စစ်ကောင်စီကျင်းပတဲ့ အတုအယောင် ရွေးကောက်ပွဲကနေ ပေါ်ပေါက်လာတဲ့ တတိယအကြိမ် ပြည်ထောင်စုလွှတ်တော်မှာ နိုင်ငံတော်သမ္မတသစ်ကို မနက်ဖြန် ဧပြီ ၃ ရက်နေ့မှာ မဲခွဲရွေးချယ်ဖို့ ရှိနေပါတယ်။
ဒီနေ့ ဧပြီ ၂ ရက်နေ့မှာကျင်းပတဲ့ လွှတ်တော် အစည်းအဝေးအတွင်း အစုအဖွဲ့အသီးသီးက တင်မြှောက်ထားတဲ့ ဒုသမ္မတလောင်း ၃ ဦးစလုံးဟာ သတ်မှတ်အရည်အချင်းတွေနဲ့ ကိုက်ညီကြောင်း နာယက ဦးအောင်လင်းဒွေးက အတည်ပြုခဲ့တာပါ။
သမ္မတလောင်းတွေအဖြစ် ပြည်သူ့လွှတ်တော်က စစ်ခေါင်းဆောင် မင်းအောင်လှိုင်၊ အမျိုးသားလွှတ်တော်က နန်းနီနီအေးနဲ့ တပ်မတော်သားအစုအဖွဲ့က ဗိုလ်ချုပ်ကြီးဟောင်း ဦးညိုစော တို့ကို အသီးသီး ရွေးချယ် ထားကြပါတယ်။
ထူးခြားချက်အနေနဲ့ ရွေးကောက်ပွဲဝင်မပြိုင်တဲ့ စစ်ခေါင်းဆောင် မင်းအောင်လှိုင်ကို ကိုယ်စားလှယ်အများဆုံးရှိတဲ့ ပြည်သူ့လွှတ်တော်က တင်မြှောက်ခဲ့သလို ကြံ့ခိုင်ရေးပါတီအမတ် ဦးညိုစောကိုတော့ တပ်မတော်သားအစုအဖွဲ့က တင်သွင်းခဲ့တာ ဖြစ်ပါတယ်။
မနက်ဖြန်ကျင်းပမဲ့ ပြည်ထောင်စုလွှတ်တော်မှာတော့ အဆိုပါ ၃ ယောက်ကို လျှို့ဝှက်ဆန္ဒမဲပေး ရွေးချယ်ကြမှာဖြစ်ပြီး မဲအများဆုံးရသူက သမ္မတ၊ ကျန် ၂ ယောက်ကတော့ ရရှိတဲ့မဲအလိုက် ဒုသမ္မတ (၁) နဲ့ (၂) အဖြစ် တာဝန်ယူရမှာ ဖြစ်ပါတယ်။
အာဆီယံလွှတ်တော်အမတ်များအဖွဲ့ (APHR) ကတော့ အခုလို မင်းအောင်လှိုင်ကို သမ္မတ တင်မြှောက်ဖို့ လုပ်ဆောင်ချက်ဟာ အာဏာသိမ်းမှုကို ပုံစံပြောင်း တရားဝင်ဖြစ်အောင် လုပ်ဆောင် တာသာဖြစ်ပြီး ပြည်သူ့ဆန္ဒကို ထင်ဟပ်ခြင်း မရှိတဲ့အတွက် တရားမဝင်ကြောင်း ရှုတ်ချထား ပါတယ်။
