ဂရိနိုင်ငံနိုင်ငံရှိ အေသင်တက္ကသိုလ် နယ်မြေအတွင်း ကျောင်းသားစုဝေးပွဲတခုကို ဆိုင်ကယ်စီးဦးထုပ် ဆောင်းထားသူတချို့ ပါဝင်တဲ့ လူအုပ်စုတစုက ဝင်ရောက်တိုက်ခိုက်ခဲ့ရာမှာ လူ ၃ ယောက် ဒဏ်ရာရရှိခဲ့တယ်လို့ ဂရိနိုင်ငံ အရေးပေါ် ဆေးဘက်ဆိုင်ရာ ဝန်ဆောင်မှုအဖွဲ့နဲ့ အေသင်သတင်းဌာနတို့က ပြောပါတယ်။
ဒဏ်ရာရရှိသူ ၃ ယောက်ကို အေသင်မြို့ရှိ ဆေးရုံတရုံမှာ ကုသမှုပေးခဲ့ပြီး ဒဏ်ရာတွေမှာ အသက်အန္တရာယ် စိုးရိမ်ရလောက်အောင် မပြင်းထန်ကြကြောင်း အရေးပေါ် ဆေးဘက်ဆိုင်ရာ ဝန်ဆောင်မှုအဖွဲ့က ဆိုပါတယ်။
ရဲတပ်ဖွဲ့က ဒီဖြစ်ရပ်နဲ့ပတ်သက်ပြီး စုံစမ်းစစ်ဆေးမှုတွေ ပြုလုပ်နေဆဲ ဖြစ်ပါတယ်။ တိုက်ခိုက်မှုကို ဘာကြောင့်၊ ဘယ်သူက ပြုလုပ်ခဲ့တယ် ဆိုတာကိုတော့ ချက်ချင်း မသိရှိရသေးသလို လက်ရှိအချိန်အထိ ဘယ်သူ့ကိုမှ ဖမ်းဆီးရမိခြင်း မရှိသေးပါဘူး။
ဂရိ ပညာရေးဝန်ကြီးဌာနက ဒီအကြမ်းဖက်မှုကို ပြင်းထန်စွာ ရှုတ်ချလိုက်ပြီး ဒီလုပ်ရပ်ဟာ “ပညာရေးအသိုက်အဝန်းကို စော်ကားရာရောက်သလို လွတ်လပ်စွာ ထုတ်ဖော်ပြောဆိုခွင့်ကိုလည်း ထိခိုက်စေတယ်” လို့ ပြောပါတယ်။
ပြီးခဲ့တဲ့လက ဂရိနိုင်ငံတဝန်းရှိ ကျောင်းသားတွေနဲ့ ဆရာ၊ ဆရာမ ထောင်ပေါင်းများစွာဟာ လမ်းမတွေပေါ်ထွက်ကာ ပညာရေးကဏ္ဍအတွက် နိုင်ငံတော်ဘတ်ဂျက် တိုးမြှင့်ပေးဖို့၊ အခြေခံ အဆောက်အအုံတွေ ပိုမိုကောင်းမွန်လာစေဖို့နဲ့ စာသင်ခန်းတွေအတွင်း လူဦးရေကျပ်တည်းမှု လျော့ကျစေဖို့ တောင်းဆို ဆန္ဒပြခဲ့ကြပြီး တခြားဥရောပနိုင်ငံတွေရှိ ဆန္ဒပြသူတွေရဲ့ တောင်းဆိုချက်တွေနဲ့လည်း ထပ်တူကျနေခဲ့ပါတယ်။
တက္ကသိုလ်ကျောင်းသားတွေဟာ နိုဝင်ဘာ ၅ ရက်နေ့ အေသင်မြို့မှာ ထပ်မံဆန္ဒပြဖို့ စီစဉ်ထားကြပါတယ်။
Source: Reuters
