အီရန်ရဲ့ ရေနံရောင်းချမှုအပေါ် ပိတ်ဆို့ထားတာတွေကို ယာယီရပ်ဆိုင်းထားတာတွေ ပြန်ရုပ်သိမ်းဖို့ အမေရိကန် ဘဏ္ဍာရေးဝန်ကြီးဌာနရဲ့ လုပ်ဆောင်ချက်ကို အီရန်နိုင်ငံခြားရေးဝန်ကြီးဌာနက ရှုတ်ချခဲ့ပါတယ်။

ဒီဆုံးဖြတ်ချက်ဟာ စစ်ပွဲအဆုံးသတ်ရေးနဲ့ အကျိုးဆက်တွေအတွက် အမေရိကန်အစိုးရက တာဝန်ယူစေဖို့ အစ္စလာမ္မာဘတ် သဘောတူညီချက်ကို ချိုးဖောက်တာလို့လည်း ပြောပါတယ်။

အီရန်ဟာ သူ့အကျိုးစီးပွားနဲ့ အမျိုးသားလုံခြုံရေးကို ကာကွယ်ဖို့ လိုအပ်တယ်လို့ ယူဆတဲ့ ဘယ်အစီအမံကိုမဆို လုပ်ဆောင်မယ်လို့လည်း အီရန် နိုင်ငံခြားရေးဝန်ကြီးဌာနက ပြောပါတယ်။

ဟော်မုဇ်ရေလက်ကြားက သင်္ဘောတွေကို အီရန်က တိုက်ခိုက်တာတွေကို လုံးဝလက်မခံနိုင်ဘဲ အကျိုးဆက်တွေနဲ့ ရင်ဆိုင်ရမယ်လို့ အမေရိကန်အရာရှိတယောက်က သတိပေးခဲ့ပါတယ်။

အမေရိကန်ပြည်ထောင်စုက အီရန်ရေနံအပေါ် ပိတ်ဆို့မှုတွေကို ဇူလိုင် ၇ ရက်မှာ ပြန်ချမှတ်ခဲ့တာပါ။

အရင် ညှိနှိုင်းသူတွေက အီရန်နဲ့ နောက်ဆုံးသဘောတူညီချက်ရဖို့ ယုံကြည်ချက်ကောင်းကောင်းနဲ့ ဆက်ဆောင်ရွက်နေတယ်လို့ အမေရိကန်အရာရှိတယောက်က ပြောပါတယ်။

ဒါပေမဲ့ ရေလက်ကြားကို ထိန်းချုပ်နိုင်ခဲ့ခြင်းက အီရန်အစိုးရကို ကြီးမားတဲ့ သြဇာလွှမ်းမိုးမှုတွေ ပေးစွမ်းခဲ့ပြီး ကမ္ဘာ့အင်အားအကြီးဆုံး စစ်တပ်နဲ့ အကျပ်အတည်းတရပ် ဖြစ်စေခဲ့ပါတယ်။

အီရန်အစိုးရက အမေရိကန်နဲ့ ရေရှည် ငြိမ်းချမ်းရေး သဘောတူညီချက်တရပ်ကို ညှိနှိုင်းနေချိန်မှာ ဒီသြဇာလွှမ်းမိုးမှုကို အလေးပေးဖော်ပြဖို့ သင်္ဘောတွေကို တိုက်ခိုက်တဲ့လုပ်ရပ်ကို သုံးခဲ့တာလို့ လေ့လာသုံးသပ်သူတွေက ပြောခဲ့ပါတယ်။

အမေရိကန်-အီရန် ယာယီသဘောတူညီချက်အရ အမေရိကန်ဘဏ္ဍာရေးဝန်ကြီးဌာနက အီရန်ကနေ ရေနံစိမ်း၊ ရေနံဓာတုဗေဒနဲ့ ရေနံထွက်ပစ္စည်းတွေကို သြဂုတ် ၂၁ ရက်အထိ ရောင်းချခွင့်ပြုတဲ့ အထွေထွေလိုင်စင်တရပ်ကို ဇွန် ၂၂ ရက်မှာ ထုတ်ပြန်ခဲ့ပါတယ်။

ဒီလိုင်စင်ကို အင်္ဂါနေ့မှာ ရုပ်သိမ်းခြင်းအားဖြင့် အီရန်ကို ဘယ်အရောင်းအဝယ်မဆို ရပ်ဆိုင်းဖို့ ဇူလိုင် ၁၇ ရက်အထိ အချိန်ပေးထားပါတယ်။

Source: Reuters