အဂတိလိုက်စားမှုနဲ့ ထောင်ကျနေတဲ့ ဝန်ကြီးချုပ်ဟောင်း နာဂျစ်ရာဇတ်ကို နေအိမ်အကျယ်ချုပ် ပြောင်းခွင့်ပေးဖို့ မလေးရှားဘုရင် စူလတန်အီဘရာဟင်က သဘောတူလိုက်တယ်လို့ အစိုးရက စက်တင်ဘာ ၁၈ ရက်မှာ ထုတ်ပြန်ပါတယ်။
ကန့်သတ်ချက် ပါဝင်တဲ့ ဒီလွတ်ငြိမ်းချမ်းသာခွင့်အရ ၂၀၂၈ ခုနှစ် ဩဂုတ် ၂၃ ရက်အထိ ကျန်ပြစ်ဒဏ်ကို နေအိမ်အကျယ်ချုပ်နဲ့ ကျခံရမှာဖြစ်ပြီး ဒဏ်ငွေ ရင်းဂစ် သန်း ၅၀ ပေးဆောင်ရပါမယ်။
သူ ဘယ်တော့ ထောင်ကနေ နေအိမ်ကို ပြောင်းရမလဲ ဆိုတာတော့ မသိရသေးပါဘူး။
နာဂျစ်ဟာ နိုင်ငံပိုင် ရင်းနှီးမြှုပ်နှံမှုရန်ပုံငွေ 1MDB နဲ့ ဆက်နွှယ်တဲ့ အဂတိလိုက်စားမှုအတွက် မူလက ထောင်ဒဏ် ၁၂ နှစ် ချမှတ်ခံခဲ့ရပါတယ်။
၂၀၂၄ ခုနှစ် ပထမအကြိမ် ဘုရင့်လွတ်ငြိမ်းချမ်းသာခွင့်မှာ ထောင်ဒဏ်ကို ၆ နှစ်အထိ လျှော့ပေးခဲ့ပါတယ်။
သီးခြား 1MDB အမှုမှာလည်း ၂၀၂၅ ခုနှစ် ဒီဇင်ဘာလက ထောင်ဒဏ် ၁၅ နှစ် ချမှတ်ခံထားရပြီး အဲဒီအမှုကို အယူခံဝင်ထားပါတယ်။
နာဂျစ်ကတော့ ပြစ်မှုကျူးလွန်တာ မရှိဘူးလို့ အစဉ်တစိုက် ငြင်းဆိုထားပါတယ်။
သူ သြဇာရှိနေဆဲဖြစ်တဲ့ UMNO ပါတီဟာ ဝန်ကြီးချုပ် အန်ဝါအီဘရာဟင်ရဲ့ ညွန့်ပေါင်းအစိုးရမှာ ပါဝင်နေပါတယ်။
အန်ဝါရဲ့ မဟာမိတ်အုပ်စုက နာဂျစ်အပေါ် ပြစ်ဒဏ်လျှော့ပေါ့တာကို ကန့်ကွက်ထားလို့ ဒီဆုံးဖြတ်ချက်က အစိုးရတွင်း သဘောထားကွဲလွဲမှုတွေ ပိုကြီးလာစေနိုင်ပါတယ်။
