မော်စကိုဟာ ယူကရိန်းမြို့တော်ကို လေကြောင်းတိုက်ခိုက်မှုတွေကို ၁၀ ရက်မြောက် အဆက်မပြတ် လုပ်ဆောင်နေချိန်မှာ ရုရှားရဲ့ ဒရုန်းတိုက်ခိုက်မှုကြောင့် ကိယက်ဗ်မြို့မှာရှိတဲ့ ယူကရိန်း လုံခြုံရေး ဌာနချုပ် (SBU ) ပင်မအဆောက်အအုံ ထိမှန်သွားတယ်လို့ သမ္မတ ဗိုလိုဒီမီယာ ဇလန်စကီးက စက်တင်ဘာ ၄ ရက်မှာ ပြောလိုက်ပြီး လက်တုံ့ပြန်သွားမယ်လို့  ကတိပြုခဲ့ပါတယ်။ 

စိန့်ဆိုဖီယာ ကက်သလစ်ဘုရားကျောင်းနဲ့ မျက်နှာချင်းဆိုင်၊ ဗိုလိုဒီမီယာစ်ကာ လမ်းမပေါ်မှာရှိတဲ့ SBU ပင်မအဆောက်အအုံကို ရုရှားဒရုန်း ထိမှန်ခဲ့တာဖြစ်ပြီး၊ ဒီဒရုန်းဟာ လုံခြုံရေးဌာန အကြီးအကဲ အိုလက်ဆန္ဒာပိုကလဒ်ရဲ့ ရုံးခန်းကို တိုက်ရိုက် ပစ်မှတ်ထားခဲ့တာလို့ သမ္မတ ဇလန်စကီး က ဆိုပါတယ်။

အခင်းဖြစ်နေရာမှာ အရေးပေါ်အဖွဲ့တွေ ကယ်ဆယ်ရေးလုပ်နေကြပြီး ထိခိုက်သူတွေကို အကူအညီ ပေးနေပါတယ်။ အဆင်သင့်ဖြစ်တာနဲ့ ရုရှားတွေကို ဒီအတိုင်း တူညီတဲ့ တုံ့ပြန်မှုမျိုး ပြန်ပေးဖို့ လုံခြုံရေးအကြီးအကဲကို ညွှန်ကြားထားသလို စစ်တပ်ကလည်း ကူညီသွားမယ်လို့ ဆိုပါတယ်။ 

ရုရှားနဲ့ စစ်ဖြစ်နေတဲ့ ၄ နှစ်ခွဲကျော်ကာလအတွင်း ယူကရိန်းအစိုးရ အဆောက်အအုံတွေ တိုက်ခိုက် ခံရတာ နည်းပါးခဲ့ပြီး အခုလို SBU ဌာနချုပ် တိုက်ခိုက်ခံရတာဟာ စစ်ပွဲ ပိုမိုပြင်းထန်လာတဲ့ လက္ခဏာလို့ ရိုက်တာသတင်းက ဆိုပါတယ်။

SBU ဟာ ရုရှားရဲ့ စစ်ရေးနဲ့ စွမ်းအင်ပိုင်းတွေကို အဝေးထိန်း ပြင်းပြင်းထန်ထန် တိုက်ခိုက်နေတဲ့ ဌာနဖြစ်လို့ယူကရိန်းအတွက် အလွန်အရေးပါပါတယ်။ 

စက်တင်ဘာ ၃ ရက်မှာပဲ လမ်းပေါ်မှာ ကားမောင်းနေတဲ့ အရပ်သားတွေကို ဂျက်အင်ဂျင်တပ် ရုရှားဒရုန်းတွေ ထိမှန်လို့ ၂ ယောက် ဒဏ်ရာရခဲ့သလို၊ သောကြာနေ့ SBU တိုက်ခိုက်မှုမှာလည်း မြို့လယ်မှာ မီးခိုး မည်းမည်းလုံးတွေ တက်လာပြီး အနည်းဆုံး ၇ ယောက် ထပ်မံ ဒဏ်ရာရခဲ့ပါတယ်။ 

ရုရှားရဲ့ လေကြောင်းတိုက်ခိုက်မှုတွေကြောင့် အရပ်သားတွေ အများကြီး သေဆုံးခဲ့ရသလို ကိယိဗ် မြို့တော်ရဲ့ ကုန်စည်ပို့ဆောင်ရေးနဲ့ နေ့စဉ်လူနေမှုဘဝတွေလည်း အကြီးအကျယ် ကမောက်ကမ ဖြစ်နေပါတယ်။ 

Source:Reuters