီမှာ တပ်စွဲခဲ့တာဗျ။ အခုက သူတို့ တပ်ပြန်ဆုတ်သွား​​တော့ ရွာသူရွာသား​တွေကို ပြန်​နေထိုင်ခွင့်ပြုတာ​ပေါ့​နော်။ ပြန်လာတဲ့ရွာသား​တွေ ရွာဥက္ကဋ္ဌကို စာရင်း​ပေး​ပေါ့။ ပြီးရင် နှစ်ဖက်အဖွဲ့အစည်းကို စာရင်းပြန်ပို့​ပေါ့။ နားလည်မှုနဲ့ ပြန်လာ​နေကြတာ။ ​အ​လောင်း​တွေထဲမှာ ပြည်သူ့စစ်အ​လောင်း​တွေလည်း ဖြစ်နိုင်တယ်” လို့ ​ပြောပါတယ်။

တူးဖော်တွေ့ရှိထားတဲ့ ရုပ်အလောင်း ၂၅ လောင်းဟာ အဲဒီရွာက ​ဒေသခံ​တွေ ဟုတ်၊ မဟုတ်နဲ့ ဘယ်သူ​တွေ ဆိုတာကို​ မသိရ​သေးလို့ စုံစမ်း​နေဆဲဖြစ်တယ်လို့ သိရပါတယ်။

အဲဒီ မှော်ဝမ်းကလေးကျေးရွာကို စစ်တပ်နဲ့ ဝါရာဇွပ်ပြည်သူ့စစ်တပ်ဖွဲ့၊ SNA ပြည်သူ့စစ် တပ်ဖွဲ့ဝင် ​တွေ စစ်ကြောင်းထိုး ဝင်ရောက်လာပြီး အရပ်သားနေအိမ် အလုံး ၆၀ ​ကျော်ကို မီးရှို့ဖျက်ဆီးပြီး တပ်စွဲ​နေခဲ့တာ ဖြစ်ပါတယ်။