ရှမ်းပြည်နယ်​မြောက်ပိုင်း၊ ကိုးကန့်လက်နက်ကိုင်တပ် MNDAA ထိန်းချုပ်ထားတဲ့ ကွတ်ခိုင်မြို့နယ်၊ တီမားရွာကို စစ်အာဏာရှင်တပ်က သြဂုတ် ၁၄ ရက် ည ၈ နာရီခွဲမှာ ဗုံးကြဲတိုက်ခိုက်သွားတယ်လို့ MNDAA သတင်းရင်းမြစ်ကနေ သိရပါတယ်။

တိုက်ပွဲ​တွေ ငြိမ်သက်​နေတာ ၁ နှစ်​ကျော်ကြာပြီဖြစ်တဲ့ MNDAA ထိန်းချုပ် ရှမ်း​မြောက်​ဒေသကို အာဏာရှင်စစ်တပ်က ပြန်လည်ဗုံးကြဲတိုက်ခိုက်လာတာဖြစ်ပြီး ထိခိုက်ပျက်စီးတာ​တော့ မရှိဘူးလို့ ဆိုပါတယ်။

MNDAA စစ်​ရေးသတင်းအရင်းအမြစ်က “တီမားရွာက အထူး​ဒေသ ၁ ထဲပါတယ်ဆို​ပေမဲ့ အဲဒီမှာက SSPP ​ကော KIA ​ကောရှိပါတယ်။ တိုက်ပွဲလည်းမရှိဘဲ ဗုံး ၂ လုံးကြဲသွားတာပါ” လို့ ​ပြောပါတယ်။

တီမားရွာဟာ နမ့်ဖက်ကာ-တာမိုးညဲ-၁၀၅ မိုင်ကြားမှာ ရှိ​နေတာဖြစ်ပြီး SSPP တပ်ရဲ့ စစ်​ရေး​လေ့ကျင့်​ရေးကွင်းလည်းရှိသလို KIA တပ်​တွေလည်း ရှိ​နေတာပါ။

​ဒေသခံတ​ယောက်က “တီမားရွာက ရင်ကတည်းက အမည်း​ရောင်နယ်​မြေ။ အားလုံးက လက်နက်ကိုင်တယ်၊ မူးယစ်​ဆေး​တွေ လုပ်ကြတယ်။ ဘာ​ကြောင့် ဗုံးလာကြဲလဲ ကျ​နော်တို့လည်း မသိဘူး"လို့ ​ပြောပါတယ်။

၁၀၂၇ စစ်ဆင်​ရေးအပြီး MNDAA၊ TNLA တို့ အပစ်ရပ်လိုက်ပြီး​နောက် ​စစ်တပ်က နောက်ဆုံး ဗုံးကြဲ တိုက်ခိုက်တာဟာ ကွတ်ခိုင်မြို့က ရာစုသစ်ဟိုတယ်ဖြစ်ပါတယ်။

ကွတ်ခိုင်မြို့ ရပ်ကွက် ၂ က ရာစုသစ်ဟိုတယ် ၂ ကို ၂၀၂၅ ခုနှစ် ဇူလိုင် ၃၀ ရက်မှာ ဗုံးကြဲတိုက်ခိုက်လို့ သက်ကြီးရွယ်အိုနဲ့ ကလေးငယ် အပါအဝင် အရပ် သား ၆ ယောက် ​သေဆုံးပြီး ၈ ယောက် ဒဏ်ရာရခဲ့တာပါ။