ရခိုင်ပြည်နယ် အမ်းမြို့နယ်နဲ့ မကွေးတိုင်း၊ ငဖဲမြို့နယ်နားမှာရှိတဲ့ နတ်ရေကန်တောင်ဗျူဟာစခန်းကို ထိုးစစ်ဆင်ဖို့ စစ်တပ်က အင်အား ကားအစီး ၇၀ နဲ့ ထပ်မံဖြည့်တင်းလိုက်တယ်လို့ ဒေသခံတွေဆီက သိရပါတယ်။
ဇူလိုင် ၂၄ ရက် မွန်းလွဲ ၂ နာရီလောက်မှာ စစ်ကားအစီး ၇၀ ဟာ အသုတ်လိုက် မစခ ၉၀၅ ကို ဝင်ရောက်ခဲ့တယ်လို့ ဒေသခံအမျိုးသားတယောက်က ပြောဆိုပါတယ်။
“ကားမှာလူအပြည့်ပါတယ်။ သူတို့မလာခင်ကတည်းက လက်နက်ခဲယမ်းအပြည့်နဲ့ လမ်းကြော တလျှောက် လုံခြုံရေးယူထားတယ်။ ကားကတခါတည်း မစခ ၉၀၅ ကို တန်းဝင်တယ်” လို့ ပြောပါတယ်။
ကားတွေလာနေတဲ့အတွက် ဆုန်ကုန်းအမြောက်တပ်က စစ်ကားတွေက ပွိုင့်နေရာယူ လမ်းရှင်းထား ပြီး မွန်းလွဲပိုင်းမှာ ဆုန်ကုန်းအမြောက်တပ်ကို ရောက်ရှိလာတာ ဖြစ်ပါတယ်။
စစ်အာဏာရှင်တပ်ဟာ နတ်ရေကန်ကို လမ်းဟောင်းလမ်းသစ်ဘက်ကနေ အင်အားအလုံးအရင်းနဲ့ အကြိမ်ကြိမ်ထိုးစစ်ဆင်ပေမဲ့ လမ်းသစ်ဂုတ်ကြီး၊ လမ်းဟောင်းပဇီထက် မကျော်နိုင်ဘဲ အကြိမ်ကြိမ် တပ်လန်နေတယ်လို့ စစ်ရေးသတင်းရင်းမြစ်ကလည်း ပြောဆိုပါတယ်။
“သူတို့က အင်အားတွေစုတယ်။ လေကြောင်း၊ လက်နက်ကြီး ပစ်ကူယူတယ်။ ထိုးတက်တယ်။ ဒါပေမဲ့ မအောင်မြင်ဘူး။ အခုလာတဲ့ ကားတွေကလည်း အဲလိုထိုးစစ်ဆင်ဖို့ အင်အားဖြည့်တာပါပဲ” လို့ ပြောပါတယ်။
ကားအစီး ၇၀ နဲ့ စစ်သားအင်အား ၁၀၀၀ ကျော်ကို လက်နက်ခဲယမ်းနဲ့အတူသယ်ဆောင်လာပြီး ဆုန်ကုန်းအမြောက်တပ်မှာ စုထားပြီးမှ အဲဒီကနေ နေရာအသီးသီးကို ပြန်စစ်ကြောင်းခွဲပေးမှာလို့ စစ်တပ်နဲ့နီးစပ်သူတွေက ပြောဆိုပါတယ်။
