အမေရိကန်နိုင်ငံမှာ မနေ့က ကျင်းပခဲ့တဲ့ မြန်မာကိုစားပြုချင်းဖိုက်တာ ဂျော့ရှူအာဗန်နဲ့ ဘရာဇီးဖိုက်တာ ပန်တိုဂျာတို့ရဲ့ ပွဲစဉ်ကို UFC 331 ရဲ့ ကောင်းဆုံးပွဲစဉ် (Fight of the Night) အဖြစ်ရွေးချယ်ပြီး တယောက်ချင်းကို အမေရိကန်ဒေါ်လာ ၁ သိန်းစီ အပိုဆုကြေး ပေးခဲ့လို့ ဗန်အနေနဲ့ ကန်ဒေါ်လာ ၆ သိန်း ရရှိခဲ့တယ်လို့ သိရပါတယ်။
UFC 331 ပြိုင်ပွဲရဲ့ ခေါင်ပွဲအနေနဲ့ UFC ဖလိုင်းဝိတ်တန်းချန်ပီယံ ဂျော့ရှုအာဗန်က ပန်တိုဂျာကို ၅ ချီပြည့် အသာစီးက ထိုးသတ်ပြီး ဒိုင်အဆုံးအဖြတ်နဲ့ အနိုင်ယူကာ ချန်ပီယံခါးပတ်ကို ဒုတိယအကြိမ် ကာကွယ်သွားခဲ့တာပါ။
ဒီပွဲမှာ ဂျော့ရှူအာဗန်ဟာ ထိုးကြေး အနေနဲ့ အမေရိကန်ဒေါ် လာ ၅ သိန်းရရှိခဲ့တဲ့အပြင် Fight of the Night ဆုကြေးအနေနဲ့ ဒေါ်လာ ၁ သိန်း ထပ်မံချီးမြှင့်ခံခဲ့ရတာပါ။
ဂျော့ရှူအာဗန်ဟာ အရင်ချန်ပီယံဟောင်း ပန်တိုဂျာကို ပထမအကြိမ်တွေ့ဆုံခဲ့စဉ်က ပထမအချီမှာတင် အလဲထိုးအနိုင်ယူပြီး ချန်ပီယံခါးပတ်လွှဲပြောင်းရယူထားတာဖြစ်ပြီး သူ့ရဲ့ ပထမဆုံး ချန်ပီယံခါးပတ်ကာကွယ်ပွဲမှာ ဂျပန်ဖိုက်တာ တက်ဆူရိုတိုင်ရာကို အလဲထိုးနဲ့ အနိုင်ယူပြီး ခါးပတ်ကို ကာကွယ်ထားနိုင်ခဲ့ပါတယ်။
UFC က ထုတ်ပြန်တဲ့ အချက်အလက်တွေအရ ဂျော့ရှူအာဗန်ဟာ မနေ့က ပွဲစဉ်တလျှောက် ပန်တိုဂျာရဲ့ ဦးခေါင်းပိုင်းကို အကြိမ် ၁၄၀ အထိ ထိအောင်ထိုးနိုင်ခဲ့ပြီး ပန်တိုဂျာကတော့ ၉၉ ကြိမ် ထိုးနိုင်ခဲ့တယ်လို့ ဆိုပါတယ်။
ပွဲစဉ် ၅ ချီပြည့်လို့ ဒိုင်အဆုံးအဖြတ်ယူရာမှာ ဒိုင် ၃ ယောက်စလုံးက ဂျော့ရှူအာဗန်ကို အနိုင်ပေးခဲ့တာဖြစ်ပါတယ်။
ဂျော့ရှူအာဗန်ဟာ UFC သမိုင်းတလျှောက် ဒုတိယအသက်အငယ်ဆုံး ချန်ပီယံဖြစ်တဲ့အပြင် အာရှရဲ့ ပထမဆုံး အမျိုး သားချန်ပီယံလည်းဖြစ်ပါတယ်။
