စစ်ကိုင်းတိုင်း၊ ကလေးမြို့နယ်တောင်ပိုင်း မြောက်စည်းကျေးရွာရဲစခန်းကို ကလေး PDF နဲ့ ပူးပေါင်းတပ်ဖွဲ့က ဝင်ရောက်တိုက်ခိုက်ခဲ့စဉ် ဗုံးမတော်တဆပေါက်ကွဲခဲ့တာကြောင့် ဒေသခံ PDF တပ်ဖွဲ့ဝင် ၃ ဦးသေဆုံးပြီး ၁၀ ယောက်ကျော် ဒဏ်ရာရရှိခဲ့တယ်လို့ တော်လှန်ရေးအင်အားစုတွေက ပြောပါတယ်။
ဧပြီ ၉ ရက် မနက်က ဒေသခံ PDF တပ်ဖွဲ့က ရန်သူကို ဗုံးသီးနဲ့ပစ်ဖို့ စနစ်တံဖြုတ်ရာမှာ ဗုံးသီးက လက်ထဲမတော်တဆဖြစ်ပြီး ပေါက်ကွဲသွားတာလို့ ကလေး PDF အဖွဲ့ဝင်တဦးက ပြောပါတယ်။
"ကျနော်တို့ဘက်က စခန်းထဲအရောက် သူတို့ထောင်ထားတဲ့ မိုင်းတွေရှင်းလင်းအောင်လို့ လက်ပစ်ဗုံးနဲ့ ပစ်တာကနေ စနစ်တံဖြုတ်ရင်း မတော်ဆပေါက်ကွဲသွားတာ။ ကျနော်တို့ဘက်က ရင်း ၆ က ရဲဘော်တယောက်၊ ရင်း ၄ က တယောက်နဲ့ ပကဖ ကတယောက် ရဲဘော် ၃ ယောက်ကျပြီး ၁၀ ယောက်ကျော် ဒဏ်ရာရတယ်။"
အဆိုပါတိုက်ပွဲအတွင်း စစ်ကောင်စီဘက်က ၁၀ ဦးထက်မနည်းသေဆုံးနိုင်တယ်လို့ ဒေသခံကာကွယ်ရေးတပ်တွေက ခန့်မှန်းကြပြီး စစ်ကောင်စီဘက်က လေကြောင်းပစ်ကူတွေလည်း အသုံးပြုခဲ့ပါတယ်။
ထိခိုက်ဒဏ်ရာရရှိတဲ့ ရဲဘော်တွေကတော့ NUG လက်အောက်ခံ ကလေးပြည်သူ့ဆေးရုံမှာ ဆေးကုသမှုခံယူနေကြပြီး လိုအပ်တဲ့သွေးတွေကို ဒေသခံတွေက လှူဒါန်းပေးနေကြတယ်လို့ ဆိုပါတယ်။
