တနင်္သာရီတိုင်း ထားဝယ်အရှေ့တောဒေသ သင်္ကန်းတုံးရွာမှာ ဇူလိုင် ၆ ရက်နေ့က စစ်ကောင်စီတပ်က ပစ်သတ်ခဲ့တဲ့ပြည်သူ့ကာကွယ်ရေးတပ်ဖွဲ့က ရဲဘော်တဦးရဲ့ အလောင်းကို ပြန်တွေ့ရခဲ့တယ်လို့ ပြည်သူ့ကာကွယ်ရေးတပ်ဖွဲ့ဝင်တွေဆီက သိရပါတယ်။
သေဆုံးတဲ့ ရဲဘော်ဟာ ထားဝယ်နဂါးတပ်ခွဲ ၂ က ရဲဘော်ဖြစ်ကြောင်း ထားဝယ် ပကဖ ရဲဘော်တဦးက အတည်ပြုပါတယ်။
အဲဒီရဲဘော်ရဲ့ဈာပနကိုတော့ ထားဝယ်အရှေ့တောဒေသက ကျေးရွာတခုရဲ့ သုသာန်မှာပဲ ဇူလိုင် ၆ ရက်နေ့က ပြုလုပ်ခဲ့ပါတယ်။
ဇူလိုင် ၂ ရက်က သင်္ကန်းတုံးရွာမှာ ပြည်သူ့ကာကွယ်ရေးတပ် ယာယီစခန်းတခု အလစ်အငိုက်ဝင်တိုက်ခိုက်ခံရပြီး အဆိုပါရဲဘော်ဟာ အဆက်အသွယ်ပြတ်တောက်သွားခဲ့ကာ လေးရက်အကြာမှာ အလောင်းပြန်တွေ့ခဲ့ရတာဖြစ်ပါတယ်။
အလစ်အငိုက်ဝင်တိုက်ခံရမှုကြောင့် ပြည်သူ့ကာကွယ်ရေးတပ်က စခန်းစွန့်ခွာခဲ့ရပြီး လက်နက်ခဲယမ်းတွေ သိမ်းဆည်းခံခဲ့ရပါတယ်။
စစ်ကောင်စီဝါဒဖြန့်တယ်လီဂရမ်ချန်နယ်တွေမှာတော့ M4 သေနတ်| 12 bore shot gun သေနတ်၊ ရိုင်ဖယ်သေနတ်နဲ့ လက်လုပ်သေနတ် ၁၂ လက်| လက်လုပ်ဗုံးသီး နဲ့ ကျည်ဆန်တွေ သိမ်းဆည်းရမိတယ်လို့ ဓာတ်ပုံနဲ့တကွ ဖော်ပြထားပါတယ်။
"ဖြစ်စဉ်က မှန်ပါတယ်။ သာလွန်အင်အား ၁၀၀ လောက်နဲ့ ဇူလိုင် ၂ရက် မနက် ၉ နာရီလောက် ထမင်းဟင်းချက်နေစဉ် စခန်းအဝိုင်းခံရတာပါ။ ရဲဘော်တွေကတော့ အသက်လုပြီး စခန်းစွန့်ထွက်ပြေးခဲ့ရတယ်။ ရဲဘော်တယောက်က အဆက်သွယ်ပြတ်ပြီး ၄ ယောက်က မစိုးရိမ်ရ ဒဏ်ရာရတယ်၊ အခုတော့ သက်သာနေပါပြီ။ အဆက်သွယ်ပြတ်တဲ့ ရဲဘော်ကတော့ မနေ့က (ဇူလိုင် ၆ ) နယ်မြေရှင်းလင်းရေးလုပ်တဲ့အချိန် အလောင်းပြန်တွေ့ပြီး သင်္ဂြိုဟ်ပေးခဲ့ပြီးပါပြီ။ စစ်တပ်စစ်ကြောင်းအနေနဲ့က တောင်ဖီလာဘက်မှာ ရှိနေပြီး ထားဝယ်အရှေ့တောဒေသကို ဖိတိုက်နေတဲ့ သဘောရှိတယ်" လို့ ထားဝယ် ပကဖ အဖွဲ့တခုဖြစ်တဲ့ Fighting for freedom force (FFFF) ရဲ့ ပြောရေးဆိုခွင့်ရှိတဲ့ ရဲဘော်တယောက်က ဒီဗွီဘီကို ပြောပါတယ်။
ဇူလိုင် ၂ ရက် စစ်ကောင်စီစစ်ကြောင်းရောက်လာပြီးနောက် သင်္ကန်းတုံးရွာက နေအိမ် ၅ လုံးလည်း မီးရှို့ခံခဲ့ရတယ်လို့ ရွာသားတွေက ပြောပါတယ်။
ဟာမြင်းကြီးရွာသား ၅ ဦးကိုလည်း စစ်ကောင်စီစစ်ကြောင်းက လူသားဒိုင်းအဖြစ် ဖမ်းထားတယ်လို့ သိရပါတယ်။
ဝကုန်း၊ သင်္ကန်းတုံး၊ ဟာမြင်းကြီး၊ ကုလားချောင်း၊ မြေးခန္တီ စတဲ့ ကျေးရွာတွေက ရွာသားတွေလည်း စစ်ရှောင်နေရပြီး အကူအညီ လိုအပ်နေတယ်လို့ ထားဝယ်အရှေ့တောဒေသက စစ်ဘေးရှောင်တွေကို ကူညီပေးနေသူတဦးက ပြောပါတယ်။
စစ်ကောင်စီစစ်ကြောင်းဟာ ဇွန် ၁၅ ရက်လောက်ကတည်းက ထားဝယ်အရှေ့တောဒေသကို ဝင်လာတာဖြစ်ပြီး ပြည်သူ့ကာကွယ်ရေးတပ်တွေနဲ့ လေးကြိမ်ထက်မနည်း ထိတွေ့တိုက်ပွဲဖြစ်ခဲ့ပြီး စစ်ကောင်စီဘက်က ၇ ဦးသေဆုံးခဲ့ပြီး ပြည်သူ့ကာကွယ်ရေးတပ်တွေဘက်ကလည်း ၂ ဦး ကျဆုံးခဲ့တာဖြစ်ပါတယ်။
