နေပြည်တော် လယ်ဝေးမြို့နယ်မှာ PDF ထောက်ပို့လို့ စွပ်စွဲပြီး အရပ်သား ၅ ယောက်ကို စစ်အာဏာရှင်တပ်က ဖမ်းဆီးခဲ့တယ်လို့ အဖမ်းခံရတဲ့သူတွေနဲ့နီးစပ်သူဆီက သိရပါတယ်။
မေ ၁၄ ရက်ညနေပိုင်းက လယ်ဝေးမြို့နယ်၊ အောင်ချမ်းသာကျးရွာက အရပ်သား ၅ ယောက်ကို စစ်အာဏာရှင်တပ်နဲ့ရဲတွေက PDF သတင်းပေးထောက်ပို့လို့ စွပ်စွဲဖမ်းဆီးခဲ့တာလို့ ဆိုပါတယ်။
အဖမ်းခံရသူတွေနဲ့နီးစပ်သူက “အဖမ်းခံရသူတွေက အရပ်သားတွေပါ။ လယ်သမားတွေ။ စစ်တပ် က PDF သတင်းပေး ထောက်ပို့လို့ဆိုပြီးဖမ်းခဲ့တာ။ ရွာထဲမှာကိုလာဖမ်းသွားတာ” လို့ ပြောပါတယ်။
အဖမ်းခံရတဲ့ အရပ်သား ၅ ယောက်ဟာ အသက် ၃၀ နှစ်အရွယ် ကိုကျော်ကျော်၊ မြင့်ဝင်းနဲ့ နောက်ထပ် လူငယ်ပိုင်း အမျိုးသား ၃ ယောက်ဖြစ်ပြီး အဖမ်းခံရတဲ့သူတွေနဲ့ မိသားစုတွေဟာ မေ ၁၆ ရက် နေ့လယ်ပိုင်းအထိ အဆက်အသွယ်မရဖြစ်နေတယ်လို့ သိရပါတယ်။
ပြီးခဲ့တဲ့ ဧပြီ ၂၂ ရက်က နေပြည်တော်၊ လယ်ဝေးမြို့နယ် သစ်ကြိမ်းကျေးရွာအုပ်က စစ်အာဏာရှင် တပ်ရဲ့ ကာကင်းစခန်းတိုက်ခိုက်ခံရပြီးနောက် အရပ်သားဒေသခံတွေကို စစ်အာဏာရှင်တပ်၊ ရဲနဲ့ ပြည်သူ့စစ်တွေက အထူးစောင့်ကြည့် စစ်ဆေးဖမ်းဆီးနေတယ်လို့ တပ်နဲ့နီးစပ်သူတွေက ဆိုပါတယ်။
