NVC ကတ်ကိုင်ရုံနဲ့ နိုင်ငံအတွင်း ကြိုက်တဲ့နေရာ သွားလို့ရတယ်ဆိုတာ လုံးဝမဟုတ်သလို လျှောက်ထားသူတိုင်း အချိန်ငါးလကြာရင် နိုင်ငံသားဖြစ်ခွင့်ရမှာ မဟုတ်ဘူးလို့ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား ပြည်ထောင်စုဝန်ကြီး ဦးသိန်းဆွေက ပြောပါတယ်။
ဒီကနေ့ လုပ်ငန်းခွင်ဘေးအန္တရာယ်ကင်းရှင်းရေးနဲ့ ကျန်းမာရေးဆိုင်ရာ ဆွေးနွေးပွဲမှာ NVC ကတ်ကိုင်ဆောင်သူတွေကိစ္စနဲ့ ပတ်သက်ပြီး မီဒီယာတွေရဲ့ မေးမြန်းချက်ကို ပြည်ထောင်စုဝန်ကြီးက ပြန်လည်ဖြေဆိုခဲ့တာပါ။
“လွတ်လပ်စွာသွားခွင့်ရှိတယ်ဆိုတာ သက်ဆိုင်ရာမြို့နယ်အတွင်းမှာ လွတ်လပ်စွာ သွားခွင့်ရှိတာပါ။ အခု မီဒီယာတွေ ဖော်ပြနေသလို ဒီ NVC ကိုင်ရုံနဲ့ နိုင်ငံအတွင်း ကြိုက်တဲ့နေရာ သွားခွင့်ရတယ်ဆိုတာ လုံးဝ မဟုတ်ပါဘူး။ ခွင့်လည်း မပြုနိုင်ပါဘူး။ ပြီးတော့ ပုံစံ ၄ ဖြည့်ရတယ်ဆိုတာ ပုံစံ ၄ ဖြည့်ပြီးမှပဲ နိုင်ငံသား ဘယ်အဆင့်ရမယ်ဆိုတာ နိုင်ငံသားမှတ်ပုံတင် လျှောက်ရမှာပါ။ ခိုင်ခိုင်မာမာပြောချင်ပါတယ်။ NVC ထုတ်ပေးစဉ်က တည်းက အခွင့်အရေးတွေ၊ ရပိုင်ခွင့်တွေနဲ့ ကန့်သတ်ချက်အတိုင်းဖြစ်ပါတယ်”လို့ ပြည်ထောင်စု ၀န်ကြီး ဦးသိန်းဆွေက ပြောပါတယ်။
NVC ကတ်ရရုံနဲ့ ကြိုက်တဲ့နေရာ သွားခွင့်ပြုတယ်ဆိုတာ လုံးဝမဟုတ်ဘဲ NVC ကတ်ဟာ နိုင်ငံအတွင်းမှာ နေတယ်ဆိုတာကို အသိအမှတ်ပြုတာဖြစ်တယ်၊ ပုံစံ ၄ ဖြည့်ပြီးမှ စာရွက်စာတမ်း အထောက်အထားတွေ ခိုင်လုံမှ လုပ်ငန်းစဉ်အတိုင်း မြို့နယ်၊ ခရိုင်၊ ပြည် နယ်ကနေ ဗဟိုအဆင့်က စိစစ်ပြီး ဥပဒေနဲ့အညီ နိုင်ငံသားလား၊ ဧည့်နိုင်ငံသားလား၊ နိုင်ငံသားပြုခွင့်ရသူလား ဆိုပြီး ပေးသွားမှာဖြစ်တယ်လို့ သိရပါတယ်။
“ငါးလအတွင်းမှာ သူဟာ ဘယ်အဆင့်ရမယ်၊ ဒါတောင်မှ နံပါတ် (၁) သူကိုယ်တိုင် လာလျှောက်မှ၊ နံပါတ် (၂) သူ့ဆီမှာရှိတဲ့ အချက်အလက်တွေ ခိုင်ခိုင်မာမာရှိမှ၊ ဥပဒေနဲ့ညီမှ သူရသင့်တဲ့ နိုင်ငံသား အဆင့်အတန်းရမှာဖြစ်ပါတယ်။ လျှောက်တိုင်း ငါးလကြာရင် နိုင်ငံသား ဖြစ်မယ်ဆိုတာ အင်မတန်ကို ၁၉၈၂ ခုနှစ် ဥပဒေနဲ့လည်း မညီညွတ်ပါဘူး။ အဲဥပဒေအတိုင်း ဆောင်ရွက်မှာဖြစ်ပါတယ်။ ပြည်သူတွေ စိုးရိမ်စရာမရှိပါဘူး” လို့ ဝန်ကြီး ဦးသိန်းဆွေ ပြောပါတယ်။
ပြီးခဲ့တဲ့ ဧပြီ ၁၉ ရက်က လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ပြည်ထောင်စုဝန်ကြီး ဒေါက်တာဝင်းမြတ်အေးက ကော့ဘဇားခရီးစဉ်နဲ့ပတ်သက်ပြီး သတင်းစာရှင်းလင်းပွဲမှာ ဘင်္ဂလားဒေ့ရ်ှကနေပြန်လာမယ့် နေရပ်စွန့်ခွာသူတွေကို NVC ကတ်ထုတ်ပေးပြီး ငါးလအတွင်းနိုင်ငံသားဖြစ်ခွင့် လျှောက်ထားနိုင်တယ်၊ ကတ်ကိုင်ဆောင်သူတွေ လွတ်လပ်စွာသွားလာခွင့် ရှိတယ်လို့ ပြောဆိုခဲ့တာပါ။
လူကယ်ပြန်ဝန်ကြီးရဲ့ အဆိုပါ ပြောဆိုချက်နဲ့ပတ်သက်လို့ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီက မနေ့က ကြေညာချက်ထုတ်ပြန်ပြီး အပြင်းအထန် ကန့်ကွက်ထားပါတယ်။
