အစ္စရေးဝန်ကြီးချုပ် ဘင်ဂျမင် နေတန်ယာဟုက အမေရိကန် ကာကွယ်ရေးဝန်ကြီး ပိထ် ဟဂ်ဆီသ်နဲ့ ဝါရှင်တန်မြို့တော်မှာ ဇူလိုင် ၂၉ ရက်က တွေ့ဆုံခဲ့ပါတယ်။
အီရန်မူဝါဒနဲ့ ပတ်သက်ပြီး ခေါင်းဆောင် ၂ ယောက်ကြား တင်းမာတွေ ပေါ်လာတာနဲ့အမျှ နေတန်ယာဟုဟာ ဇူလိုင် ၂၈ ရက်မှာ အမေရိကန်သမ္မတ ဒေါ်နယ်ထရမ့်ပ်နဲ့ ဆွေးနွေးဖို့ အိမ်ဖြူတော်ကို ရောက်လာခဲ့တာပါ။
အင်္ဂါနေ့နှောင်းပိုင်းမှာ ထရမ့်ပ်က ယူကရိန်းသမ္မတ ဗိုလိုဒီမာ ဇလန်းစကီးနဲ့ အစ္စရေးဝန်ကြီးချုပ် ဘင်ဂျမင် နေတန်ယာဟုတို့နဲ့ တွေ့ဆုံမှုတွေက အပြုသဘောဆောင်တယ်လို့ ပြောပါတယ်။
နေတန်ယာဟုနဲ့ ဇလန်းစကီးတို့ဟာ အမေရိကန်ရဲ့ ရီပတ်ဘလီကန် ပါတီဝင်တယောက်ဖြစ်ပြီး အစ္စရေးနဲ့ ယူကရိန်းအတွက် ဩဇာကြီးတဲ့ ရှေ့နေတယောက်ဖြစ်တဲ့ အထက်လွှတ်တော်အမတ် လင်ဆေး ဂရေဟမ် အတွက် အောက်မေ့ဖွယ်အခမ်းအနားကို တက်ဖို့ ဝါရှင်တန်မြို့တော်ကို ရောက်နေတာပါ။
နေတန်ယာဟုက သမ္မတ ထရမ့်ပ်ဟာ အီရန်စစ်ပွဲမှာ အဆုံးအဖြတ်ပေးနေတယ်လို့ အခိုင်အမာ ပြောဆိုခဲ့ပြီး အမေရိကန်နဲ့ ညှိနှိုင်းမှုတွေအတွင်း အီရန်ကို ဆက်တိုက်ခိုက်ဖို့ ထရမ့်ပ်ကို ဆွဲဆောင်ရေး ကြိုးစားနေတယ်ဆိုတဲ့ အပြောတွေကို ငြင်းဆိုခဲ့ပါတယ်။
ဒါပေမဲ့ အီရန်အစိုးရနဲ့ သံတမန်ရေးအရ ဖြေရှင်းလို့ ရနိုင်တယ်ဆိုတဲ့ အချက်ကို နေတန်ယာဟုက သံသယရှိနေဆဲပါ။
“မဖြစ်နိုင်ဘူးလား ဆိုတာတော့ ကျနော် မသိပေမဲ့ အီရန်ရဲ့ လုပ်ဆောင်ပုံ၊ လည်ပတ်ပုံနည်းလမ်းကို ကျနော် သံသယရှိပါတယ်။ သူတို့က အမြဲတမ်း လိမ်လည်ကြတယ်၊ ပြီးတော့ အမြဲတမ်း အချိန်ဆွဲဖို့အတွက် ကစားကြတယ်။ လုံလောက်တဲ့ ဖိအား သံတမန်ရေး၊ စီးပွားရေးဖိအား အတွင်းမှာ အဲဒါ ပြောင်းလဲနိုင်မလား။ စမ်းကြည့်ပါ” လို့ နေတန်ယာဟုက ဗုဒ္ဓဟူးနေ့မှာ ABC သတင်းဌာနရဲ့ Live Prime အစီအစဉ်အတွင်း လင်စီ ဒေးဗစ်စ်နဲ့ မေးမြန်းခန်းမှာ ပြောပါတယ်။
