ကမ္ဘာ့အပူဆုံးမြို့တွေထဲမှာ မြန်မာနိုင်ငံက မြို့ ၅ မြို့ပါဝင်လာပြီး မင်းဘူးမြို့ဟာ မတ် ၃၁ ရက် ညနေပိုင်းက ကမ္ဘာ့အပူချိန်အမြင့်ဆုံးမြို့အဖြစ် မှတ်တမ်းဝင်ခဲ့ပါတယ်။
ကမ္ဘာတဝန်းလုံးရဲ့ မိုးလေဝသအခြေအနေတွေကို အသေးစိတ်ဖော်ပြပေးနေတဲ့ အမေရိကန်အခြေစိုက် Eldorado Weather ဝက်ဘ်ဆိုက်ရဲ့ အပူချိန်အမြင့်ဆုံး ၁၅ မြို့စာရင်းမှာ မတ် ၃၁ ရက် နေ့လယ်ပိုင်းက မြန်မာနိုင်ငံရဲ့ မြို့ ၄ မြို့ပါဝင်နေခဲ့တာပါ။
နေ့လယ် ၁ နာရီခွဲအချိန်မှာ မင်းဘူးမြို့က အပူချိန် ၄၂ ဒသမ ၂ ဒီဂရီ စင်တီဂရိတ်နဲ့ နံပါတ် ၂ နေရာမှာ ရှိပြီး တောင်ငူမြို့က ၄၁ ဒသမ ၃ ဒီဂရီနဲ့ နံပါတ် ၉၊ မကွေးမြို့က ၄၁ ဒီဂရီနဲ့ နံပါတ် ၁၁၊ ပဲခူးမြို့က နံပါတ် ၁၃ နေရာမှာ ရှိပါတယ်။
မိုးလေဝသပညာရှင် ဦးဝင်းနိုင်ရဲ့ မှတ်တမ်းအရ ညနေ ၄ နာရီခွဲမှာတော့ ချောက်မြို့က အပူချိန် ၄၁ ဒီဂရီစင်တီဂရိတ်နဲ့ စာရင်းမှာ ပါဝင်လာတာကြောင့် မြို့ ၅ မြို့ရှိလာခဲ့ပါတယ်။
ည ၁၀ နာရီခွဲမှာတော့ မကွေးတိုင်း၊ မင်းဘူးမြို့ဟာ ၄၃ ဒီဂရီစင်တီဂရိတ်နဲ့ ကမ္ဘာမှာ အပူချိန် အမြင့်ဆုံးမြို့ ဖြစ်လာပြီး သဲကန္တာရ အိုမန်နိုင်ငံ၊ ကာလ်ဟတ်မြို့က နံပါတ် ၂ နေရာကို ရောက်သွားပါတယ်။
ဒါ့အပြင် မကွေးမြို့က ၄၂ ဒသမ ၇ ဒီဂရီနဲ့ နံပါတ် ၃၊ ချောက်မြို့က ၄၁ ဒသမ ၃ ဒီဂရီနဲ့ နံပါတ် ၅၊ တောင်ငူမြို့က ၄၁ ဒီဂရီနဲ့ နံပါတ် ၉၊ ပြည်မြို့က ၄၀ ဒသမ ၆ ဒီဂရီနဲ့ နံပါတ် ၁၂ နေရာမှာ ရှိခဲ့ပါတယ်။
ချောက်မြို့ဟာ မနှစ်က ဧပြီလမှာ အပူချိန် ၄၅ ဒီဂရီစင်တီဂရိတ်နဲ့ ကမ္ဘာ့အပူဆုံးမြို့ဖြစ်ခဲ့သလို ၂၀၂၃ ခုနှစ်၊ ဧပြီလကလည်း ၄၅ ဒီဂရီစင်တီဂရိတ်နဲ့ ကမ္ဘာ့အပူဆုံးမြို့ဖြစ်ခဲ့ပါတယ်။
