စစ်ကိုင်းတိုင်း၊ ဆားလင်းကြီးမြို့ပေါ်က မြို့မရဲစခန်းကို ဒီဇင်ဘာ ၃၁ ရက် ည ၁၀ နာရီလောက်က လက်နက်ကြီးတွေနဲ့ ပစ်ခတ်တိုက်ခိုက်ခဲ့တယ်လို့ ဒေသခံ ကာကွယ်ရေးအဖွဲ့တွေက ဒီဗွီဘီကို ပြောပါတယ်။
အဆိုပါပစ်ခတ်မှုကို ယင်းမာပင်ခရိုင် တပ်ရင်း-၁၆၊ တပ်ခွဲ-၁ Brother Defense Force အဖွဲ့၊ ဆားလင်းကြီးသမန်းကျားပြောက်ကျားတပ်ဖွဲ့နဲ့ တခြားမဟာမိတ်တွေက တာဝေးပစ် လက်နက်ကြီးတွေနဲ့ ပူးပေါင်းတိုက်ခိုက်ခဲ့တာလို့ ဆိုပါတယ်။
ယင်းမာပင်ခရိုင် တပ်ရင်း-၁၆၊ တပ်ခွဲ-၁ Brother Defense Force တာဝန်ခံ ဗိုလ်ရာမက “လက်နက်ကြီးတွေနဲ့ အဝေးကနေ ပစ်ခတ်ခဲ့တာဗျ။ ပစ်မှတ်ကို အတိအကျ ပစ်နိုင်ခဲ့တယ်ဗျ။ ရဲစခန်းအဆောက်အဦ အမိုးတွေတော့ လုံးဝပျက်စီးတယ်လို့ သတင်းအတိအကျ ရထားတယ်ဗျ။ (--)အသေစာရင်းကတော့ စုံစမ်းနေဆဲပဲ” လို့ ပြောပါတယ်။
ဆားလင်းကြီးမြို့ပေါ်က စစ်ကောင်စီလက်အောက်ခံ ရုံးဌာနတွေကိုလည်း ဒီဇင်ဘာ ၂၇ ရက်က ပြည်သူ့ကာကွယ်ရေးအဖွဲ့တွေ ပစ်ခတ်တိုက်ခိုက်ခဲ့တယ်လို့ ဒေသခံတွေဆီကနေ သိရပါတယ်။
စစ်ကိုင်းတိုင်း၊ ကသာခရိုင်၊ ထီးချိုင့်မြို့မှာ ဇန်နဝါရီ ၁ ရက် နေ့လယ်က စစ်ကောင်စီအဖွဲ့ဝင်တွေ ကားအသေး ၁ စီး၊ ဆိုင်ကယ် ၂ စီးနဲ့ ကင်းပတ်နေချိန် မိုင်းဆွဲတိုက်ခိုက်ရာ စစ်ကောင်စီတပ်က ၃ ယောက်သေပြီး ၁ ယောက် အပြင်းအထန် ဒဏ်ရာရသွားတယ်လို့ Special.9-HPDF အဖွဲ့က ပြောပါတယ်။
“ထီးချိုင့်တံတားအဆင်း မြို့ပတ်လမ်းမှာ ကျနော်တို့ Special.9-HPDF အဖွဲ့က မိုင်းဆွဲတိုက်ခိုက်တာ ဆိုင်ကယ် ၂ စီး ထိထိမိမိ မိုင်းဆွဲနိုင်ပြီး ကားအသေးကတော့ နောက်မြီးပိုင်းပဲ ထိသွားတယ်။ စခ..ရခ.. ၃ ယောက်သေပြီး ၁ ယောက်က ၇ မိုင် ဆေးရုံ ပို့လိုက်ရတယ်လို့ စုံစမ်းသိရတယ်။ ဖြစ်နိုင်ရင် ကျနော်တို့လို အဖွဲ့ငယ်လေးတွေကို ထောက်ပံ့ကူညီပေးကြစေလိုပါတယ်။ နာမည်သိပ်မထွက်တဲ့ အဖွဲ့ငယ်တွေကို လှူတဲ့သူ ကူတဲ့သူ နည်းလို့ပါ” လို့ Special.9-HPDF အဖွဲ့တာဝန်ခံ Ko MG က ဒီဗွီဘီကို ပြောပါတယ်။
ဒီနေ့ ဇန်နဝါရီ ၂ ရက် မနက် ၅ နာရီခွဲလောက်ကလည်း မြတောင်လမ်းဆုံအထက် အောင်သာရွာအနီးမှာ သတ်မှတ်ချိန်မရောက်ခင် မောင်းနှင်လာတဲ့ ၁၂ ဘီးကား ၁ စီးကို အသံမိုင်းနဲ့ သတိပေးဖောက်ခွဲခဲ့တယ်လို့ Special.9-HPDF အဖွဲ့ တာဝန်ခံက ဆိုပါတယ်။
ဒေသခံနဲ့ ခရီးသွားပြည်သူတွေအနေနဲ့ ပြည်သူ့ကာကွယ်ရေးအဖွဲ့တွေရဲ့ ထုတ်ပြန်ထားတဲ့ အချက်တွေကို လိုက်နာပေးကြဖို့ ထုတ်ပြန် အသိပေးထားပါတယ်။