ရခိုင်ပြည်နယ် စစ်တွေမြို့ပေါ်မှာ အောက်တိုဘာ ၂၃ ရက် ဒီနေ့မနက် ၈ နာရီဝန်းကျင်က ဗုံး ၂ လုံး ကျရောက်ပေါက်ကွဲလို့ အနည်းဆုံး ဒေသခံ ၅ ယောက် သေဆုံးပြီး ထိခိုက်ဒဏ်ရသူ ၉ ယောက်ရှိ တယ်လို့ မြို့ခံတွေက ပြောပါတယ်။
မောလိပ်ရပ်ကွက် မင်းဘာကြီးလမ်းရှိ ရွှေငါးစတိုးဆိုင်အနီးမှာ ဗုံး ၂ လုံး ကျရောက်ပေါက်ကွဲခဲ့တာဖြစ်ပြီး မြို့ခံ ၅ ယောက် သေဆုံးကာ ထိခိုက်ဒဏ်ရာရရှိသူတချို့လည်း ရှိကြတယ်လို့ စစ်တွေမြို့ခံ အမျိုးသမီးတယောက်က ပြောပါတယ်။
“ဒီနေ့မနက်ပိုင်းက မောလိပ်ရပ်ကွက် မင်းဘာကြီးလမ်း ရွှေငါးခွဆုံနားမှာ ဗုံး ၂ လုံး ကျရောက်ပေါက်ကွဲခဲ့တာ ရှိတယ်။ အသံက အကျယ်ကြီး ကြားလိုက်တာ။ ကျမတို့ သိထားရသလောက်ဆို ရခိုင်လူမျိုး ၄ ဦးနဲ့ မွတ်စလင်လူငယ်တဦး သေဆုံးခဲ့တယ်လို့ သိရတယ်။ နောက်ထပ်လည်း ထိခိုက်ဒဏ်ရာရတဲ့သူတွေလည်း များတယ်။ လူတွေက အရမ်းကြောက်နေကြတော့ ကျမတို့လည်း ဘယ်သူဘယ်ဝါဆိုတာတော့ အတိအကျ မသိရသေးဘူး။ အဲဒီနေရာက လူအရမ်းစည်ကားတဲ့ နေရာဆိုတော့ ထိခိုက်မှုများသွားတာ။”
လက်ရှိ စစ်တွေမြို့နယ်တွင်းမှာ စစ်အာဏာရှင်တပ်နဲ့ အာရက္ခတပ်တော် (AA) တို့အကြား တိုက်ပွဲတွေ ပြင်းထန်နေပြီး ဗုံးမကျခင်မှာ စစ်အာဏာရှင်တပ်ရဲ့ Y-12 လေယာဉ်ပျံဝဲခဲ့ကာ အဲဒီက ဗုံးကြဲချခဲ့တာလို့လည်း ဒေသခံတွေက ပြောဆိုမှုတွေ ရှိနေကြပေမဲ့ ဘယ်အဖွဲ့အစည်းက ပစ်ခတ်တယ် ဆိုတာကို DVB အနေနဲ့ သီးခြားအတည်ပြုနိုင်တာမျိုး မရှိသေးပါဘူး။
လက်ရှိမှာ စစ်တွေမြို့တွင်း ဗုံးပေါက်ကွဲမှုကြောင့် မြို့ခံတွေအကြား စိုးရိမ်ထိတ်လန့်မှုတွေလည်း အမြင့်ဆုံး အခြေအနေတွေမှာ ရှိနေကြတယ်လို့ နောက်ထပ် စစ်တွေမြို့ခံ အမျိုးသားတယောက်က ပြောပါတယ်။
“ဗုံးပေါက်ကွဲလို့ လူတွေသေဆုံးမှုရှိတယ်။ ဒီနေ့မနက် ၈ နာရီမှာကျတာ။ Y-12 နဲ့ ကင်းထောက်ပြီး ချတာ။ အခုလည်း မြို့ပေါ် Y-12 က ဝဲနေတုန်းပဲ။ ညဉ့်အချိန်ကလည်း ငပြီကျွန်းဘက်က တညလုံးချတယ်။ မြို့ခံတွေကတော့ တအားစိုးရိမ်နေကြတာ။ မြို့ပေါ်မှာက စစ်တွေက ဗုံးခိုကျင်းတွေ မလုပ်ရတော့ ပုန်းခိုစရာနေရာလည်း မရှိဘူး။”
လက်ရှိမှာ ဗုံးကြဲခံရတဲ့ ရပ်ကွက်က ဒေသခံတွေဟာ စိုးရိမ်မှုတွေနဲ့ တခြားရပ်ကွက်တွေကို ရွှေ့ပြောင်းနေကြရတယ်လို့လည်း မြို့ခံတွေက ပြောကြပါတယ်။
ပြီးခဲ့တဲ့ စက်တင်ဘာလအတွင်းကလည်း စစ်တွေမြို့ ပြည်တော်သာရှိ အထက-၄ ကျောင်းဝန်းနဲ့ အနောက်စံပြရပ်ကွက်တွေမှာ လက်နက်ကြီးကျည် ကျရောက်ပေါက်ကွဲလို့ ဆရာနဲ့ ကျောင်းသား ၃ ယောက် ထိခိုက်ဒဏ်ရာရရှိခဲ့ပါတယ်။
စစ်တွေ စစ်မျက်နှာမှာ စက်တင်ဘာ ၄ ရက်ကတည်း နှစ်ဖက်တိုက်ပွဲတွေ ဖြစ်ပွားနေပြီး လက်ရှိမှာ ဒကစ-ဌာနချုပ်အနီးအထိ တိုက်ပွဲတွေ ဖြစ်ပွားနေပါတယ်။
