တရုတ်နိုင်ငံအရှေ့တောင်ပိုင်း၊ ဖူးကျန်းပြည်နယ်၊ ကျင်းကျန်းမြို့မှာရှိတဲ့ "ဟွေးထန်း" ဖိနပ်နဲ့ အဝတ်အထည်ထုတ်လုပ်ရေး စက်ရုံမှာ အကြီးအကျယ် မီးလောင်မှုတခု ဖြစ်ပွားခဲ့လို့ အနည်းဆုံး လူ ၂၈ ယောက် သေဆုံးခဲ့တယ်လို့ နိုင်ငံပိုင် CCTV ရုပ်သံမှာ ဇူလိုင် ၁၀ ရက်က ဖော်ပြပါတယ်။

ဇူလိုင် ၉ ရက် ဒေသစံတော်ချိန် မွန်းတည့် ၁၂ နာရီဝန်းကျင်က မီးစတင်လောင်ချိန်မှာ စက်ရုံထဲမှာ ဝန်ထမ်း ၂၃၇ ယောက်နဲ့ ဧည့်သည် ၂ ယောက်၊ စုစုပေါင်း ၂၃၉ ယောက် ရှိနေခဲ့တယ်လို့ CCTV က ဆိုပါတယ်။

မီးသတ်နဲ့ ကယ်ဆယ်ရေးဝန်ထမ်း အင်အား ၅၀၀ ကျော်က ဝိုင်းဝန်း ငြှိမ်းသတ်ခဲ့ရပါတယ်။

အဲဒီအထဲက လူပေါင်း ၂၁၃ ယောက်ကို ဘေးလွတ်ရာ ရွှေ့ပြောင်းပေးနိုင်ခဲ့ပေမဲ့ မီးခိုးလုံး အမည်းကြီးတွေကြား ခေါင်မိုးပေါ်မှာ ပိတ်မိနေသူတွေလည်း ရှိခဲ့ပါတယ်။

လွတ်မြောက်လာသူတွေထဲက ၂ ယောက်ကတော့ ဆေးရုံပို့ပြီး ကုသမှုခံယူရင်း သေဆုံးသွားခဲ့ပါတယ်။

ဒါ့အပြင် အစောပိုင်းက ပျောက်ဆုံးနေတယ်လို့ သတင်းထွက်ထားတဲ့ နောက်ထပ် ၂၆ ယောက်လည်း သေဆုံးသွားပြီဖြစ်ကြောင်း နောက်ပိုင်းမှာ အတည်ပြုခဲ့ပါတယ်။

လောလောဆယ်မှာတော့ စက်ရုံပိုင်ရှင်နဲ့ တခြားတာဝန်ရှိသူတွေကို ရဲတပ်ဖွဲ့က ထိန်းသိမ်းထားပြီး ကုမ္ပဏီရဲ့ ဘဏ်အကောင့်တွေကိုလည်း ပိတ်ပင်ထားတယ်လို့ CCTV က ဖော်ပြပါတယ်။

ဒီဖြစ်ရပ်နဲ့ပတ်သက်ပြီး တရုတ်သမ္မတ ရှီကျင့်ဖျင်က အစွမ်းကုန် ကယ်ဆယ်ဖို့နဲ့ တာဝန်ရှိသူတွေကို ပြတ်ပြတ်သားသား အရေးယူဖို့ ညွှန်ကြားထားသလို အရေးပေါ်စီမံခန့်ခွဲမှု ဝန်ကြီးဌာနကလည်း စုံစမ်းစစ်ဆေးရေးအဖွဲ့တဖွဲ့ကို အခင်းဖြစ်ရာဆီ ချက်ချင်းစေလွှတ်ခဲ့ပြီး သောကြာနေ့မှာ အဖွဲ့ဝင် ၈ ယောက်ပါ စုံစမ်းစစ်ဆေးရေးအဖွဲ့ဟာ စစ်ဆေးဖို့ အခင်းဖြစ်နေရာကို ရောက်ရှိလာခဲ့ပါတယ်။

CCTV က ထုတ်လွှင့်ပြသခဲ့တဲ့ ဗီဒီယိုဖိုင်တွေထဲမှာတော့ မီးလောင်ပျက်စီးသွားတဲ့ စက်ရုံအဆောက်အအုံ၊ စက်ရုံထဲမှာ လောင်ကျွမ်း မည်းတူးနေတဲ့ ပစ္စည်းတွေနဲ့ စုံစမ်းစစ်ဆေးရေးမှူးတွေ အခင်းဖြစ်ပွားရာနေရာကို စစ်ဆေးနေတာတွေကို မြင်တွေ့ရပါတယ်။

တရုတ်နိုင်ငံရဲ့ "ဖိနပ်မြို့တော်" လို့ တင်စားရတဲ့ ကျင်းကျန်းမြို့ဟာ ကမ္ဘာ့ဖိနပ်ထုတ်လုပ်မှု စုစုပေါင်းရဲ့ ၂၀ ရာခိုင်နှုန်းကို ထုတ်လုပ်ပေးနေတဲ့ အဓိက လုပ်ငန်းနေရာကြီးတခုဖြစ်ပြီး ၂၀၂၄ ခုနှစ်အတွင်း ဖိနပ်စုံရေ ၁ ဒသမ ၂ ဘီလီယံကျော် ထုတ်လုပ်ခဲ့ပါတယ်။

မကြာသေးတဲ့ လပိုင်းတွေကလည်း တရုတ်နိုင်ငံတွင်းက ကုန်ထုတ်လုပ်ငန်းတွေမှာ လူသေဆုံးမှုရှိတဲ့ မတော်တဆမှုတွေ ဆက်တိုက် ဖြစ်ပွားခဲ့ဖူးပါတယ်။

Source: Reuters