စစ်အာဏာရှင်တပ်က ဖမ်းဆီးသွားတဲ့ The Ants (Humanitarian Aid Team-Tanintharyi) အရပ်ဘက်အဖွဲ့အစည်းဝင် ၃ ယောက်နဲ့ အရပ်သားတယောက် သတ်ဖြတ်ခံရတယ်လို့ MAGGA Initiative ဆီက သိရပါတယ်။

ဇူလိုင် ၇ ရက်က ထား၀ယ်အထူးစီးပွားရေးဇုန်က ကျေးရွာ​တွေကို အင်အားအလုံးအရင်းနဲ့ စစ်ကြောင်းထိုးလာတဲ့ စစ်တပ်​ကြောင့် တိမ်း​ရှောင်ကြတဲ့ The Ants (Humanitarian Aid Team-Tanintharyi) အဖွဲ့ဝင် ၃ ယောက်ဟာ စစ်​ကြောင်းနဲ့တိုးပြီး ဖမ်းဆီးသတ်ဖြတ်ခံရတာပါ။

MAGGA Initiative ရဲ့ တာဝန်ရှိသူတ​ယောက်က “အဲဒီနယ်မြေက ရပ်ရွာပြည်သူ​တွေ နီးစပ်ရာ ကျေးရွာ​တွေကို စစ်ရှောင်ကြတာ။ The Ants (Humanitarian Aid Team-Tanintharyi) အဖွဲ့ဝင် ကိုအသာ၊ ကိုမြတ်သူ၊ ကိုလီယို တို့လည်း နတ်တွင်းကျေးရွာဘက် ထွက်ကြတာ ဇူလိုင် ၉ ရက်နေ့မှာ စစ်တပ်နဲ့တွေ့ပြီး ကားသမားအပါ တခြားခရီးသည်​တွေနဲ့ ဖမ်းဆီးခံလိုက်ရတယ်” လို့ DVB ကို ​​ပြောပါတယ်။

ဖမ်းဆီးခံရသူ​တွေထဲက အမျိုးသမီး​တွေကို စစ်တပ်က ပြန်လည်လွှတ်ပေးခဲ့ပြီး ကိုအသာ၊ ကိုမြတ်သူ၊ ကိုလီယို တို့ ၃ ယောက်ကို​​တော့ ခမောင်းချောင်းဘုန်းကြီးကျောင်းမှာ ဖမ်းဆီးထားခဲ့တာလို့ ဆိုပါတယ်။

အဲဒီ​နောက် အနီးတ၀ိုက် ကျေးရွာ​တွေကို စစ်ကြောင်းထိုးတာ၊ အရပ်သား နေအိမ်​တွေကို မီးရှို့တာ​တွေ လုပ်ပြီး ကိုအသာ၊ ကိုမြတ်သူ၊ ကိုလီယိုတို့ ၃ ယောက်ကို လူသားဒိုင်းအဖြစ် ဆက်လက် ဖမ်းဆီးခေါ်ဆောင်သွားတယ်လို့ ဆိုပါတယ်။

ဇူလိုင် ၂၀ ရက် မနက်မှာ​တော့ စစ်ကြောင်းထိုးခံရတဲ့ ကျေးရွာအနီးတ၀ိုက်ကို လိုက်လံရှာဖွေတာမှာ နဘုလယ်ဒေသ ဧကနိကျေးရွာမှာ သူတို့ ၃ ယောက်ရဲ့ ပုပ်ဆွေးပျက်စီး​နေတဲ့ အ​​လောင်း​တွေကို ရှာ​ဖွေ​တွေ့ရှိခဲ့တယ်လို့ သိရပါတယ်။

သူတို့နဲ့အတူ အသတ်ခံရတဲ့ အရပ်သားကို​တော့ ဘယ်သူဘယ်ဝါဖြစ်တယ် ဆိုတာကို မသိရ​သေးဘူးလို့ ဆိုပါတယ်။

MAGGA Initiative ရဲ့ တာဝန်ရှိသူတ​ယောက်က “တွေ့ရှိတဲ့အချိန်မှာ ပုပ်ဆွေး​နေပြီ။ လွန်ခဲ့တဲ့ ၄၊ ၅ ရက်ခန့်က အသတ်ခံခဲ့ရတယ်လို့ ခန့်မှန်းရပါတယ်။ ရပ်ရွာတာ၀န်ခံ​တွေက​တော့ မနေ့က ဇူလိုင် ၂၀ ရက်နေ့ ညနေမှာ သက်ဆိုင်ရာ ကျေးရွာမှာပဲ မီးသင်္ဂြိုဟ်ပြီးစီးခဲ့တယ်” လို့ ​ပြောပါတယ်။

The Ants (Humanitarian Aid Team-Tanintharyi) အရပ်ဘက်အဖွဲ့​ဟာ တနင်္သာရီတိုင်း ပဋိပက္ခသက်ရောက်ရာ ဒေသ​တွေက ပြည်သူ​တွေ၊ ပဋိပက္ခကြောင့် ဖြစ်ပေါ်လာတဲ့ ဘေးဒုက္ခ​တွေ လျော့ပါးရေးနဲ့ ကြံ့ကြံ့ခံနိုင်စွမ်း တိုးမြင့်လာစေရေး​တွေမှာ အထောက်အကူပြုဖို့ ရည်ရွယ်ပြီး ၂၀၂၃ ခုနှစ်၊ အောက်တိုဘာ ၁ ရက်မှာ စတင်ဖွဲ့စည်းခဲ့တာ ဖြစ်ပါတယ်။

လက်ရှိ တနင်္သာရီတိုင်း၊ ထားဝယ်ခရိုင်မှာ လူသားချင်းစာနာ ထောက်ထားမှုဆိုင်ရာ အကူအညီပေးရေးနဲ့ ပညာရေးဆိုင်ရာ အထောက်အကူပြုလုပ်ငန်း​တွေကို ဆောင်ရွက်​နေတာ ဖြစ်ပါတယ်။

The Ants (Humanitarian Aid Team-Tanintharyi) အဖွဲ့၀င် လူငယ်​တွေဟာ MAGGA Initiative ရဲ့ ဒီမိုကရေစီနဲ့ နိုင်ငံသားပညာရေး သင်တန်းအစီအစဥ် ၂၀၂၄ ရဲ့ သင်တန်းသား၊ သင်တန်းသူ​တွေ ဖြစ်ပြီး ထား၀ယ်ဒေသရဲ့ ကြားကာလပညာရေး၊ လူသားချင်းစာနာမှု အကူအညီပေးရေး လုပ်ငန်း​တွေကို လက်တွဲလုပ်ဆောင်နေတဲ့ အရပ်သား စေတနာ့ဝန်ထမ်း လူငယ်​တွေ ဖြစ်ပါတယ်။