ဧရာဝတီတိုင်း၊ ဟင်္သာတခရိုင်၊ လေးမျက်နှာမြို့နယ်မှာ ရေဘေးဒုက္ခသည် ၃ ယောက်ကို စစ်အာဏာရှင်တပ်က PDF ဆိုပြီး စွပ်စွဲ ဖမ်းဆီးသွားတယ်လို့ ဒေသခံတွေဆီကနေ သိရပါတယ်။
သြဂုတ် ၅ ရက် ည ၇ နာရီခန့်က လေးမျက်နှာမြို့နယ်၊ ရေဖြူကျေးရွာက မိသားစုတွေဆီ ရောက်နေတဲ့ ရေဘေးဒုက္ခသည် အရပ်သား အမျိုးသား ၂ ယောက်နဲ့ အမျိုးသမီးတယောက်ကို စစ်အာဏာရှင်တပ်က ဖမ်းဆီးသွားတာလို့ သိရပါတယ်။
ဖြစ်စဉ်ကိုသိရှိသူတယောက်က “မိသားစုတွေရှိတဲ့ ရေဖြူကျေးရွာကို ရေဘေးလာရှောင်နေတာ။ ဒုက္ခသည်တွေကို PDF ဆိုပြီး ဖမ်းသွားတာ။ အံ့သြလို့ ဘာမှကို မပြောတတ်သလောက်ပဲ” လို့ ပြောပါတယ်။
အဖမ်းခံရတဲ့ ရေဘေးဒုက္ခသည် ၃ ယောက်ဟာ အသက် ၃၀ အရွယ် ကိုစိုးမင်း၊ မကေသီနဲ့ အသက် ၂၀ ကျော်အရွယ် လူငယ်အမျိုးသားတယောက် ဖြစ်တယ်လို့ သိရပါတယ်။
လေးမျက်နှာမြို့နယ် စစ်အာဏာရှင်တပ်နဲ့ နီးစပ်သူက “သတင်းပေးတဲ့သူ ရှိတာကြောင့် အဖမ်းခံရတာလို့ သိရတယ်။ ဘယ်ကိုဖမ်းသွားလဲ မသိသေးဘူး။ အဖမ်းခံရတာတော့ ဟုတ်တယ်။ တပ်ကဖမ်းတာ” လို့ ပြောပါတယ်။
အဖမ်းခံရတဲ့ ရေဘေးရှောင်တွေဟာ သြဂုတ် ၁ ရက်က လေးမျက်နှာမြို့နယ်၊ ရေဖြူကျေးရွာကို ရောက်လာတာဖြစ်ပြီး သြဂုတ် ၅ ရက် ညပိုင်းက အဖမ်းခံရပြီးနောက် သြဂုတ် ၆ ရက် နေ့လယ်ပိုင်းအထိ အဆက်အသွယ်မရ ဖြစ်နေတယ်လို့ ဆိုပါတယ်။
