အမေရိကန်ကာကွယ်ရေးဝန်ကြီး ပိထ်ဟက်ဂ်ဆက်သ်ဟာ လွှတ်တော်ရဲ့ ခွင့်ပြုချက် မပါဘဲ အီရန်စစ်ပွဲ ဆင်နွှဲခဲ့တယ်ဆိုတဲ့ စွပ်စွဲချက်အရ သူ့ကို ရာထူးကနေဖြုတ်ချဖို့ ကြိုးပမ်းခဲ့ပေမဲ့လည်း မအောင်မမြင် ဖြစ်ခဲ့ပါတယ်။

နိုဝင်ဘာ ၁၀ ရက်က အောက်လွှတ်တော်မှာ ပြုလုပ်ခဲ့တဲ့ မဲခွဲဆုံးဖြတ်မှုအတွင်း ၂၁၁ မဲ - ၂၀၄ မဲရလဒ် ထွက်ပေါ်ခဲ့တဲ့အလျောက် ဟက်ဂ်ဆက်သ်ကို စွပ်စွဲပြစ်တင်ရေး အဆိုပြုချက်ဟာ တခန်းရပ်ခဲ့ပါတယ်။

အဲဒီနောက် ရီပတ်ဘလစ်ကန်အမတ် သောမတ်စ် မက်စီက ဦးဆောင်တင်သွင်းခဲ့တဲ့ အဆိုပြုချက်ကို တရားရေးကော်မတီဆီ လွှဲပြောင်းဖို့အတွက်သာ ဆုံးဖြတ်ခဲ့ကြပါတယ်။

ဒါဟာ လက်ရှိ ကွန်ဂရက်လွှတ်တော် ၂ ရပ်စလုံးမှာ ရီပတ်ဘလစ်ကန်အများစု လွှမ်းမိုးထားတာကြောင့် ဖြစ်သလို လာမဲ့ ဇန်နဝါရီလမှသာ ရွေးကောက်ပွဲအနိုင်ရ ဒီမိုကရက်ပါတီဝင်တွေက ဥပဒေပြုရေးအာဏာကို ထိန်းချုပ်နိုင်မှာလည်း ဖြစ်ပါတယ်။

၆ လတာအတွင်း ပင်တဂွန်စစ်ဌာနချုပ်ရဲ့ ပထမဆုံး သတင်းစာရှင်းလင်းပွဲမှာ ဟက်ဂ်ဆက်သ်က ရာထူးဖယ်ရှားရေး ကြိုးပမ်းချက်ကို နိုင်ငံရေးပရိယာယ်သာ ဖြစ်တယ်ဆိုပြီး “ဟာသမြောက်တဲ့” အပြင် “အဖျက်အမှောင့်လုပ်ရပ်” တခုအနေနဲ့ပါ ပြောသွားပါတယ်။

အမေရိကန်သမ္မတ ဒေါ်နယ်ထရမ့်ပ် ကတော့ “မရှုမလှရှုံးနိမ့်သွားတဲ့” မဲခွဲဆုံးဖြတ်မှုအတွက် ဝမ်းမြောက်တဲ့အကြောင်းနဲ့ ဟက်ဂ်ဆက်သ်ကို စွပ်စွဲပြစ်တင်ရမှာ မဟုတ်ဘဲ ချီးကျူးဂုဏ်ပြုရမှာ ဖြစ်တယ်ဆိုပြီး Truth Social ပေါ်မှာ ရေးသားထားပါတယ်။

တချိန်တည်းမှာပဲ ရီပတ်ဘလစ်ကန်တွေဘက်က ဒီမိုကရက်ပါတီ ထိန်းချုပ်သွားမဲ့ အထက်လွှတ်တော်နဲ့ အောက်လွှတ်တော် ခေါင်းဆောင်တွေအဖြစ် ဂျွန်သွန်းနဲ့ ဂျင်မ်ဂျော်ဒန် တို့ကို ရွေးချယ်ခဲ့ကြပါတယ်။

ဆီးနိတ် အထက်လွှတ်တော်မှာ အမတ်စုစုပေါင်း ၁၀ ယောက် ရှိပေမဲ့လည်း အရေးကြီးတဲ့ ဥပဒေကြမ်းတွေ အတည်ပြုဖို့ လိုအပ်တဲ့ မဲအရေအတွက် ၆၀ အတွက် ဒီမိုကရက်ဘက်က ရီပတ်ဘလစ်ကန်ရဲ့ ထောက်ခံမှုကိုပါ လိုအပ်ပါတယ်။

အလားတူ သမ္မတက ဗီတိုအာဏာသုံးပြီး ဥပဒေကြမ်း ပယ်ချတာတွေကို ကျော်လွှားနိုင်ဖို့ဆိုရင် မဲအရေအတွက် သုံးပုံနှစ်ပုံအထိ လိုအပ်ပေမဲ့လည်း အဲဒီလောက်အထိ ဒီမိုကရက်တွေအနေနဲ့ အသာစီးရထားခြင်း မရှိပါဘူး။

Source: Reuters