၂၀၂၅ ခုနှစ်မှာ ကမ္ဘာလုံးဆိုင်ရာ စစ်ရေးအသုံးစရိတ်ဟာ အမေရိကန်ဒေါ်လာ ၂ ဒသမ ၈၉ ထရီလီယံ အထိ စံချိန်တင် မြင့်တက်ခဲ့ပြီး ၁၁ နှစ်မြောက် တိုးတက်မှုဖြစ်တယ်လို့ စတော့ဟုမ်း အပြည်ပြည်ဆိုင်ရာ ငြိမ်းချမ်းရေးသုတေသနဌာန (SIPRI) က ဧပြီ ၂၇ ရက်မှာ အစီရင်ခံစာ ထုတ်ပြန်ပါတယ်။

ကမ္ဘာလုံးဆိုင်ရာ စစ်ရေးဝန်ထုပ်ဝန်ပိုး ဒါမှမဟုတ် ပြည်တွင်းအသားတင်ထုတ်ကုန် (GDP) ရဲ့ ဝေစု အဖြစ် စစ်ရေးအသုံးစရိတ်ဟာ ၂၀၂၅ ခုနှစ်မှာ ၂ ဒသမ ၅ ရာခိုင်နှုန်းအထိ မြင့်တက်လာခဲ့ပြီး ၂၀၀၉ ခုနှစ် နောက်ပိုင်း အမြင့်ဆုံးအဆင့်ဖြစ်တယ်လို့ SIPRI က ပြောပါတယ်။

စစ်ရေးအသုံးစရိတ်ဟာ ၂၀၂၄ ခုနှစ်ထက် အမှန်တကယ် ၂ ဒသမ ၉ ရာခိုင်နှုန်း မြင့်တက်လာခဲ့ပေမဲ့ မနှစ်က မှတ်တမ်းတင်ထားတဲ့ ၉ ဒသမ ၇ ရာခိုင်နှုန်း တိုးတက်မှုကနေ သိသိသာသာ နှေးကွေး သွားခဲ့တာပါ။

ကမ္ဘာလုံးဆိုင်ရာ စစ်ရေးအသုံးစရိတ်ဟာ ၂၀၂၅ ခုနှစ်မှာ ထပ်မြင့်တက်လာခဲ့ပြီး စစ်ပွဲတွေ၊ မရေရာမှုတွေနဲ့ ပထဝီနိုင်ငံရေး မငြိမ်မသက်မှုတွေကြောင့် နောက်ထပ်တနှစ်ကို နိုင်ငံတွေက လက်နက် အကြီးအကျယ် တပ်ဆင်မှုတွေ၊ တွန်းအားပေးမှုတွေနဲ့ တုံ့ပြန်ခဲ့တယ်လို့ SIPRI ရဲ့ စစ်ရေး အသုံးစရိတ်နဲ့ လက်နက်ထုတ်လုပ်မှု အစီအစဉ်က သုတေသီတယောက်က ပြောပါတယ်။

အမေရိကန်ပြည်ထောင်စုဟာ ၂၀၂၅ ခုနှစ်မှာ စစ်ရေးအသုံးစရိတ် ၇ ဒသမ ၅ ရာခိုင်နှုန်း ကျဆင်းပြီး ဒေါ်လာ ၉၅၄ ဘီလီယံအထိ ရောက်ခဲ့ပေမဲ့ ကမ္ဘာ့အကြီးဆုံး စစ်ရေးအသုံးစရိတ် သုံးစွဲသူအဖြစ် ဆက်လက်တည်ရှိနေပါတယ်။

အရင် ၃ နှစ်နဲ့ နှိုင်းယှဉ်ရင် ၂၀၂၅ ခုနှစ်အတွင်း ယူကရိန်းအတွက် ငွေကြေးဆိုင်ရာ စစ်ရေး အကူအညီအသစ်တွေကို အတည်မပြုတော့လို့ အဓိကအားဖြင့် ကျဆင်းသွားတာလို့ SIPRI က ပြောပါတယ်။

၂၀၂၅ ခုနှစ်မှာ ကမ္ဘာလုံးဆိုင်ရာ စစ်ရေးအသုံးစရိတ် တိုးတက်မှုအတွက် အဓိကပံ့ပိုးသူက ဥရောပ ပါ။

ဒေသတွင်း စစ်ရေးအသုံးစရိတ် ၁၄ ရာခိုင်နှုန်း မြင့်တက်လာပြီး ဒေါ်လာ ၈၆၄ ဘီလီယံအထိ မြင့်တက် လာခဲ့ပါတယ်။

မြောက်အတ္တလန္တိတ်စာချုပ်အဖွဲ့ (NATO) ရဲ့ ဥရောပအဖွဲ့ဝင် ၂၉ နိုင်ငံဟာ ၂၀၂၅ ခုနှစ်မှာ စုစုပေါင်း ဒေါ်လာ ၅၅၉ ဘီလီယံ သုံးစွဲခဲ့ပါတယ်။

သူတို့ထဲက ၂၂ နိုင်ငံက GDP ရဲ့ အနည်းဆုံး ၂ ရာခိုင်နှုန်းရှိတဲ့ စစ်ရေးအသုံးစရိတ်ကို သုံးစွဲခဲ့တယ်လို့ SIPRI က အစီရင်ခံပါတယ်။

အရှေ့အလယ်ပိုင်းမှာ စစ်ရေးအသုံးစရိတ်ဟာ ၂၀၂၅ ခုနှစ်မှာ ခန့်မှန်းခြေအားဖြင့် ဒေါ်လာ ၂၁၈ ဘီလီယံ အထိ ရောက်ခဲ့ပြီး ၂၀၂၄ ခုနှစ်နဲ့ ကွာခြားချက် မရှိပါဘူး။

ပဋိပက္ခတွေနဲ့ အပြိုင်အဆိုင်တွေ ဆက်ရှိနေပေမဲ့ ဒေသတွင်း အသုံးစရိတ်က တည်ငြိမ်နေတုန်းပဲလို့ SIPRI က ပြောပါတယ်။

အာရှနဲ့ သမုဒ္ဒရာဒေသမှာ ဂျပန်ရဲ့ စစ်ရေးအသုံးစရိတ်က ၉ ဒဿမ ၇ ရာခိုင်နှုန်း မြင့်တက်လာပြီး ဒေါ်လာ ၆၂ ဒသမ ၂ ဘီလီယံအထိ ရောက်ခဲ့ပါတယ်။

၁၉၅၈ ခုနှစ်ကစပြီး အမြင့်ဆုံးဝေစုအဖြစ် GDP ရဲ့ ၁ ဒသမ ၄ ရာခိုင်နှုန်းနဲ့ ညီမျှနေပါတယ်။

SIPRI ရဲ့ စစ်ရေးအသုံးစရိတ်ထဲမှာ လက်ရှိ စစ်တပ်တွေနဲ့ လုပ်ဆောင်ချက်တွေ၊ ဝန်ထမ်းတွေ၊ စစ်ဆင်ရေးတွေ၊ လက်နက်နဲ့ ပစ္စည်းကိရိယာတွေ ဝယ်ယူခြင်း၊ စစ်ရေးတည်ဆောက်မှု၊ သုတေသနနဲ့ ဖွံ့ဖြိုးတိုးတက်ရေး၊ ဗဟိုအုပ်ချုပ်ရေးအပါအဝင် အစိုးရရဲ့ အသုံးစရိတ်တွေ ပါဝင်နေပါတယ်။

Source: Reuters