အင်ဒိုနီးရှားနိုင်ငံ၊ မြောက်ဆူလာဝေစီပြည်နယ်က အာဏာပိုင်တွေဟာ ဆိုပူတန်တောင်ရဲ့ တောင်စောင်းတွေက မြေယာနဲ့ သစ်တော ဟက်တာ ၇၀၀ ကျော်ကို လောင်ကျွမ်းနေတဲ့ တောမီးနဲ့ မြေယာမီးတွေကို ငြှိမ်းသတ်နေရတယ်လို့ အရာရှိတွေက သြဂုတ် ၅ ရက်မှာ ပြောပါတယ်။

သြဂုတ် ၂ ရက်က အရှေ့တောင်ပိုင်း မီနာဟာဆာ ဒေသတွင်း ဆိုပူတန်တောင် အနီးတဝိုက်က သစ်တောဧရိယာတွေကို မီးလောင်ခဲ့ပြီး လေပြင်းတိုက်လို့ ခြောက်သွေ့နေတဲ့ သစ်ပင်တွေကတဆင့် တောမီးက အမြန်ပျံ့နှံ့သွားခဲ့ပါတယ်။

တောမီးနဲ့ မြေယာ မီးလောင်မှုတွေရဲ့ အဓိကအကြောင်းရင်း ၂ ခု ရှိပါတယ်။ မီးရှို့ပြီး မြေယာရှင်းလင်းသူတွေရဲ့ ပေါ့ဆမှုကြောင့် ဒါမှမဟုတ် သဘာဝအတိုင်း ပေါင်းပင်တွေကို မီးလောင်စေတဲ့ အယ်လ်နီညိုရာသီဥတုနဲ့ ဆက်စပ်နေတဲ့ ပြင်းထန်တဲ့ မိုးခေါင်ရေရှားမှုကြောင့် ဖြစ်တယ်လို့ ဒေသခံ သစ်တောအကြီးအကဲ ရိန်းနီးယား ဒွန်ဒိုကမ်ဘေက မီဒီယာတွေကို ပြောပါတယ်။

မီးသတ်သမားတွေ၊ သစ်တောဝန်ထမ်းတွေနဲ့ ဒေသဆိုင်ရာ အာဏာပိုင်တွေဟာ ခက်ခဲတဲ့ မြေပြင်အခြေအနေတွေမှာ မီးလောင်မှုတွေကို ကိုင်တွယ်ဖြေရှင်းဖို့ ရေတင်ကားတွေ၊ ရေပိုက်တွေနဲ့ လက်စွဲမီးငြှိမ်းသတ်ကိရိယာတွေကို ဖြန့်ကြက်ပြီး မီးကိုထိန်းချုပ်ဖို့ စတင်ကြိုးပမ်းခဲ့တယ်လို့ အရာရှိတွေက ပြောပါတယ်။

မီးအများစုကို ထိန်းချုပ်နိုင်ခဲ့ပေမဲ့ ဆိုပူတန်တောင်ခြေမှာ မီးလောင်ကျွမ်းမှုပြင်းထန်တဲ့ နေရာတချို့မှာ တောမီးက ဆက်လောင်နေတုန်းပဲ ဆိုတာကို ဗုဒ္ဓဟူးနေ့က လေကြောင်းစောင့်ကြည့်မှုအရ သိရပါတယ်။

Source: Reuters