မန်စီးတီး တိုက်စစ်မှူး ဟာလန်းပါဝင်တဲ့ နော်ဝေးအသင်းဟာ မနေ့ညက အော်စလိုမြို့ အိမ်ကွင်းမှာ ကစားသွားတဲ့ နေးရှင်းလိဂ်ပွဲစဉ်မှာ ဝေလအသင်းကို ၃-၁ ဂိုးနဲ့  အနိုင်ရရှိခဲ့ပြီး ရလဒ်ကောင်း ရယူနိုင်ခဲ့ပါတယ်။

ဒီပွဲပထမပိုင်းမှာ ဂိုးသွင်းဖို့အခွင့်အရေးတွေ ဖန်တီးနိုင်ခဲ့ပေမဲ့ တဖက်နဲ့ တဖက် ဂိုးမသွင်းနိုင်ဘဲ သရေကျနေခဲ့ပြီး  ဒုတိယပိုင်းပွဲချိန်  ၅၉ မိနစ်ကျမှ အန်တိုနီယို နူဆာက ပင်နယ်တီဧရိယာ အစပ်ကနေ အပြင်းကန်သွင်းကာ နော်ဝေအတွက် အဖွင့်ဂိုး သွင်းယူသွားခဲ့ပါတယ်။

ပွဲချိန် ၆၈ မိနစ်မှာတော့  နူဆာနဲ့ ဟာလန်းတို့ ပူးပေါင်းဖန်တီးပေးတဲ့ဘောလုံးကို လူစားဝင်ကစားသမား ရှယ်ဒါရပ်ပ်က အနီးကပ် ပိတ်သွင်းပြီး ဒုတိယဂိုးသွင်းပေးခဲ့ပါတယ်။

ပွဲချိန် ၇၉ မိနစ်မှာတော့ ဝေလအသင်းက လူစားဝင်လာသူ ဒေးဗစ် ဘရူကစ်က အလှပဆုံး ချေပဂိုး တဂိုး ပြန်လည်သွင်းယူပေးခဲ့ပေမဲ့ ပွဲချိန် ၈၈ မိနစ်မှာ ပင်နယ်တီပြန်ပေးလိုက်ရပြီး ပင်နယ်တီကို ဟာလန်းက အနိုင်ဂိုးအဖြစ် ကန်သွင်းယူပေးခဲ့လို့  အိမ်ရှင်နော်ဝေတို့  နိုင်ပွဲသေချာသွားခဲ့ပါတယ်။

ပြီးခဲ့တဲ့လက ကာဒစ်ဖ်ကွင်းမှာ ဝေလကို ရှုံးနိမ့်ခဲ့ရတာကို လက်စားချေနိုင်ခဲ့တဲ့ နော်ဝေအသင်းဟာ အခုပွဲမှာတော့ ဝေလအသင်းကို ကျော်ဖြတ်ကာ အုပ်စု A4 ရဲ့ တတိယနေရာသို့ တက်လှမ်းနိုင်ခဲ့ပါတယ်။

ဝေလအသင်းကတော့ အခုလို ရှုံးနိမ့်ခဲ့တာကြောင့် ထိပ်တန်းအဆင့်မှာ ဆက်လက် ရပ်တည်နိုင်ရေး မျှော်လင့်ချက်တွေ ထိခိုက်သွားခဲ့ပါတယ်။

ဝေလအသင်းကတော့ အရေးပါတဲ့ အဝေးကွင်းပွဲစဉ်မှာ ရှုံးနိမ့်ခဲ့တဲ့အတွက် ရမှတ်တွေ ဆုံးရှုံးခဲ့ရတာပါ။ နော်ဝေးအသင်းကတော့ အိမ်ကွင်းနိုင်ပွဲကြောင့် နေးရှင်းလိဂ်မှာ အခြေအနေ ကောင်းမွန်လာခဲ့တာ ဖြစ်ပါတယ်။