ဒေါနအရှေ့ခြမ်းမှာ နယ်မြေစိုးမိုးရေးအတွက် ပြန်လည်ထိုးစစ်ဆင်လာတဲ့ စစ်အာဏာရှင် စစ်ကြောင်းကို KNLA ပူးပေါင်းတပ်တွေက တိုက်ခိုက်ခဲ့တာကြောင့် စစ်ကြောင်းမှူး အပါအဝင် စစ်ကြောင်းတခုလုံးနီးပါး ပျက်စီးခဲ့တယ်လို့ ကရင်အမျိုးသားအစည်းအရုံး (KNU) က ဩဂုတ် ၃ ရက်မှာ ထုတ်ပြန်ပါတယ်။
ကရင်အမျိုးသားအစည်းအရုံး၊ ကော်သူးလေ ထိန်းချုပ်နယ်မြေ၊ ဒူးပလာယာခရိုင်၊ တပ်မဟာ (၆) နယ်မြေအတွင်းမှာရှိတဲ့ ဒေါနတောင်တန်းအရှေ့ခြမ်းမှာ လက်လွှတ်ဆုံးရှုံးခဲ့ရတဲ့ နယ်မြေတွေကို ပြန်လည်ထိန်းချုပ်နိုင်ဖို့ စစ်အာဏာရှင်တပ်က အင်အားအလုံးအရင်းနဲ့ စစ်ကြောင်းထိုး ဝင်ရောက် လာတာလို့ ဆိုပါတယ်။
ဩဂုတ် ၃ ရက်က တပ်မ ၂၂ လက်အောက်ခံ ခြေမြန်တပ်ရင်း ခမရ-၂၀၃ နဲ့ ခမရ-၂၁၀ တို့ဟာ ဒေါနအရှေ့ခြမ်းကို စစ်ကြောင်းထိုး ဝင်ရောက်လာစဉ် KNLA တပ်ရင်း (၂၈) မှူး ဒုတိယဗိုလ်မှူးကြီး စောဒါဘော ဦးဆောင်တဲ့ တပ်ဖွဲ့တွေနဲ့ တော်လှန်ရေးပူးပေါင်းတပ်ဖွဲ့တွေက ထိပ်တိုက်ရင်ဆိုင် တိုက်ခိုက်ခဲ့ကြရာမှာ ခမရ ၂၀၃ က ဗိုလ်မှူးအဆင့်ရှိ စစ်ကြောင်းမှူးအပါအဝင် စစ်ကြောင်းတစ်ခုလုံးနီးပါး ပျက်စီးခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
တိုက်ပွဲပြီးနောက် ရှေ့တန်းစစ်မြေပြင်မှာ စစ်အာဏာရှင် တပ်ဖွဲ့ဝင်တွေရဲ့ ရုပ်အလောင်း အများအပြားနဲ့ လက်နက်ခဲယမ်းအမြောက်အမြား ကျန်ရစ်ခဲ့ပါတယ်။
သိမ်းဆည်းရမိထားတဲ့ လက်နက် ခဲယမ်းတွေကတော့ MA-3 သေနတ် ၂ လက်၊ MA-2 သေနတ် ၂ လက်၊ MA-1 သေနတ် ၁ လက်၊ MA ပူးတွဲသေနတ် ၁ လက်၊ GPG လောင်ချာ ၁ လက်၊ MA BMA သေနတ် ၁ လက်၊ ဘောက်ဝိုင်း ၁ ခု၊ MA ဘောက် ၁၂ ခု၊ MA ကျည် ၇၅၅ တောင့်၊ ၆၀ မမ ဗုံးသီး ၃ လုံး၊ အီနာကာဗုံး ၅ လုံး၊ GPG ကျည် ၁ လုံးနဲ့ ပို့ရမ်း ၁ လုံးတို့ ဖြစ်တယ်လို့ သိရပါတယ်။
စစ်အာဏာရှင်ဟာ စစ်မှုထမ်းဥပဒေကို အကြောင်းပြပြီး နိုင်ငံတဝန်းမှာရှိတဲ့ လူငယ်လူရွယ်တွေ ကို အတင်းအဓမ္မ စစ်မှုထမ်းခိုင်းကာ ရှေ့တန်းစစ်မြေပြင်တွေကို စေလွှတ်နေကြောင်း၊ လူသားချင်းစာနာထောက်ထားမှုအရ မိမိဆန္ဒမပါဘဲ အတင်းအဓမ္မ စစ်မှုထမ်းခိုင်းခံနေရတဲ့ တပ်သားတွေ၊ တပ်ဖွဲ့ဝင်တွေအနေနဲ့ မိမိတို့ရဲ့ အသက်အန္တရာယ်နဲ့ အနာဂတ်ကို ကာကွယ်နိုင်ဖို့ နီးစပ်ရာ တော်လှန်ရေးတပ်ဖွဲ့တွေဆီကို အလင်းဝင်ရောက်ကြဖို့ KNU က တိုက်တွန်းထား ပါတယ်။
