အက်စတွန်ဗီလာနည်းပြ အူနိုင်းအမ်မရီဟာ စပါးနဲ့ပွဲမှာ အဓိကကစားသမား ၇ ယောက်အထိ ချန်လှပ်ကာ အရန်အင်အားနဲ့ ပွဲထွက်ခဲ့တာကြောင့် ပရိသတ်တွေရဲ့ ပြင်းထန်တဲ့ ဝေဖန်မှုနဲ့ ရင်ဆိုင်နေရပါတယ်။
ဗီလာဟာ (၂-၁) ဂိုးနဲ့ ရှုံးနိမ့်ခဲ့ပြီး ဒီရလဒ်ကြောင့် စပါးဟာ တန်းဆင်းဇုန်ကနေ ရုန်းထွက်နိုင်ခဲ့ပြီး ဗီလာကတော့ အဆင့် ၄ နေရာ တက်လှမ်းခွင့်ကို လက်လွှတ်ခဲ့ရတာ ဖြစ်ပါတယ်။
ဗီလာပရိသတ်တွေကတော့ ဒီလူထုတ်ပုံဟာ အသင်းဂုဏ်သိက္ခာကို ထိခိုက်စေပြီး တန်းဆင်းဇုန် တိုက်ပွဲဝင်နေတဲ့ တခြားအသင်းတွေအပေါ် မတရားသလိုဖြစ်နေကြောင်း စွပ်စွဲခဲ့ကြပါတယ်။
ဒီရလဒ်ကြောင့် ဝက်စ်ဟမ်းအသင်းက စပါးနဲ့ တမှတ်အကွာ အဆင့် ၁၈ နေရာ ရောက်ရှိသွားပြီး လက်ကျန် ၃ ပွဲက ဘယ်အသင်းတန်းဆင်းမလဲဆိုတာ အဆုံးအဖြတ်ဖြစ်လာမှာပါ။
နည်းပြ အမ်မရီကတော့ ယူရိုပါလိဂ်အတွက် ကစားသမားတွေကို အနားပေးခဲ့တာဖြစ်ပြီး စပါးက ပိုကောင်းလို့ မိမိတို့အသင်း ရှုံးခဲ့တာဖြစ်ကြောင်း ခုခံပြောကြားသွားခဲ့ပါတယ်။
