နေပြည်တော်၊ တပ်ကုန်းမြို့နယ်အခြေစိုက် တပ်ရင်းကနေ စစ်မှုထမ်းတပ်သား ၃ ယောက် သေနတ်တလက် ယူဆောင်ထွက်ပြေးသွားတယ်လို့ စစ်အာဏာရှင်တပ်နဲ့ နီးစပ်သူတွေဆီက သိရပါတယ်။
အဓမ္မစုဆောင်းခံထားရတဲ့ စစ်မှုထမ်းတပ်သား ၃ ယောက်ဟာ ဇူလိုင် ၁၆ ရက် ညပိုင်းက တပ်ကုန်းမြို့ အခြေစိုက်တပ်ရင်း ခမရ ၁၀၉ ကနေ ထွက်ပြေးသွားတယ်လို့ ဆိုပါတယ်။
စစ်အာဏာရှင်တပ်နဲ့ နီးစပ်သူက “ထွက်ပြေးတာကို မနက်ပိုင်း မိုးလင်းမှသိရတာ။ တပ်အရာရှိတွေ မူးအိပ်နေချိန် ထွက်ပြေးကြတာ။ ထွက်ပြေးတဲ့ကိစ္စနဲ့ပတ်သက်ပြီး သတင်းဖုံးထားတယ်။ သေနတ်တလက်ပါ ယူပြေးတာလို့ သိရတယ်” လို့ ပြောပါတယ်။
စစ်မှုထမ်း အပတ်စဉ် ၅ က ၂ ယောက်နဲ့ စစ်မှုထမ်းအပတ်စဉ် ၆ က တယောက်ဖြစ်ပြီး MA-1 အမျိုးအစားသေနတ်တလက်ပါ ယူဆောင်ထွက်ပြေးသွားတာလို့ သိရပါတယ်။
ထွက်ပြေးတဲ့ စစ်မှုထမ်းတပ်သားတွေကို စစ်တပ်နဲ့ ပြည်သူ့စစ်တွေ၊ ရဲတွေက လိုက်လံရှာဖွေနေပြီး ဇူလိုင် ၁၈ ရက် မနက်အထိ ပြန်လည်ဖမ်းမိတာ မရှိသေးဘူးလို့ စစ်အာဏာရှင်တပ်ဖွဲ့နဲ့ နီးစပ်သူဆီက သိရပါတယ်။
ပြီးခဲ့တဲ့ မေလနဲ့ ဖေဖော်ဝါရီလတုန်းကလည်း ခမရ ၁၀၉ ကနေ တပ်သား ၇ ယောက် ထွက်ပြေးခဲ့ပြီး တယောက်ကတော့ အဖမ်းခံခဲ့ရပါတယ်။
