မွန်ပြည်နယ်၊ ကျိုက်ထိုမြို့နယ်၊ သိမ်ဇရပ်မြို့မှာ အခြေစိုက်ထားတဲ့ စစ်အာဏာရှင်တပ်ရဲ့ အမှတ် ၂၀၇ ခြေမြန်တပ်ရင်းထဲကို နိုဝင်ဘာ ၂ ရက်မှာပဲ အင်အားဖြည့်တင်းလာတယ်လို့ စစ်​ရေး သတင်းရင်းမြစ်ကနေ  သိရပါတယ်။

တပ်မ ၄၄ လက်အောက်ခံ တပ်ရင်းတရင်းဖြစ်တဲ့ ခမရ ၂၀၇ ထဲကို တပ်မ ၂၂ က အင်အား ၃၀၀ ​ကျော် အင်အားဖြည့်တင်းလာတာ​ကြောင့် ကရင်အမျိုးသားအစည်းအရုံး (KNU) တပ်မဟာ ၁ နယ်မြေဖြစ်တဲ့ ကျိုက်ထို၊ ဘီးလင်း၊ သထုံနဲ့ ကရင်ပြည်နယ်၊ ပဲခူးတိုင်း နယ်စပ်​တွေကို စစ်​ကြောင်း ထိုးလာနိုင်တယ်လို့ ဆိုပါတယ်။

စစ်​ရေးသတင်းအရင်းအမြစ်က “စစ်ကြောင်းထိုးမဲ့သဘော ရှိတယ်။ စစ်တပ်ဘက်က အင်အား အများကြီး ရောက်နေတယ် ခမရ ၂၀၇ တပ်ထဲကို။ တပ်မ ၂၂ ကတပ်​တွေ” လို့ DVB ကို ​ပြောပါတယ်။

အခုရက်ပိုင်းအတွင်း ကျိုက်ထိုမြို့နယ်ထဲ မြေပြင်မှာ တိုက်ပွဲ​တွေဖြစ်ပွားတာ မရှိ​ပေမဲ့လည်း စစ်တပ်က လေကြောင်း၊ လက်နက်ကြီးနဲ့ ဒရုန်း​တွေကို အသုံးပြု တိုက်ခိုက်တာ​တွေ ရှိ​နေတယ်လို့ သိရပါတယ်။

KNU ဗဟိုရဲ့ အောက်တိုဘာလကုန်ပိုင်း ထုတ်ပြန်ချက်​တွေအရ တပ်မဟာ ၁ နယ်​မြေဖြစ်တဲ့ ကျိုက်ထိုမြို့နယ်အတွင်း အရပ်သား ကျေးရွာ​တွေကို စစ်တပ်ဘက်က ပစ်မှတ်ထား တိုက်ခိုက်မှု​တွေ စိပ်လာနေတယ်လို့ ဆိုပါတယ်။

အောက်တိုဘာ ၉ ရက်က​နေ ၁၅ ရက်အတွင်း တိုက်ပွဲဖြစ်ပွားတာမရှိဘဲ တပ်မ ၄၄ အခြေစိုက်စခန်း ​တွေနဲ့ လေကြောင်းကတဆင့် ဒရုန်းဗုံးကြဲတာ၊ လက်နက်ကြီး ပစ်ခတ်တာ​တွေကြောင့် ကျိုက်ထိုနဲ့ ဘီးလင်းမြို့နယ်မှာ အရပ်သား ၈ ယောက်ထက်မနည်း သေဆုံးပြီး ၁၁ ယောက်ခန့် ဒဏ်ရာ ရရှိခဲ့ပါတယ်။

စစ်တပ်ဟာ ကျိုက်ထိုမြို့နယ်ထဲက ငှက်ပျောတောရွာ၊ ကျောက်ဖျာအောက်ရွာ၊ အလူးရွာ၊ ဇီးကုန်းရွာ၊ ပတိမ်တောင်ရွာနဲ့ မိုးဘောနတ်စင်ရွာ​တွေကို တိုက်ခိုက်တာပါ။

စစ်​​ရေးမတည်ငြိမ်မှု​တွေ​ကြောင့် စက်တင်ဘာလက​နေစလို့ အောက်တိုဘာလကုန်အထိ ကျိုက်ထို မြို့နယ်ထဲက ကျေးရွာအုပ်စု အများစုမှာ ကျောင်း​တွေကို အကန့်အသတ်မရှိ ပိတ်ထားရဆဲ ဖြစ်ပါတယ်။

တိုက်ပွဲမရှိဘဲ ကျေးရွာ​တွေကို လက်နက်ကြီး၊ ဒရုန်းဗုံး​တွေ ကျနေတာကြောင့် ဒေသခံထောင်နဲ့ချီပြီး ဘေးလွတ်ရာ တောတောင်​တွေထဲ ထွက်ပြေးတိမ်းရှောင်နေရလို့ ရိက္ခာနဲ့ ဆေးဝါး အရေးပေါ် လိုအပ်​နေပါတယ်။